Read Lelemi Baga 2 19 Bible Online

Baga 2 19 - Lelemi bible

Baga 2 19

¹Uwi ɔni na Hesekia ɔnya únu bekyuli bammɔ kenye kani na ɔ́ni nwuna adala ɔ́duli na lɛƒɛda kemmo, na úti adikpi ɔ́da lɛlɔ na ɔ́tɔlɔ úsie Unwoti kakpakɔ.

²Na ɔ́tala Eliakim ɔni mɔɔnu ɔga kaduli lɛlɔ ku Sebna ɔni ndi ɔku unwenine ku bakpane benengudi ɔ́kya Amos ubidi Kenye Udiene Yesaia na bana ƒui benyimi adikpi.

³Na bátásu-nwu banini, “Lɛni na Hesekia ɔɔsu, ɔmwi limeyi lɛdi kɔnyana limeyi geen lɛni na bédumi-bu na bákya-bu kɔƒa. Na buse aani uleku ɔni na kawɔƒɔ kaadu-nwu, nsu ulákana bɔwɔ ka ɔyikun ɔ́sa-nwu ɔsu.

⁴Na ɔƒɛni kalɛ Unwoti ƒula Katɔti únu ala ani na Asiriaƒuɔ ɔga ɔ́tala nwuna bekpone benengu na bábasu-bu na bédumi Katɔti ɔni na uli ngba. Na muuvele nnii ƒula Unwoti Katɔti unu edumi ammɔ na ɔni bani nédumi-nwu mmɔ kɔtu. Anwuɔsu kpali Katɔti na evele ete bula bekyuli ku abu bani nli ngba.”

⁵Uwi ɔni na Yesaia únu Ɔga Hesekia kenye kammɔ ni,

⁶ɔ́su-ma ɔnini, “Bɛsu bina ati bɛnini, ‘Unwoti ɔnii taya na lɛla lɛni na básu-ɔ mmɔ lɛkya-a liƒu. Na tayia lɛla lɛni na Asiria ɔga kalɔ bakyane bammɔ básu béti bédumi-mi.

⁷Unwoti ɔdubɔya na Asiriaƒuɔ ɔga ɔmmɔ unu etemila adi ɔsiku nwuna ɔma na ɔmmɔ ɔdubɔya na unwini usie mmɔ. Na si útéduo ni, Unwoti ɔdubɔya na badu-nwu na mmɔ.’ ”

⁸Uwi ɔni na Asiriaƒuɔ benengu bammɔ bénu ka bana ɔga ɔ́tɔlɔ Lakis na úsie ɔ́kya Libna amadɔ uukpó ni, úsie mmɔ na útánu-nwu.

⁹Na uwi ɔmmɔ kemmo ni, kenye kédu Asiriaƒuɔ Ɔga Sanaherib ka Egyipteƒuɔ bekpone báklibi lɛlɔ na bana Ɔga Tirhaka ɔ́tɔnku-ma ka bébekpoku-ma. Anwuɔsu ɔ́sɔ ɔ́tala batu ɔ́kya Yudaƒuɔ Ɔga Hesekia ɔnini,

¹⁰“Bɛsu Hesekia bɛnini, ‘Kayi katatɔlɔ-ɔ. Taƒɔ Katɔti tadi si ɔ́su-ɔ ɔnii Asiriaƒuɔ ɔga ulakana Yerusalem bɔƒɔ.’

¹¹Ngyi nwaa ka énu kalɛ na Asiriaƒuɔ ɔga ɔ́bla kɔlɔ kɔni na amadɔ ƒui ku kalɛ na ɔ́yila-ku udu kede kede. Na aabu ka awɔ adubɔkana na alɛ-mi enu kemmo?

¹²Na mina bati kuuku báyila Gosan ku Haran ku Reseƒ na báyila bana lɛma udu. Na bádu bekyuli bani nli Eden na Telasar. Nsu bana baƒiɔ badi biala bátakana-ma bukpo bɔ́ƒɔ.

¹³Na wɛ na Hamat ku Arpad ku Seƒarwaim ku Hena ku Iwa baga bakya ɔmwi?”

