Read Lelemi Baga 2 2 Bible Online

Baga 2 2 - Lelemi bible

Baga 2 2

¹Uwi ɔni na Unwoti ɔɔyɔ́ ka uti Elia usienku katɔ na ɔƒɛƒɛɛ ɔni mɔɔkya ligede kemmo ni, Elia ku Elisa báta bási Gilgal.

²Amu na Elia ɔ́su Elisa ɔnini, “Sɔ nye mɛni, ɔsika Unwoti ɔ́tala-mi ɔnii nteesie Betel.” Amu na Elisa údie-nwu kenye ɔnini, “Na awɔ ku Unwoti ɔni nli ngba mɛni anumi ni, lɛɛɛdubo-ɔ bɔnyonu!” Ɔmmɔ ɔsu bana inyɔ ƒui básiaku lɛlɔ bésie Betel.

³Katɔti kenye bediene lɛkpa lɛni nkya Betel bébo Elisa kudɔ na béye-nwu banini, “Agyi ka Unwoti ɔdubo ƒula ati buti bɔtɔlɔku ɔmwi kadi?” Amu na Elisa údie kenye ɔnini, “Ɛɛn, ngyi! Nsu bɛya-nwu kɔtɛ kɔmmɔ kɔwɔ mmɔ.”

⁴Amu na Elia ɔ́su Elisa ɔnini, “Sɔ nye mɛni, ɔsika Unwoti ɔtala-mi Yeriko.” Amu na Elisa údie kenye ɔnini, “Na awɔ ku Unwoti ɔni nli ngba mɛni anumi ni, lɛɛɛdubo-ɔ bɔnyonu.” Ɔmmɔ ɔsu básiaku lɛlɔ bátɔlɔ bésie Yeriko.

⁵Amu na Katɔti kenye bediene lɛkpa lɛni nkya Yeriko bésie Elisa kudɔ na béteye-nwu banini, “Agyi ka Unwoti ɔdubo ƒula ati buti bɔtɔlɔku ɔmwi kadi?” Amu na Elisa údie kenye ɔnini, “Ɛɛn, ngyi! Nsu kɔtɛ kɔmmɔ kɔwɔ mmɔ.”

⁶Ɔmmɔ kama Elia ɔ́su Elisa ɔnini, “Sɔ nye mɛni, ɔsika Unwoti ɔ́tala-mi na Yordan Ketu.” Amu na Elisa údie kenye ɔnini, “Na awɔ ku Unwoti ɔni nli ngba mɛni anumi ni, lɛɛɛdubo bɔsɔ bunye.” Ɔmmɔ ɔsu bana inyɔ ƒui bátɔlɔ.

⁷Mmɔ na kenye bediene lisu lɛmmɔ bésie na béténye kɔƒɛlɛ, na benye baanu kesii kani na Elia ku Elisa bédi bénye na Yordan Ketu kɔtu.

⁸Amu na Elia údie nwuna lɛduni lɛni na ɔda na ɔ́ƒɛ-ni ɔ́sala na úti ɔ́ƒiɛmi Yordan Ketu. Na ketu kammɔ kéle lɛlɔ kemmo inyɔ na bákɛ ketu kammɔ kemmo bávia kalɔ kakwiidi lɛlɔ bésie ɔvi unyɔdi.

⁹Uwi ɔni na bávia báwɔlɔ ni, Elia ɔ́su Elisa ɔnini, “Su-mi lɛla lɛni na aayɔ́ ka lite-ɔ asa na beti-mi batɔlɔku na ƒula kudɔ.” Amu na Elisa údie kenye ɔnini, “Ya na kɔnu kutuku-mi Katɔti Kɔyu ɔyikun ɔni náƒɔ-ɔ lɛlɔ kemmo akpa anyɔ.”

¹⁰Amu na Elia ɔ́su Elisa ɔnini, “Éye lɛla lɛni libo ɔkplu geen. Nsu si enye aanu uwi ɔni na béti-mi baatɔlɔku ƒula kudɔ béselaku katɔ ni, kɔnu kɔdubutuku-ɔ lɛla lɛni na éye. Nsu ɔmmɔ kama anwu ni, alákɛ lɛla lɛmmɔ.”

¹¹Na uwi ɔni na bátɛmi bésela ni, kɔnakunwi kani na ɔpɔnkɔ kɛɛkɛ ɔni na ɔɔda ku ogya ku bapɔnkɔ bani mɔɔda ku ogya báda bálɛ na béle Elia ku Elisa ntɛ. Na Elia ɔ́kɔ úduo bapɔnkɔ kɛɛkɛ ɔmmɔ kemmo na béti-nwu bésienku katɔ.

