Read Lelemi Baga 2 14 Bible Online

Baga 2 14 - Lelemi bible

Baga 2 14

¹Na Yehoahas ubidi Yehoas lɛga bɔdi lɛkwa linyɔdi kemmo na Israel ni, bése Yoas ubidi Amasia lɛnɔ lɛga na Yuda.

²Na ɔ́kɛ akwa aavlanyɔ-ɛlɔ asa na úse kalɔ ɔɔdi lɛga. Na ɔ́di lɛga lɛmmɔ na Yerusalem akwa aavlanyɔ-yaalenwi. Na uni baalɔ Yoadin na ɔ́si Yerusalem.

³Na ɔ́bla ala na áƒɔ Unwoti anu, nsu ɔɔɔdi aani nwuna ɔti kuuku Ɔga Dawid kalɛ. Mmomu ɔ́siaku ɔti Yoas ɔbladu kama.

⁴Ɔsika útaƒɛ aƒiodu ammɔ akpabi útewi kalɔ. Na bakpane bammɔ bésie anumi na baabla akpala na baakyula oloƒui na mmɔ.

⁵Uwi ɔni na Amasia úbakɛ ɔyikun na nwuna lɛga bɔdi lɛlɔ ni, ɔ́du bakutine bani ƒui nádu ɔti uwi ɔni na ɔɔdi lɛga.

⁶Nsu útadu bana bebi ama. Mmomu ɔ́siaku Unwoti ɔda ɔni na úbo ɔ́siaku Mose lɛlɔ na kesii kani na ɔ́su ɔnini, “Útalɛ ka badu ubi ɔti ɔdi na ubidi likpidi lɛni na ɔ́bla ɔsu iye badu ubi ɔdi na ɔti likpidi lɛni na ɔ́bla ɔsu. Mmomu ɔdi biala námanku ka badu-nwu ni, anwu ɔlati likpidi lɛni na ɔ́bla lili na badubɔdu-nwu.”

⁷Ɔmmɔ kama ni, Amasia ɔ́du Moabƒuɔ bekpone mpim leevu (10,000) na Mma Kɔwɛ kemmo. Na úkpo ɔ́ƒɔ ɔma unengudi ɔni baalɔ-nwu Sela. Na ɔ́vumana lɛnyi lɛmmɔ ɔ́sia ɔnii Yokteel na lɛni baalɔ mmɔ úbedu ɔmwi.

⁸Ɔmmɔ kama ni, Ɔga Amasia ɔ́tala bekyuli ɔ́kya Ɔga Yehoas ɔni ɔti ndi Yehoahas ɔni ɔti ndi Yehu ku kenye kamɛni ɔnini, “Si adi ɔnaabi ni, na ebo bɔsa anumi ku anumi.”

⁹Nsu Israelƒuɔ Ɔga Yehoas ɔ́sia Yudaƒuɔ Ɔga Amasia kenye ɔnini, “Limeyi lɛdi ni, lɛnyɛ lɛdi na Lebanon lɛku kemmo líti kenye límene sida kugyii ɔnini, ‘Ti ƒula ubidi ulekubi te-mi lite mina ubidi na uti.’ Amu na ebuo ubendi ɔdi úbavi na ɔ́nya lɛnyɛ alakpi ammɔ ɔ́mana kalɔ.

¹⁰Sɔsɔ na ɔdi ka ékpo ádi Edomƒuɔ lɛlɔ, na ɔmmɔ ɔsu na aakun lɛmɛnɛ. Ya ƒula lɛlɔ bɔdi buteekeye na ƒula lɛgba akɔ kani, na asɔ elie ƒula ɔma kpoo! Bi ɔsu na atáwia lɛsɛ eboku Yuda kalɔ kemodi bekyuli na awɔ ɔlati ɔmmɔ lɛnɔ ebo kalɔ?”

¹¹Nsu ɔmɛni ƒui kama ni, Ɔga Amasia ulenu kalɔ. Ɔmmɔ ɔsu, Ɔga Yehoas úti nwuna bekpone na bétékpoku Amasia na Bet-Semes na Yuda.

¹²Na bádi Amasia bekpone lɛlɔ na bekpone bammɔ békeli bésie bana kɔduli.

¹³Israel Ɔga Yehoas úƒie Yudaƒuɔ Ɔga Amasia ɔni ɔti ndi Yoas ɔni ɔti ndi Ahasia na Bet-Semes. Ɔmmɔ kama Yehoas úsie Yerusalem útáƒɛ kowodu kɔni nlɛ ɔ́si Eƒraim kayakun útédu kowodu likpo kayakun. Na ntɛ mmɔ bune bɔdubɔbla aani lɛgba bɔka eti leevu-anyɔ (600).

