Read Lelemi Baga 1 6 Bible Online

Baga 1 6 - Lelemi bible

Baga 1 6

¹Ka Israelƒuɔ bálɛ Egyipte kalɔ lɛlɔ lɛkwa eti yaalenwi ku avlaatɛdi (480) kemmo ni, Ɔga Salomo úse kalɔ ku Katɔti kakpakɔ bɔtu. Na uwi ɔmmɔ ɔdi lɛkwa linedi ka Salomo ɔɔdi lɛga na Israel kalɔ lɛlɔ. Na lɛkwa linedi lɛmmɔ kɔbuli kunyɔdi kɔni na baalɔ Siw kemmo ni, kabla kammɔ kése kalɔ.

²Na ɔtɔ ɔmmɔ bune bɔdi lɛgba bɔka liti ku aavlene na nwuna bɔbɛbɛ bɔdi lɛgba bɔka avlaatɛ. Na nwuna bɔkuku bɔdi lɛgba bɔka aavlene ɛlɔ.

³Na lɛgbanya lɛni na bátu bádanku ɔtɔ mmɔ anumi ɔ́ya na ɔtɔ ɔmmɔ bɔbɛbɛ bɔni ndi lɛgba bɔka avlaatɛ mmɔ búne búbu aani lɛgba bɔka leevu-ɛlɔ.

⁴Na údie ɔƒɛƒɛɛ eƒi ɔ́kya kakpakɔ kammɔ awodu atɔdi kemmo.

⁵Na ɔ́tu katutaasia kɔtɛ lɛtɔ bamba ɔ́mana kakpakɔ keliekɔ kenengudi ku katɔma kedee kammɔ awodu kama adi lɛlɔ ɔ́mana.

⁶Na katutaasia ɔtɔ ɔlɔndi bɔbɛbɛ bɔdi lɛgba bɔka maatɛ ku kakɛ. Na ɔni nkya ntɛ bɔbɛbɛ bɔdi lɛgba bɔka yaalenwi. Na ɔtɔdi ƒui bɔbɛbɛ bɔdi lɛgba bɔka leevu ku kakɛ. Na ubili bamba na básia ku lɛta bonwu bonwu bámana kakpakɔ kammɔ béte lɛtɔ lɛmmɔ kalɛ na balaƒuala kakpakɔ awodu ammɔ alati.

⁷Na atabi ani na béti bátu kakpakɔ kammɔ ni, bánwi-nya básiku atabi kabwɛkɔ. Ɔmmɔ ɔsu ni, ukyuli biala ɔdi útenu lɛbuala lɛdi aani oloma iye libola lɛbuala bamba lɛdi lɛlɔ kabla kɔku na katukɔ mmɔ.

⁸Na katutaasia ɔtɔ ɔlɔndi ɔmmɔ kayakun kakya kakpakɔ kammɔ kada kakɛ. Na mmɔ na básia lɛgba kanyakɔ ubili bákɔli ɔtɔ unyɔdi útédu ɔtɛdi lɛnɔ kemmo.

⁹Anwuɔsu Ɔga Salomo ɔ́tu kakpakɔ kammɔ ɔ́wɔlɔ, na úti sida kugyii kpakplaa kɔmmɔ ɔ́bla lɛta ku kugyiikɛ úbi ɔtɔ ɔmmɔ.

¹⁰Na katutaasia lɛtɔ lɛmmɔ lɛdanku kakpakɔ kammɔ lɛ́mana, na sida lɛta kpakplaa ubili ɔni na básia mmɔ lɛlɔ. Na ɔdi biala bɔkuku bɔdi lɛgba bɔka maatɛ ku kakɛ.

¹¹Amu na Unwoti ɔ́su Salomo ɔnini,

¹²“Na kakpakɔ kani na aatú mɛni kama ni, si ádi mina ɔda bubo lɛlɔ, na ásiaku-mi kama siin na áda mina etemila ƒui kaduɛ ni, ami lɛnɔ nkɛnku-ɔ lɛlɔ na ndubɔbla lɛsiaku kenye kani na líse ƒ'ɔti Dawid lɛlɔ.

¹³Na ani ndi ka ndubulie mina kadi bekyuli Israelƒuɔ akɔ, na lɛɛɛdubo-ma bɔnyonu kudii.”

¹⁴Anwuɔsu Salomo ɔ́tu kakpakɔ kammɔ ɔ́wɔlɔ.

¹⁵Na kakpakɔ kammɔ kemmo awodu lɛlɔ ni, béti sida egyii bébo bámana ɔ́si kalɔ útédu lɛsa. Na béti egyii kpakplaa kugyiikɛ bámana ɔtɔ ɔmmɔ kalɔ.

¹⁶Na ɔ́ya na béle kakpakɔ kammɔ kama kakɛ bábla katɔma, na bébo sida ligyii bɛbɛɛbɛ báda mmɔ ɔ́si kalɔ útédu lɛsa. Na kama kakɛ mmɔ kebo lɛgba bɔka avlaatɛ. Na mmɔ ndi Katɔti Katɔma Kedee.

¹⁷Na ɔtɔ ɔmmɔ kesii kani nébu na katɔma kammɔ anumi ubo lɛgba bɔka liti ku leevu.

¹⁸Na sida kugyiikɛ na béti bámana atabi ɔtɔ kemmo awodu ammɔ lɛlɔ ƒui bávi. Na bánwi kugyii ebi adi udu ku egyii anwula ani néebimi evete básia kugyiikɛ kɔmmɔ lɛlɔ.