¹²Amu ka Elisa ɔ́nu ɔpɔnkɔ kɛɛkɛ ɔmmɔ ka ɔ́kɔ úsela katɔ ni, mmɔ na ɔ́va momoomo ɔnini, “Mina ɔti! Mina ɔti! Mɔɔnu ɔpɔnkɔ kɛɛkɛ ɔmmɔ ku Israelƒuɔ bapɔnkɔ beliene bammɔ!” Ɔmmɔ kama Elisa ɔ́sɔ útanu Elia lɛnɔ. Mmɔ kani na úƒie nwuna awu ɔni na ɔkya ɔ́ni-nwu na ɔ́bwɛ.

¹³Amu na úti Elia lɛduni lɛni nálɛ líbo kalɔ mmɔ na ɔ́sɔ únwini úténye Yordan Ketu kɔtu.

¹⁴Na úti Elia lɛduni lɛmmɔ ɔ́ƒiɛmi ntu bɔmmɔ anumi na ɔ́su ɔnini, “Wɛ na Unwoti ɔni ndi Elia Katɔti mmɔ ɔkya?” Amu na ɔ́sɔ ɔ́ƒiɛmi kunyɔdi na ntu bɔmmɔ bɔ́bwɛ kemmo inyɔ. Na ɔ́sia-nwu kemmo na úténye ketu kammɔ ɔvi unyɔdi.

¹⁵Na kenye bediene bani na bási Yeriko na benye kɔƒɛlɛ baanu Elisa básu banini, “Elia kɔyu kúbaƒɔ Elisa lɛlɔ kemmo!” Amu na bésie bátasiaku-nwu. Na bákya-nwu lili kalɔ.

¹⁶Mmɔ na básu-nwu banini, “Nu! Bubo nkyuli liti nkya mɛni na bubo ɔlɔkplu. Anwuɔsu ya na buteesie na butáwia Elia. Ngyi ka Unwoti kɔyu kúti-nwu kɔ́tɔlɔku na kútáda-nwu kɔ́kya kɔbi kɔdi lili iye kɔwɛ kɔdi kemmo.” Amu na Elisa údie kenye ɔnini, “Oowo! Ukyuli biala utesie!”

¹⁷Nsu bekyuli bammɔ benye Elisa lɛlɔ kpakplaa ka ɔya na beteesie utédu ka úte-ma kuƒi na bekyuli liti bammɔ bésie bávi abi ani nákuku ku ani nátakuku eli lɛlɔ emeyi atɛ sɔɔn, nsu bátanu Elia.

¹⁸Ɔmmɔ kama bénwini bébo Elisa kudɔ na kesii kani na uli ɔgya-ma na Yeriko mmɔ. Na Elisa ɔ́su-ma ɔnini, “Ńtasu-mii nnii bitesie?”

¹⁹Ɔmmɔ kama banana badi bási Yeriko na bébo Elisa kudɔ na bábasu-nwu banini, “Ɔbune! Aanu kalɛ na ɔma unegudi ɔmɛni ɔɔdia bunu geen, nsu ntu bɔni bɔɔní bɔɔɔdia, na kalɔ kammɔ lɛnɔ kaladia lɛla lɛdi.”

²⁰Amu na Elisa ɔ́su-ma ɔnini, “Biti ɔɔƒɛɛ ɔwɔdi na biti mma bli bɛkya-nwu kemmo biboku” Na ama lɛnɔ bábla lɛni.

²¹Amu na anwu lɛnɔ ɔ́ta úsie libiɔ lɛmmɔ kudɔ na úwilimi mma bɔmmɔ úwi ntu bɔmmɔ kemmo na ɔ́su ɔnini, “Lɛni na Unwoti ɔɔsu ɔnini, ‘Ntu bɔmɛni bɔbla ntu bɔbuni, na bɔsɔ buteboku kukpi iye ubile kalɔ kammɔ na kasɔ kaladia ala.’ ”

²²Na aani kalɛ kani na Elisa ɔ́su ni, lɛni kani na úbo úte na ntu bɔmmɔ bɔbla ntu bɔbuni.

²³Ka Elisa ɔ́ta Yeriko mmɔ ni, úti úsela Betel na útásiaku bakloƒu badi ka bálɛ bási ɔma ɔmmɔ kemmo na basiaku-nwu baamá-nwu taasu banini, “Lili ketikɔ gyɔɔ, gyu teesie! Lili ketikɔ gyɔɔ, gyu teesie!”

²⁴Amu na Elisa únwini na ɔ́nu-ma ɔnusɛ, na úwida-ma na Unwoti lɛnyi kemmo. Mmɔ na begiti inyɔ bási lɛku kemmo na bábaduli banamu aavlene-inyɔ na béle-ma kɔkɛ kɔkɛ.

²⁵Na Elisa ɔ́tɔlɔ úsie Karmel Kɔbi lɛlɔ. Na ɔmmɔ kama ɔ́sɔ únwini úsie Samaria.