Read Lelemi Baga 2 1 Bible Online

Baga 2 1 - Lelemi bible

Baga 2 1

¹Na Ɔga Ahab kukpi kama ni, Moabƒuɔ báta bénye Israelƒuɔ lɛlɔ.

²Na Ɔga Ahasia úbuli ɔ́siku nwuna ɔtɔ katɔ úbayu kalɔ na Samaria, na nwuna lɛlɔ lɛ́ƒɔ ɔlɛ kaduɛ. Ɔmmɔ ɔsu, ɔ́tala batu badi na ɔ́su-ma ɔnini, “Bisie na bitéye Baal-Sebub ɔni ndi Ekronƒuɔ baƒiɔ si ndubo bɔta na ɔlɛ ɔni na muuƒi mɛni kemmo?”

³Nsu Katɔti ɔtu ɔdi ɔ́su Elia ɔni ndi Tisbini ɔnini, “Ta na atásiaku batalane bani na Samariaƒuɔ ɔga ɔ́tala mmɔ. Na eye-ma anini, ‘Ka Katɔti uuubo Israel ɔsu na bísela Ekronƒuɔ baƒiɔ Baal-Sebub kudɔ?’

⁴Anwuɔsu ni, lɛni na Unwoti ɔɔsu, ‘Alata atɛla ani lɛlɔ na atɛ mmɔ. Na si ina ábla bi muedi adubukpi.’ ” Amu na Elia úsie na ɔ́su-ma kenye kammɔ.

⁵Uwi ɔni na batalane bammɔ bénwini bébo ɔga ɔmmɔ kudɔ ni, úye-ma ɔnini, “Bi ɔsu na bɛ́sɔ bínwini bíbo?”

⁶Amu na bédie kenye banini, “Ɔnana ɔdi úbasiaku-bu ulu. Na ɔ́su-bu ɔnii bunwini na bubasu-ɔ bɔnini, ‘Lɛni na Unwoti ɔɔsu! Ka Katɔti ɔdi uuubo Israel ɔsu na átala bekyuli ka batánu Ekronƒuɔ baƒiɔ Baal-Sebub? Ɔ́si ɔmmɔ ɔsu ni, alata ƒula atɛla ani lɛlɔ na atɛ mmɔ. Na bukpi kani na adubukpi.’ ”

⁷Amu na ɔga ɔmmɔ úye-ma ɔnini, “Dɛ na ɔnana ɔni nábasiaku-mii mmɔ use?”

⁸Amu na ama lɛnɔ bédie kenye banini, “Ɔdi ɔnana ɔni na nwuna lɛlɔ libo linwini na úti ebuo ɔku ɔda nwuna kavobi.” Amu na ɔga ɔmmɔ údie kenye ɔnini, “Tisbini, Elia mmɔ.”

⁹Amu na ɔga ɔmmɔ ɔ́tala nkyuli liti na údie bana ɔtɔnkune ɔ́kya Elia. Na ka bésie ni, bánu ka Elia ulie kɔbi kɔdi lili. Na ɔtɔnkune ɔmmɔ ɔ́su-nwu ɔnini, “Katɔti ukyuli, ɔga ɔnii ‘Yu bo kalɔ!’ ”

¹⁰Amu na Elia údie-nwu kenye ɔnini, “Si Katɔti ukyuli na ndi ni, na ogya ɔsi katɔ na ubakyula awɔ ku ƒula bekyuli liti bammɔ!” Mmɔ na ogya ɔ́si katɔ na úbakyula ɔtɔnkune ɔmmɔ ku nwuna bekyuli bammɔ ƒui.

¹¹Ɔmmɔ kama ɔga ɔmmɔ ɔ́sɔ ɔ́tala nkyuli liti ku bana ɔtɔnkune ɔ́kya Elia. Na ɔtɔnkune ɔmmɔ ɔ́su Elia ɔnini, “Katɔti ukyuli, ɔga ɔnii, ‘Yu bo kalɔ mɛni kɔnakunwi!’ ”

¹²Amu na Elia údie kenye ɔnini, “Si Katɔti ukyuli na ndi ni, na ogya ɔsi katɔ na ubakyula awɔ ku ƒula nkyuli liti bammɔ.” Mmɔ kani na ogya ɔ́si katɔ na úbakyula anwu ku nwuna bekyuli liti bammɔ.

¹³Ɔmmɔ ɔsu ɔga ɔmmɔ ɔ́sɔ ɔ́tala ɔtɔnkune ɔtɛdi ku nwuna bekyuli liti. Na ɔtɔnkune ɔtɛdi ɔmɛni ni, úsie na útálɛ akɔnkɔ na Elia anumi. Na úvele-nwu ɔnini, “Katɔti ukyuli, buvele nda-a, ti ɔbu te ami ku bekyuli liti bani ndi ƒula kabla bablane mɛni ngba!

¹⁴Nu! Ogya ɔ́si katɔ na úbakyula batɔnkune inyɔ bedeedi ku bana bekyuli ƒui. Nsu ami muuvele-ɔ ka ti ɔbu te mina ngba!”

¹⁵Amu na Katɔti ɔtu ɔdi úbasu Elia ɔnini, “Yu na awɔ ku-nwu bɛtɔlɔ, na tayia-nwu.” Mmɔ na Elia ku ɔtɔnkune ɔmmɔ báyu bésie kalɔ na bátɔlɔ bésie ɔga ɔmmɔ kudɔ.

¹⁶Amu na Elia ɔ́su ɔga ɔnini, “Lɛni na Unwoti ɔɔsu, ‘Ɔni na eeebo Katɔti ɔdi na Israel na eye-nwu lɛla lɛdi enu ɔsu na átala bekyuli na Ekronƒuɔ baƒiɔ Baal-Sebub kudɔ? Na lɛla lɛni na ábla mɛni ɔsu ni, alata ƒula atɛla ani lɛlɔ na atɛ mɛni, na bukpi kani na adubukpi!’ ”

¹⁷Anwuɔsu ɔga ɔmmɔ úkpi aani kalɛ na Unwoti ɔ́su Elia ka ɔsu-nwu. Na ka Ahasia uuubo ubi ɔnanabi ɔsu ni, Yehoram úti-nwu keliekɔ aani ɔga kalɛ, na lɛkwa linyɔdi lɛni na Yudaƒuɔ Ɔga Yehosaƒat ubidi Yehoram ɔɔdi lɛga.

¹⁸Na ala ani nálɛku Ɔga Ahasia ku ala bamba ani na ɔ́bla ni, bénweni-nya bákya Israelƒuɔ baga lɛlɔ kɔtɛ ɔku kemmo.