Read Lelemi Baga 2 16 Bible Online

Baga 2 16 - Lelemi bible

Baga 2 16

¹Na lɛkwa leevu-maatɛdi lɛni na Remalia ubidi Peka ɔɔdi lɛga na Israel ni, bése Yotam ubidi Ahas lɛga na Yuda.

²Na ɔ́ɔkɛ akwa aavlanyɔ asa na únwini ɔga. Na Yerusalem na úlie ɔ́di lɛga lɛmmɔ akwa leevu-akun. Na útasiaku nwuna ɔti kuuku Dawid ɔbladu ɔbuni ɔmmɔ kama. Mmomu ɔ́bla ala ani nátaƒɔ Unwoti ɔni ndi nwuna Katɔti anu.

³Na ɔ́siaku Israelƒuɔ baga bedeedi ɔbladu ukpidi kama na úti ubidi muedi ɔ́kyula ɔ́kpa úte baƒiɔ, na ɔkɛ ɔsiaku kadi bekyuli bekpidi bani na Unwoti ɔ́bɔku ɔ́lɛku-ma anumi mmɔ ɔbladu kama.

⁴Na ɔkɛ abi ƒui eli ku egyii enengudi ɔyuli kalɔ ɔɔbla akpala na ɔɔkyula oloƒui.

⁵Amu na Siriaƒuɔ Ɔga Resin ku Israelƒuɔ Ɔga Peka básala na békpoku Yerusalem. Na báka Ahas bákya, nsu bátakana-nwu lɛlɔ bɔdi.

⁶Na uwi ɔmmɔ kemmo ni, Edomƒuɔ ɔga ɔ́sɔ úkpo ɔ́ƒɔ Elat ɔma. Na ɔ́bɔku Yudaƒuɔ bani ƒui nli mmɔ. Na Edomƒuɔ bénwini béduo kalɔ kammɔ kemmo na bamu beli mmɔ úbedu ɔmwi kadi.

⁷Ɔmmɔ kama ni, Ahas ɔ́tala batu ɔ́kya Asiriaƒuɔ Ɔga Tiglat-Pileser ku kenye kamɛni ɔnini, “Ƒula ubi kabla ɔblane na ndi. Bo, na ebekpo aƒɔ-mi alɛku Siriaƒuɔ ɔga ku Israelƒuɔ ɔga enu kemmo.”

⁸Na Ahas úti sika ɔƒualadi ku ugyiedi ɔni nse kakpakɔ ku ɔga kavumii úbunku ka beti betéte Siriaƒuɔ ɔga ɔmmɔ.

⁹Na ka Asiriaƒuɔ ɔga únu litemi lɛmɛni ni, útiku nwuna bekpone na bétékpoku Damaskoƒuɔ. Na bádu Ɔga Resin. Na béti bekyuli bakladi bammɔ bésienku Kir, batɔntɛne kalɛ.

¹⁰Ka Ɔga Ahas úsie Damasko útásiaku Asiriaƒuɔ Ɔga Tiglat-Pileser na Damasko ni, ɔ́nu lɛkpabi lɛdi na mmɔ. Na ɔ́ta kalɛ na béti bátu-ni úmene ɔkpane Uria na ɔ́su-nwu ka ɔtu lɛkpabi lɛmmɔ udu pɛpɛɛpɛ ute-nwu.

¹¹Anwuɔsu Uria lɛnɔ ɔ́tu lɛkpabi lɛmmɔ kalɛ kani na báta-ni mmɔ.

¹²Na ka Ahas ɔ́si Damasko úbeduo ni, ɔ́nu ka báatu lɛkpabi lɛmmɔ báwɔlɔ.

¹³Ɔmmɔ ɔsu ɔ́bla bɔkyula akpala ku edula akpala na lɛkpabi lɛmmɔ lɛlɔ. Na úti ntɛ ɔ́bla akpala, na unwi bɔbla akpala ani na ɔ́bla ni, úti ubugya ɔmmɔ ɔ́kuna úwi lɛkpabi lɛmmɔ lɛlɔ.

¹⁴Na abualagyie lɛkpabi lɛni nnye Unwoti anumi mmɔ ni, Ahas ɔ́gyu lɛkpabi lɛmmɔ útálɛ katɔ kakɛ.

¹⁵Na úbo Uria ɔda ɔnini, “Awɔ ti mina lɛkpabi libendi lɛni na lɛ́tu mmɔ na ataabla ɔtanta bɔkyula akpala ku useyi uwi edula akpala. Na ɔga ku bekyuli bammɔ bɔkyula ku edula akpala ku ntɛ akpala anya ni, bɛƒɔ bebuo bani ƒui béti bákpa mmɔ ubugya bɛkuna biwi lɛkpabi lɛmmɔ lɛlɔ. Nsu abualagyie lɛkpabi lɛmmɔ ani ni, da-ni se-mi na nteebo like nwuna lɛlɔ.”

¹⁶Na Uria ɔ́bla aani kalɛ kani ɔga úbo-nwu ɔda.

¹⁷Na Ɔga Ahas ɔ́lɛmi adaka ɔni nlɛ kakpakɔ mmɔ. Na údie akyami ani nkya-nwu kemmo. Na ɔ́sɔ ɔ́timi ntu kewikɔ bonwu kani nsia abualagyie ɔmantɛ bakɔ bani na bávɔ bálɛ mmɔ básia atabi adi lɛlɔ.

¹⁸Na ɔga keliekɔ kani na bátu na Unwoti kakpakɔ kemmo ni, Ahas ɔ́gyingya-ka na úbimi likpɔtɔ lɛni mbi mmɔ. Na ɔ́kalɛ kayakun kani na ɔga lɛti ɔɔsia teeduo kakpakɔ mmɔ kalɛ na kaƒɔ kayɔ Asiriaƒuɔ ɔga.

¹⁹Na ala bamba ani na Ɔga Ahas ɔ́bla ni, bénweni-nya bákya Yudaƒuɔ baga lɛlɔ kɔtɛ ɔku kemmo.

²⁰Na Ahas úkpi na báva-nwu na Dawid ɔma unengudi baga kavakɔ, na ubidi ɔni baalɔ Hesekia úti-nwu keliekɔ aani ɔga kalɛ.