Read Lelemi Baga 2 10 Bible Online

Baga 2 10 - Lelemi bible

Baga 2 10

¹Na Ahab kaba bekyuli bani beli Samaria badubɔbla aani liti ku aavlanyɔ. Ɔmmɔ ɔsu Yehu únweni kakunkɛ na úti úmene Samaria benengu ku Ahab bebi lɛlɔ banune ɔnini,

²“Ngyi ka bina ati bebi beli-mii kudɔ mmɔ. Na bɛkya ɔma ɔni na bátu awodu bámana kemmo. Na bibo bapɔnkɔ ku bapɔnkɔ kɛɛkɛ ku ekpola lɛnɔ. Ala ani na bibo mɛni ɔsu ni, si kakunkɛ kamɛni kánya kétuku-mii kɔnu,

³na bidie bina ati ubidi ɔbunidi ƒui ɔni lɛlɔ mbo ɔbu na biti-nwu bise ɔti liboku lɛlɔ. Ɔmmɔ kama na bikpo kekpo bite-nwu na kaduli kammɔ kenye kpakplaa.”

⁴Amu ka kakunkɛ kammɔ kéduo-ma enu kemmo ni, liƒu lɛ́da-ma na básu banini, “Si baga inyɔ bátakana búnye bɔ́siaku Yehu ni, dɛ na abu bɔdubɔkana?”

⁵Ɔmmɔ ɔsu ɔga kaduli lɛlɔ ɔnune ku aban ɔgadine na ɔma unengudi ɔmmɔ kemmo ku bebi bammɔ lɛlɔ banune básala lɛlɔ na básia Yehu kenye banini, “Ƒula kabla bablane na bɔdi na lɛla biala na ásu-bu ni, ani na bɔdubo bɔbla. Bɔɔɔdubo ɔga ɔdi buse. Awɔ bla lɛla biala na ánu ka lɛ́manku.”

⁶Amu na Yehu ɔ́sɔ únweni kakunkɛ kabambadi ɔnini, “Si bínye-mi kama na bɛdubɔbla lɛla biala na lɛ́su-mii bɔdi ni, na bɛgyi bɛnii ɔlɛka bikulo bagabi bammɔ ƒui eli na biti-nya biboku-mi mɛni na Yesreel kɔnaadi ɔƒaalɛ bene.” Na Ɔga Ahab bebi liti ku aavlanyɔ bammɔ ni, Samaria ɔma batɔnkune kudɔ mmɔ na bakya na baanyuɛ-ma.

⁷Uwi ɔni na Yehu kakunkɛ kébeduo Samaria ɔma batɔnkune bammɔ kudɔ ni, batɔnkune bammɔ bádu bagabi liti ku aavlanyɔ bammɔ ƒui. Na béti-ma eli bákya kɔgyigyɛ kemmo bésienku Yehu na Yesreel.

⁸Uwi ɔni na bana ɔtalane ɔmmɔ úsie Yehu kudɔ ni, útásu-nwu ɔnini, “Béeti bagabi bammɔ eli béboku.” Amu na Yehu úbo ɔda ɔnini, “Biti eli ammɔ na bitátɛ-nya bise ɔma ɔmmɔ awodu kayakun kenye na esu anyɔ kemmo utédu kadi bugye.”

⁹Amu na kadi kegye ɔtanta ni, Yehu úsie úténye kayakun kammɔ na kadi ƒui anumi na ɔ́su bekyuli bani nnye mmɔ ɔnini, “Amii ni, lɛla lɛdi lɛɛɛda-mii. Ami ku badi nényimi na mina ati Ɔga Yoram lɛlɔ na bɔ́du-nwu. Nsu bani na bewi mɛni ƒui ama ni, ɔma nádu-ma?

¹⁰Ɔbla-mii nwaa ka ni, lɛla biala na Unwoti ɔ́su ɔ́siku Ahab kaba bekyuli lɛlɔ ni, ɔlɛka libo-nwu kemmo. Na Unwoti ɔ́bla lɛla lɛni na ɔkɛnku nwuna Kenye Udiene Elia lɛlɔ ɔ́su úse.”

¹¹Ɔmmɔ ɔsu ni, Yehu ɔ́du Ahab lɛlɔ bekyuli bakladi bani nli Yesreel ku nwuna batɔnkune ku nwuna bakpana geen ku bakpane lɛnɔ ɔni na ina unwi muedi útebu.

