Read Lelemi Baga 2 20 Bible Online

Baga 2 20 - Lelemi bible

Baga 2 20

¹Uwi ɔmmɔ kemmo ni, Ɔga Hesekia úbo uuƒi ɔlɛ kpakplaa ɔdi ɔni na ubu blii na ukpi. Amu na Amos ubidi Kenye Udiene Yesaia úsie utánu-nwu, na ɔ́su-nwu ɔnini, “Unwoti ɔnii, ‘Klibi ƒula kaduli ala ƒui se, ɔsika adubo bukpi na aaadubo bɔta ɔlɛ ɔni na eeƒi.’ ”

²Mmɔ na Hesekia úti nwuna anumi ɔ́tina kowodu na ɔ́kpali Katɔti ɔ́su ɔnini,

³“Unwoti nyimo ka lɛ́bla ala siin na ulu lɛlɔ na ƒula anumi. Na líti mina kayi lɛnɔ lɛ́sia awɔ lɛti lɛlɔ. Na lɛ́kya ɔkplu ka lɛ́bla lɛla lɛni na aayɔ́.” Ɔmmɔ kama úsie kalɔ uuwulo momoomo.

⁴Ka Yesaia ɔ́wɔlɔ nwuna bɔtɛmi ni, ɔ́tɔlɔ ɔga ɔmmɔ kudɔ. Nsu asa na walɛ ɔga kaduli kemmo mmɔ ni, Unwoti ɔ́sɔ ɔ́su-nwu ɔnini,

⁵“Sɔ nwini sie Hesekia, mina kadi bekyuli ɔtɔnkune kudɔ na asu-nwu anii, ‘Lɛni na Unwoti, ƒula ɔti Dawid Katɔti, ɔɔsu. Línu ƒula bɔkpali ku keku kani na éwulo ku imii, na ndubo-ɔ bɔbwi. Ɔ́si ɔmwi útédu limeyi lɛtɛdi lɛlɔ ni, adubo bɔta busie Unwoti kakpakɔ.

⁶Na ndubuti akwa leevu-alɔ libunku ƒula ngba emeyi. Na ndubukpo lɛƒɔ awɔ ku Yerusalem ɔma unengudi ɔmɛni lɛlɛku Asiriaƒuɔ ɔga enu kemmo na ami ɔlati lɛnyi ku mina kabla ɔblane Dawi ɔsu.’ ”

⁷Ɔmmɔ kama ni, Yesaia ɔ́su bekyuli bani mɔɔnu ɔga ɔmmɔ lɛlɔ ɔnini, “Bɛwia kɔnwingyie ebi.” Na ama lɛnɔ báwia-nya na bákɔ-nya básia-nwu eƒula ammɔ lɛlɔ na ása-nwu.

⁸Mmɔ na Hesekia úye Yesaia ɔnini, “Bi ndi likposela lɛni adubo buti bɔtina ka Unwoti ɔdubo-mi bɔbwi?”

⁹Amu na Yesaia údie kenye ɔnini, “Unwoti likposela lɛni na ɔdubɔtina-a ka ɔdubɔbla lɛla lɛni na ɔ́su ndi ɔmɛni. Bɔyu na ɔtɔ ɔmɛni ɔyuli ɔdubɔyu nwuna kanyakɔ libili lɛlɔ ubo kalɔ lɛgba leevu, munuu ɔdubuti ɔkɔ katɔ lɛgba leevu?”

¹⁰Na Hesekia údie kenye ɔnini, “Use kpɛtɛ kpɛtɛ ka ɔyuli ɔmɛni ubo kalɔ lɛgba leevu. Anwuɔsu ya na uti ɔkɔ lɛgba leevu mmomu.”

¹¹Amu na Yesaia ɔ́kpali katɔ, na Unwoti ɔ́ya na ɔyuli ɔmmɔ úti ɔ́kɔ katɔ lɛgba leevu. Na ɔmɛni úbo úte lɛni na Ɔga Ahas ɔtɔ kanyakɔ ubili ɔni na ɔ́tu lɛlɔ.

¹²Na uwi ɔmmɔ kani kemmo ni, Babilonƒuɔ ɔga ɔni ndi Baladan ubidi Merodak-Baladan únu ka Ɔga Hesekia uuƒi. Ɔmmɔ ɔsu ɔ́tala bekyuli na úti kakunkɛ ku etela adi úte-ma ka béti béteesienku-nwu.

¹³Amu na Hesekia ɔ́ƒɔ baƒɔ bammɔ na úti-ma ɔ́vinku nwuna ɔtɔ ɔni kemmo na uusé nwuna ala. Na ɔ́tina-ma nwuna akɛla ƒui ku nwuna sika ɔƒualadi ku ugyiedi ku nwuna akyala ku awɛɛla ani muunwenyi ƒɛƒɛɛ ku nwuna ekpola ƒui, na lɛla biala lítebu ɔni na úteti útatina-ma.

¹⁴Ɔmmɔ kama kenye udiene Yesaia úsie Ɔga Hesekia kudɔ na úye-nwu ɔnini, “Wɛ na bekyuli bamɛni bási, na bi na básu-ɔ?” Na Hesekia údie kenye ɔnini, “Bekyuli bammɔ bási ɔgyu kakaaka na Babilon kalɔ lɛlɔ.”

¹⁵Na Yesaia úye Hesekia ɔnii, “Bi na bekyuli bammɔ bánu na ɔga kaduli mmɔ?” Amu na Ɔga Hesekia údie kenye ɔnini, “Lɛ́ya bekyuli bammɔ bánu lɛla biala. Na lɛla lɛdi lítebu na ala kesekɔ ɔtɔ ɔmmɔ kemmo ɔni na ńtaya na banu.”

¹⁶Amu na Yesaia ɔ́su Hesekia ɔnini, “Se atu na enu lɛla lɛni na Unwoti ɔɔsu-ɔ.

¹⁷‘Uwi ɔdi ɔdubo ɔni na lɛla biala lɛni nse ɔga kaduli mmɔ ku ala ani na ƒula baga bani na bélie bávi báwia bése úbedu ɔmwi kadi badubo-nya buti busienku Babilon kalɔ lɛlɔ ɔni na belébu lɛla lɛdi belése.

¹⁸Na badubo awɔ ɔlati bawɔ badi buti bɔtɔlɔku busienku Babilon na bedie-ma agobɛɛ. Na badubunwini Babilonƒuɔ ɔga kabla bablane.’ ”

¹⁹Na Hesekia únu kalɔ ka ɔdubo atu bɔyɔ bɔkɛ na ɔkɛ Unwoti kagyumana na nwuna ngba uwi ƒui. Anwuɔsu údie kenye ɔnini, “Kenye kani nási Unwoti kudɔ kébo-mi kudɔ mɛni kadia.”

²⁰Na lɛla biala na Ɔga Hesekia ɔ́bla ku nwuna kayi buse ablala ku kalɛ na ɔ́bla asa na ɔ́tu ntu kewikɔ na úku libu na ntu buubo teebewi ɔma kemmo ni, bénweni-nya bákya Yudaƒuɔ baga lɛlɔ kɔtɛ ɔku kemmo.

²¹Hesekia úkpi na ubidi Manase úti-nwu keliekɔ aani ɔga kalɛ.