¹⁴Ɔga Hesekia ɔ́ƒɔ kakunkɛ kamɛni ɔ́siku batalane bammɔ kudɔ na ɔ́ka. Ɔmmɔ kama ni, úti ɔku ɔmmɔ ɔ́da na útégyingya-nwu úwi Unwoti anumi na nwuna kakpakɔ.

¹⁵Na ɔ́kpali Unwoti ɔ́su ɔnini, “O Unwoti, ɔni ndi Israelƒuɔ Katɔti, awɔ nli ƒula lɛgaboku lɛlɔ na katɔ katɔ na kesii kani na Kerub ngba bebweyi bammɔ begyingya bana avwi bámana. Na awɔ lɛti ndi Katɔti ɔni mɔɔdi kayawi kamɛni lɛgakɔdikɔ ƒui lɛlɔ. Na awɔ nédie katɔ ku kalɔ.

¹⁶O Unwoti, se atu na enu, na ebimi anumi na anu. Nu etemila ani na Sanaherib ɔku ɔni na úti úmene-mi ɔdanku, na uudumi awɔ Katɔti ɔni nli ngba.

¹⁷“Unwoti, sɔsɔ na ɔdi ka Asiriaƒuɔ ɔga ɔ́yila lɛma pii udu, na kɔlɔ kɔmmɔ kuwi ukpludi.

¹⁸Na ɔ́kyula bana baƒiɔ bani na geen ni, baaadi lɛla lɛdi beetulo egyiiku ku atabi ani na bekyuli béti bana enu bánwi kani.

¹⁹Unwoti bula Katɔti ƒɔ-bu lɛku Asiriaƒuɔ ɔga ɔmɛni enu kemmo kalɛ na kayawi lɛgakɔdikɔ bekyuli ƒui banu bati ka awɔ Unwoti kani ndi Katɔti.”

²⁰Ɔmmɔ kama ni, Kenye Udiene Yesaia ɔ́sia Ɔga Hesekia kenye ɔnini, “Lɛni na Unwoti Israel Katɔti ɔɔsu ɔnii línu ƒula bɔkpali ɔ́siku Asiria Ɔga Sanaherib lɛlɔ.

²¹Na lɛla lɛni na Katɔti ɔ́su ɔ́siku-nwu lɛlɔ ndi ɔnii, “ ‘Sion ubi ugblebi adagyaa úni-ɔ na ɔɔmá-a. Yerusalem ubi ulekubi, uuƒwimi nwuna lili ɔni na ékeli ésela.

²²Ɔma na akya eedumi taama? Na ɔma na aakwanyi taakya ku lɛdi momoomo? Na ɔma na aanu ɔnusɛ ku bɔpii? Israel Katɔti Kedee ɔmmɔ na ɔdi!

²³Átala bekyuli ákya Unwoti, na bákpila-nwu edumi. Na ásu anini, “Nkɛnku mina bapɔnkɔ kɛɛkɛ lɛlɔ na lɛ́ɛkɔ abi ani na ákuku ƒui eli lɛ́vi na Lebanon kesii kani bene na kákuku ketulo ƒui. Na egyii kpakplaa ammɔ ƒui líkulo-nya líwi kalɔ ku egyii abuni ani nálɛ enye salaa ƒui. Na kesii kani na kadi kabɛkɔ ƒui líduo mmɔ bene lɛ́lɛ, kesii kani na kadi lɛkumiɔ geen.

²⁴Na líku abiɔ lɛ́kya kesii kani na kadi baƒɔ kɔlɔ kemmo, na lɛ́ni ntu na mmɔ. Mina lɛgba kalɔ geen na líti lɛ́nya Egyipte ntukpa bɔni nákwii mmɔ.”

²⁵“ ‘Bunu na étenu ɔmɛni kudii? Ami nábla ala amɛni líse kukuuku. Na lɛ́tina kalɛ na adubo buse na uwi ɔni návi ƒui kemmo. Na ɔƒɛni lɛ́ya na ébo-nwu kemmo. Na ákana na énwini lɛma linengudi lɛni na bátu bámana ábla aani atabi ani na bála básala lisu.