¹²Amu na Yehu ɔ́ta Yesreel na úsela Samaria. Ka útédu ketu kani baalɔ banii Bet-Eked na kesii kani baalɔ banii Baƒonu Lɛlɔ Banune Kakyakɔ ni,

¹³mmɔ na ɔ́siaku Yudaƒuɔ ɔga ɔkukudi Ahasia lɛlɔ bekyuli badi. Amu na Yehu úye-ma ɔnini, “Ɔma bene na bɛdi?” Amu na bekyuli bammɔ bédie kenye banini, “Bɔdi Ɔga Ahasia lɛlɔ bekyuli. Na búsela Yesreel butánu Ɔga Uleku Isebel bebi ku bekyuli bakladi bani nkya ɔga kaduli mmɔ na bɔnu kalɛ na bakya.”

¹⁴Amu na Yehu ɔ́su nwuna bekyuli ɔnini, “Biƒie-ma enu ku enu.” Anwuɔsu béƒie-ma na bákpanku-ma bésienku Bet-Eked libiɔ kɔtu na bátádu bana nkyuli aavlene-inyɔ na mmɔ ɔni na útaya na ɔdi ubu.

¹⁵Ka ɔ́tɔlɔ mmɔ úsela ni, útásiaku Rekab ubidi ɔni baalɔ-nwu banii Yehonadab. Na Yehu ɔ́kya-nwu kenye ɔnini, “Aabu ka ami ku-ɔ bɔdi benwi aani kalɛ ami mɔɔkali?” Amu na Yehonadab údie kenye ɔnini, “Ɛɛn, bɔdi benwi geen.” Amu na Yehu ɔ́su-nwu ɔnini, “Si use lɛni bɔdi na ete-mi kɔnu.” Amu na béte lɛlɔ enu. Na Yehu úbunku-nwu na ɔ́kɔ úduo nwuna ɔpɔnkɔ kɛɛkɛ kemmo.

¹⁶Na Yehu ɔ́su-nwu ɔnini, “Siaku-mi na awɔ ɔlati anu ku ƒula anumi kalɛ na mbo kogyoklo nte Unwoti kabla.” Amu na bana inyɔ ƒui bélie ɔpɔnkɔ kɛɛkɛ ɔmmɔ bésie Samaria.

¹⁷Ka bétéduo ni, Yehu ɔ́du Ahab lɛlɔ bekyuli ƒui na útanu ina unwi kɔnyana. Ɔsika lɛni na Unwoti ɔ́su Elia ka ɔdubɔlɛ.

¹⁸Ɔmmɔ kama ni, ɔ́lɔ Samaria bekyuli ƒui ɔ́sala na ɔ́su-ma ɔnini, “Kabla blii kadi kani na Ɔga Ahab ɔ́bla úte Baal baƒiɔ. Na ami ndubɔbla kabla kenengudi lite-nwu.

¹⁹Anwuɔsu ni, bɛlɔ Baal kenye bediene ƒui ku nwuna bakpane ku benengu ƒui bɛsala na ɔdi utada lɛlɔ utedie-nwu kemmo, ɔsika ndubo akpala bonwu adi bɔbla bute Baal. Na ɔkpane biala ɔni mada lɛlɔ medie-nwu kemmo ndubɔya badu-nwu.” Ɔmɛni ɔdi kakwɛ kani na Yehu ɔ́bla kalɛ na ɔkɛ Baal bakpane ƒui ɔdu.

²⁰Ɔmmɔ kama ni, Yehu úbo ɔda ɔnini, “Bise limeyi na bula ƒui bubo bubadi limeyi na bɔkya lili kalɔ bute Baal.” Anwuɔsu bése limeyi sɔsɔ.

²¹Na Yehu úti kenye úmene Israel kalɔ lɛlɔ ƒui ka bani ƒui mɔɔkpá Baal bebo, na ina unwi utebu. Na bétéduo Baal kakpakɔ ɔtɔ ɔmmɔ kemmo na bakpane bammɔ béyii ɔtɔ ɔmmɔ kemmo ku atu ku atu.

²²Amu Yehu úbo ɔkpane ɔni mɔɔnú bakpane lɛwu kesekɔ lɛlɔ ɔda ɔnii udie bakpane lɛwu na uti ute bakpane bammɔ.