¹⁴Na ɔ́buma sika ɔƒualadi ku ugyiedi ɔmmɔ ƒui, na úduo Unwoti kakpakɔ útábuma ala ani ƒui na ɔ́nu na mmɔ ku ɔga kaduli egulabi kesekɔ. Na úƒie bekyuli bammɔ badi lɛnɔ ɔ́tɔlɔku úsienku Samaria.

¹⁵Na ala bamba ani ƒui na Yehoas ɔ́bla ku kɔsia kɔni nálɛ-nwu kemmo ku kekpo kani na anwu ku Yudaƒuɔ Ɔga Amasia békpo ni, bénweni-nya bákya Israelƒuɔ baga lɛlɔ kɔtɛ ɔku kemmo.

¹⁶Na Yehoas úkpi na báva-nwu na Samaria baga kavakɔ na ubidi Yerobeam úti-nwu keliekɔ aani ɔga kalɛ.

¹⁷Na Yudaƒuɔ Ɔga Amasia úlie akwa leevu-alɔ na Israelƒuɔ Ɔga Yehoas ɔni ɔti ndi Yehoahas kukpi kama.

¹⁸Na ala ani ƒui, na Ɔga Amasia ɔ́bla ni, bénweni-nya bákya Yudaƒuɔ baga lɛlɔ kɔtɛ ɔku kemmo.

¹⁹Uwi ɔdi úbebo na Yerusalem ka bekyuli badi baawia Ɔga Amasia badu. Anwuɔsu úkeli útábɛ ɔma ɔni baalɔ banii Lakis kemmo. Nsu nwuna bekisine bammɔ báwia-nwu kama ulu na bátádu-nwu na mmɔ.

²⁰Béti nwuna ukpine básia ɔpɔnkɔ lɛlɔ béboku Yerusalem na bátáva-nwu na Dawid ɔma unengudi baga kavakɔ.

²¹Na Yudaƒuɔ béti ubidi Asaria ɔni náakɛ akwa leevu-aku bése lɛga.

²²Anwu násɔku Elat ɔma ɔ́tu na ɔ́sɔ únwini Yudaƒuɔ ɔma uwi ɔni na Ɔga Amasia úkpi úsie nwuna bati kudɔ.

²³Na lɛkwa leevu-lɛlɔndi kemmo ɔni na Amasia, Yudaƒuɔ Ɔga Yoas ubidi, ɔɔdi lɛga ni, bése Yehoas ubidi Yerobeam lɛga na Israel, na ɔ́di lɛga lɛmmɔ na Samaria akwa aavlene-unwi.

²⁴Ɔ́bla likpidi na Unwoti anumi, ɔsika ɔ́siaku Nebat ubidi Yerobeam ɔbladu kama na útenwini kama útakya ekpidi ammɔ, na ɔ́kpanku Israelƒuɔ lɛnɔ útákya likpidi lɛmmɔ kemmo.

²⁵Anwu nékpo ɔ́sɔku Israel lɛmii lɛmmɔ ƒui úse kalɛ na líse kuuku ɔ́si Hamat útédu Araba Ɛpu kenye. Na ɔmɛni ndi lɛla lɛni na Unwoti úse kenye ɔ́siaku nwuna kabla ɔblane Amitai ubidi Yona ɔni nási Gat-Heƒer lɛlɔ.

²⁶Unwoti ɔ́nu lɛbibo libendi lɛni kemmo na Israelƒuɔ ƒui ku bana kabla bablane bákya, nsu ukyuli ɔdi uuubo na ute-ma kebunku.

²⁷Na ka Unwoti útasu ka wayila Israelƒuɔ ƒui udu kede kedee ɔsu ni, údie-ma ɔ́lɛku lɛbibo lɛmmɔ kemmo ɔ́siaku Ɔga Yerobeam ɔni ndi Yehoas ubidi lɛlɔ.

²⁸Na Yerobeam ɔ́bla ala bamba ani nálɛ kɔsia na nwuna kekpo ku kayi kani na úse na kekpo kemmo. Úkpo ɔ́ƒɔ Damasko ku Hamat lɛma ɔ́sɔku úboku Israel kalɔ kemmo. Na bénweni-nya bákya Israelƒuɔ baga lɛlɔ kɔtɛ ɔku kemmo.

²⁹Yerobeam úkpi na báva-nwu na Israelƒuɔ baga kavakɔ. Na ubidi Sakaria úti-nwu keliekɔ aani ɔga kalɛ.