¹⁹Na báklibi katɔma kedee kammɔ kemmo, na kakpakɔ kammɔ kemmo kesii kani na badubɔlɛ Bunyimi Adaka ɔmmɔ.

²⁰Na ɔtɔ ɔmmɔ bune bɔdi lɛgba bɔka avlaatɛ, na nwuna bɔbɛbɛ bɔdi lɛgba bɔka avlaatɛ, na nwuna bɔkuku lɛnɔ bɔdi lɛgba bɔka avlaatɛ. Na béti sika ugyiedi bámana-nwu lɛlɔ ƒui. Na sida ligyii lɛkpabi lɛmmɔ lɛnɔ béti sika ugyiedi bámana-ni lɛlɔ báka bámana.

²¹Anwuɔsu kakpakɔ kammɔ kemmo ƒui kadi sika ugyiedi sɔɔn ɔ́mana. Na katɔma kammɔ kayakun ni, béti sika ugyiedi bábla lɛla lɛdi aani kɔbuli na béti báyɔlɔ mmɔ ƒui.

²²Na kakpakɔ kammɔ kemmo ƒui ni, béti sika ugyiedi bámana, na lɛni kani na bábla lɛkpabi lɛni nlɛ katɔma kedee kemmo mmɔ ƒui.

²³Na béti nnɔ kugyiikɛ bánwi kubweyi inyɔ badi udu na bebo avwi bényene, na baalɔ-ma Kerub. Na ɔdi biala bɔkuku bɔdi lɛgba bɔka leevu-ɛlɔ. Na béti-ma bálɛ katɔma kedee kammɔ kemmo.

²⁴Kebweyi kedeedi kɔvwi kunwi bune bɔdi lɛgba bɔka maatɛ ku kakɛ. Na kɔvwi kunyɔdi lɛnɔ lɛni kani. Anwuɔsu ɔ́si kɔvwi lili linwi útédu kɔvwi kunyɔdi lili lɛkladi ɔdi lɛgba bɔka leevu-ɛlɔ.

²⁵Kebweyi kanyɔdi avwi lɛnɔ ebo lɛgba bɔka leevu-ɛlɔ. Na bebweyi inyɔ bammɔ ƒui bálɛ lɛlɔ.

²⁶Na kebweyi biala bɔkuku bɔdi lɛgba bɔka leevu-ɛlɔ.

²⁷Na béti bebweyi bammɔ bálɛ katɔma kedee kammɔ kemmo. Na bana avwi ammɔ eli ásaku lɛlɔ na ɔtɔ ɔmmɔ ntɛ, na ɔdi biala kɔvwi kɔkladi lili liitúku awodu ammɔ ɔvi ɔni ku ɔni.

²⁸Na béti sika ugyiedi bámana bebweyi inyɔ bammɔ ƒui lɛlɔ.

²⁹Na ɔtɔ ɔmmɔ katɔma ku anumi ƒui ni, bánwi Kerub bebweyi bamɛni ku ebo ku egyii anwula ani néebimi lidu, bámana awodu ammɔ lɛlɔ ƒui.

³⁰Na katɔma ku ɔtɔ anumi ɔtɔ ɔmmɔ kalɔ muedi ni, sika ugyiedi béti bámana.

³¹Na béti nnɔ kugyiikɛ bánwi kɔlɛmikɔ inyɔ bákya katɔma kedee kammɔ ƒui. Na kɔlɛmikɔ kɔmmɔ kɔɔƒɛ kemmo kɔlɔ.

³²Na kɔlɛmikɔ kɔmmɔ lɛlɔ ni, bánwi Kerub bebweyi ku ebo ku anwula ani néebimi bámana. Na bebweyi ku ebo ku anwula ani néebimi ani bánwi bámana kɔlɛmikɔ kɔmmɔ lɛlɔ ni, béti sika ugyiedi bámana ana ƒui lɛlɔ.

³³Na béti nnɔ kugyiikɛ bánwi kɔlɛmikɔ udu ɔdi na ɔɔƒɛ lɛlɔ kemmo kune bákya kayakun kebendi kani baasia teeduo ɔtɔ ɔmmɔ kemmo.

³⁴Na béti kugyii kpakplaa bábla kɔyakun kɔlɛmikɔ inyɔ kɔni muunwíni ku lɛlɔ na kesii kani na bálɛ-ku mmɔ.

³⁵Na bánwi bebweyi ku ebo ku anwula ani néebimi bámana-ni lɛlɔ. Na béti sika ugyiedi bámana-ni lɛlɔ ƒui na kɔlɛmikɔ kɔmmɔ lɛlɔ.

³⁶Na kakpakɔ kaduli kemmo kowodu kɔni na bátu ni, básia atabi anwidi bámana kɔtɛ na bánwi sida ligyii bábla lɛta básia atabi ammɔ eli.

³⁷Na bése kalɔ ku kakpakɔ kammɔ bɔtu na kɔbuli kunyɔdi kɔni baalɔ Siw kemmo, na lɛkwa linedi lɛni Ɔga Salomo ɔɔdi lɛga.

³⁸Na kɔbuli maanedi kɔni baalɔ Bul na lɛkwa leevu-linwidi kemmo ɔni na Ɔga Salomo ɔɔdi lɛga ni, ɔ́tu kakpakɔ kammɔ ƒui ɔ́wɔlɔ aani kalɛ na ɔ́bla kasusu úse. Na akwa maatɛ na Ɔga Salomo úti ɔ́tu Unwoti kakpakɔ kammɔ.