²³Ɔmmɔ kama Yehu ɔlati ku Rekab ubidi Yehonadab bétéduo kakpakɔ kammɔ kemmo. Mmɔ na Yehu ɔ́su bekyuli bani nkya ɔtɔ ɔmmɔ kemmo ɔnini, “Bɛsia anu na bɛnu kaduɛ ka Baal bakpane lɛti nkya ɔtɔ ɔmɛni kemmo. Na Unwoti ɔkpane biala uuubunku-ma akɔ.”

²⁴Ɔmmɔ kama ni, Yehu ku Yehonadab bétéduo ɔtɔ ɔmmɔ kemmo na bábla akpala ku bɔkyula akpala béte Baal. Na údie bekyuli liti ku avlaatɛ na bénye kakpakɔ kammɔ kama kakɛ. Na úbo-ma ɔda ɔmɛni ɔnini, “Ɔlɛka bɛdu bekyuli bani ƒui bakya ɔtɔ ɔmmɔ kemmo. Na ukyuli ɔni manyonu ɔdi na wekeli ɔdubuti nwuna ngba ɔƒɔ kayu.”

²⁵Ka Yehu ɔ́bla nwuna akpala ɔ́wɔlɔ kani na ɔ́su bekyuli bani nkya baagyumana ɔtɔ ɔmmɔ ɔnini, “Biduo na bitádu-ma ƒui na bitaya na ɔdi ukeli.” Amu na bekyuli bammɔ bétéduo ɔtɔ ɔmmɔ kemmo na bákpa bana atula na bádu-ma ƒui kede kede, na bákpɛ-ma bálɛku ɔtɔ ɔmmɔ kemmo bébewi keyi. Na básɔ bétéduo kakpakɔ kammɔ katɔma,

²⁶na bátágyu Baal baƒiɔ lɛtabi kedee lɛmmɔ bálɛku bábakyula.

²⁷Anwuɔsu bábwɛ Baal lɛtabi kedee lɛmmɔ na báƒɛ Baal kakpakɔ kammɔ ƒui béwi kalɔ, na béti mmɔ bénwini kuvodɔ kesiekɔ.

²⁸Na lɛni na Yehu ɔ́bla na ɔ́da Baal lɛƒiɔkpa údie Israel kalɔ lɛlɔ.

²⁹Nsu ɔ́siaku Nebat ubidi Ɔga Yerobeam likpidi kama na ɔ́kpanku Israelƒuɔ na bésie bakya baakpá ɔmantɛ akɔ ɔni bávɔ bálɛ na Betel na Dan kalɛkɛ lɛlɔ.

³⁰Na Unwoti ɔ́su Yehu ɔnini, “Ka ábla ásiaku lɛla lɛni na lɛ́su-ɔ nnii, ‘Bla Ahab kaba bekyuli lɛlɔ’ ɔsu na líse-ɔ kenye ka ɔ́si ƒula kaba kedeedi útédu kenedi lɛlɔ ni, badubɔdi lɛga na Israel.”

³¹Nsu Yehu úteti nwuna kayi ƒui útasia Unwoti ɔni ndi Israelƒuɔ ɔti ɔda bubo lɛlɔ. Mmomu ɔ́siaku Yerobeam ɔbladu kama na ɔ́kpanku Israelƒuɔ útákya likpidi kemmo.

³²Uwi ɔmmɔ kemmo ni, Unwoti úse kalɔ ɔɔyá na Israel kalɔ kaaƒana. Na Siriaƒuɔ Ɔga Hasael úkpo ɔ́di lɛlɔ na Israel kɔlɛkɛ kɔmmɔ ƒui kemmo,

³³ɔ́si Yordan ɔƒɛ katukɔ na Gilead kalɔ kemmo ɔkɛ Gad ku Ruben ku Manase kɔlɛkɛ kunengudi kemmo, ɔ́si Aroer ɔma na ɔkɛ Arnon Ketudɔ na ɔ́sia ɔ́vi Gilead útédu Basan.

³⁴Na ala bamba ani na Yehu ɔ́bla ku nwuna kayi kani na úse ni, bénweni-nya bákya Israelƒuɔ baga lɛlɔ kɔtɛ ɔku kemmo.

³⁵Na Yehu úkpi na báva-nwu na Samaria. Na ubidi Yehoahas úti-nwu keliekɔ aani ɔga kalɛ.

³⁶Na Yehu ɔ́di lɛga na Israel akwa aavlanyɔ-maane.