²⁶Badi bekyuli bani na békpeli-ma ɔyikun báƒɔ, na ɔ́bla-ma kalɛ kadi ku kɔƒa. Bese aani livo lɛni nnye alakpi akɔ, na bese aani livo lɛni mɔɔta ɔwɔdi. Na bálɛ livo lɛni mɔɔkwɛ́ na ɔtɔ katɔ, na ɔƒɛ ɔɔkyula-ni asa na lɛ́bi lɛlɔ.

²⁷“ ‘Nsu ngyi kesii kani na elie, ku uwi ɔni na eebo taatɔlɔ, ku kalɛ na aata ku kɔnyi taasiaku-mi.

²⁸Na ka áta ásiaku-mi ku kɔnyi, ku ƒula ukyuli tabu bɔni na línu ku mina atu ɔsu ni, ndubɔkya-a ɔdaliwa enwu na liti kenye kabuli lɛbala-a kenye, na lɛya na enwini asia ulu ɔni lɛlɔ na ásia ébo.’

²⁹“O Hesekia, ɔmɛni ndubɔbla ƒula likposela. “Na lɛkwa lɛmɛni kemmo ni, edula ani na anya alati nákwɛ na adubo bɔdi. Na lɛkwa bamba ni, edula akukudi ani násɔ áta ebi na adubo bɔdi. Nsu lɛkwa lɛtɛdi ni, awɔ ɔlati kya edula na aƒɛ-nya na ese adingyii mmo na ede ebi ammɔ adi.

³⁰Na Yudaƒuɔ ɛlɛɛ bani nébu badubɔsɔ bedie ligyiitu aani kugyii kalɛ besie kalɔ kemmo ɔgyu na banwu ebi na kayaa.

³¹Ɔsika ukyuli ɔdi ɔdubɔlɛ ɔsi Yerusalem. Na bani ndubɔkɛ ngba lɛnɔ basi Sion Kɔbi. Ɔsika kalɛ na anumi égyie ɔsu ɔdubɔya na ɔmɛni ubo-nwu kemmo lɛni.

³²“Anwuɔsu lɛni na Unwoti ɔɔsu taasiku Asiriaƒuɔ ɔga lɛlɔ ɔnii, “ ‘Ɔɔɔdubo ɔma unengudi ɔmmɔ kemmo buduo iye ubo nwuna kataminta kunwi muedi na mɛni. Na ulebo mmɔ ku lɛgyumanala, iye ubatu kesii kani na ɔdubunye ukpoku ɔma ɔmmɔ ɔmana.

³³Na ulu ɔni lɛlɔ na ɔkɛ úbo na ɔdubɔsɔ ɔsia ɔtɔlɔ. Ɔɔɔdubo ɔma ɔmmɔ kemmo buduo. Lɛni na Unwoti ɔ́su.

³⁴Na ndubɔgyumana na likpo lɛƒɔ ɔma ɔmmɔ, na mina lɛnyi ku mina kabla ɔblane Dawid ɔsu.’ ”

³⁵Na usien ɔmmɔ ni, Unwoti ɔtu ɔdi úsie Asiriaƒuɔ bekpone kakyakɔ, na ɔ́du bekpone mpim eti atɛ ku avlaatɛ-ɛlɔ (185,000). Na ka kadi kégye ni, bánu ka bekpine bewi mmɔ bamana.

³⁶Ɔmmɔ ɔsu Asiriaƒuɔ Ɔga Sanaherib ɔ́ya na báta mmɔ na bénwini bésie Niniwe na bétélie mmɔ.

³⁷Limeyi lɛdi ni, ka Asiriaƒuɔ ɔga ɔkya ɔɔkpá nwuna baƒiɔ Nisrok na nwuna kakpakɔ ni, ɔga ɔmmɔ bebi inyɔ bani ndi Adramelek ku Sareser béti bana kuwii na bétébeyi-nwu bádu, na békeli bésie Ararat kalɔ lɛlɔ. Na ubidi bamba ɔni baalɔ bani Esarhadon úti-nwu keliekɔ aani ɔga kalɛ.