Read Lelemi Baga 2 12 Bible Online

Baga 2 12 - Lelemi bible

Baga 2 12

¹Na lɛkwa maatɛdi kemmo ɔni na Ɔga Yehu ɔɔdi lɛga na Israel ni, bése Yoas Yudaƒuɔ ɔga. Na ɔ́di lɛga lɛmmɔ na Yerusalem akwa aavlene, na uni baalɔ banii Sibia na ɔ́si Beer-Seba.

²Na Yoas ɔ́bla lɛla lɛni na lɛ́yɔ Unwoti kaƒɔ akwa ani ƒui na ɔkpane Yehoiada útaalɛ-nwu mmɔ kemmo.

³Nsu Yoas útegyingya aƒiodu ani na bátu bálɛ abi eli mmɔ. Anwuɔsu bekyuli bammɔ bésie anumi na baabla bana akpala na baakyula oloƒui na mmɔ.

⁴Limeyi lɛdi ni, Yoas ɔ́lɔ bakpane bammɔ ƒui ɔ́sala na úbo-ma ɔda ɔnini, “Egulabi ani na beeyi na Unwoti kakpakɔ ku ani na bekyuli beeboku aani etela kedee ku kenye buse etela ku kaƒɔ ƒaa etela ni, bɛsala egulabi ammɔ ƒui lisu.

⁵Na ɔkpane biala ɔƒɔ egulabi ammɔ ɔsiku egulabi kusekɔ kɔmmɔ kudɔ na beti baklibi Unwoti kakpakɔ kammɔ kesii biala na bɛ́nu ka kébie.”

⁶Nsu úti útédu akwa aavlanyɔ-lɛtɛdi lɛlɔ na Yoas lɛga bɔdi kemmo ni, bakpane bammɔ bátaklibi lɛla biala tɔ na kakpakɔ kammɔ kemmo.

⁷Anwuɔsu Ɔga Yoas ɔ́lɔ ɔkpane Yehoiada ku bakpane badi úbunku lɛlɔ na úye-ma ɔnini, “Bi ɔsu na biláklibi kakpakɔ ala ani na ébie mmɔ? Ɔ́si ɔmmɔ ɔsu, bɛsɔ bɛɛɛdubo kakpakɔ egulabi bɔda. Ɔlɛka bɛnyonu-nya bite na bataaklibi ala ani na ébie na kakpakɔ mmɔ.”

⁸Amu na bakpane bammɔ bénu kalɔ ka basɔ balada egulabi ammɔ, na ɔɔɔdi ama alati lɛnɔ ndubɔklibi kakpakɔ kammɔ.

⁹Ɔmmɔ kama ni, Yehoiada ɔ́bla egulabi kakyakɔ kadi na ɔ́ƒuala-ka katɔ údie liƒi lɛdi. Na úti adaka ɔmmɔ útálɛ kakpakɔ kammɔ kemmo kɔdianu kakɛ si eeduo ɔtɔ kemmo na ude lɛkpabi lɛmmɔ. Na ɔkpane ɔni mɔɔgyumana kakpakɔ kammɔ kayakun uuti egulabi ani na bekyuli bammɔ beeyi taakya-nwu kemmo.

¹⁰Na uwi biala na egulabi ani baakya adaka ɔmmɔ kemmo éyi ni, ɔga ɔku unwenine ku ɔkpane unengudi ƒui beebo na baka egulabi ani ƒui na bekyuli béti béboku Unwoti kakpakɔ mmɔ ƒui na bewilimi bewi aƒo kemmo.

¹¹Na si bénweni lɛla lɛni bákɛ bákya ɔku kemmo báwɔlɔ ni, na beti egulabi ammɔ bete bekyuli bani na bálɛ anumi béte kakpakɔ bɔklibi kabla kammɔ lɛlɔ bɔnu. Na anwu na beeti taaƒɔ kabla bablane bammɔ kayu aani ligyii banwine ku ɔtɔ batune

¹²ku bani mɔɔlɛ atabi ku bani mɔɔnwí atabi ammɔ. Egulabi ammɔ adi na beeti teeye egyii ku atabi anwidi ani na baakya ɔtɔ bɔdia bete kakpakɔ kammɔ bɔklibi ku kayu bamba biala na kadanku ɔtɔ ɔmmɔ.

¹³Na egulabi ani ƒui na beeboku kakpakɔ mmɔ ni, beléti-nwu taabla kakpakɔ kemmo kabla lɛlɔ ala adi biala aani sika ɔƒualadi akyami bonwu iye asogya bɔklibi lɛlɔ ala iye lɛsii lɛni kemmo na beewi ntu taakuna teewi bekyuli iye kɔkpɛɛ iye sika ugyiedi iye ɔƒualadi kakpakɔ kemmo kabla lɛlɔ ala adi,

¹⁴mmomu bada baaƒɔ kabla bablane bani mɔɔklibi kakpakɔ kammɔ kayu.

¹⁵Na kalɛ na bekyuli bani mɔɔnu kabla kammɔ lɛlɔ baabla ala ammɔ siin na baaƒɔ kabla bablane kayu ulu lɛlɔ ɔsu ni, basɔ baláblaku-ma akunta adi.

¹⁶Na egulabi ani na baakɛ́ taasiku bɔƒiɔ ku ekpidi lili buvele atela ani na bekyuli beeboku ni, beléboku-nya Unwoti kakpakɔ mmɔ beeti-nya teete bakpane, ɔsika ama ɔdi na ɔdi.

¹⁷Uwi ɔmmɔ kemmo ni, Siriaƒuɔ Ɔga Hasael úkpoku Gatƒuɔ na ɔ́di-ma lɛlɔ. Na ɔ́bla kasusu ka utékpoku Yerusalemƒuɔ lɛnɔ.

¹⁸Amu na Yudaƒuɔ Ɔga Yoas ɔ́buma kakpakɔ ala kedee ani na nwuna baga bani nélie bávi bani ndi Yehosaƒat ku Yoram ku Ahasia bábla bése ƒui, na bédie-nya sɛsɛɛ bése béte Unwoti mmɔ, ku ala ani na anwu ɔlati údie úse sɛsɛɛ úse úte Unwoti, ku sika ugyiedi ɔni nkya kakpakɔ kavumii ku ɔga kesii kavumii kemmo, na úti ala ammɔ ƒui úmene Siriaƒuɔ Ɔga Hasael asa na ɔ́kpanku nwuna bekpone ƒui ɔ́lɛku Yerusalem na bátɔlɔ.

¹⁹Na ala bamba ani na Ɔga Yoas ɔ́bla bénweni-nya bákya Yudaƒuɔ baga lɛlɔ kɔtɛ ɔku kemmo.

²⁰Na ɔga bakutine bása lili likpidi na nwuna lɛlɔ na bádu-nwu na Bet-Milo na ulu ɔni ntɛ úsela Sila.

²¹Na nwuna bakutine bani nádu-nwu mmɔ ndi Simeat ubidi Yosakar ku Somer ubidi Yosabad. Na úkpi na báva-nwu na ɔti Dawid ɔma unengudi. Na ubidi Amasia úti-nwu keliekɔ aani ɔga kalɛ.