Read Lelemi Baga 2 21 Bible Online

Baga 2 21 - Lelemi bible

Baga 2 21

¹Manase ɔ́kɛ akwa leevu-anyɔ asa na bése-nwu lɛga na Yuda. Na ɔ́di lɛga lɛmmɔ na Yerusalem akwa liti ku ɛlɔ. Na uni baalɔ banii Heƒsi-Bah.

²Na ɔ́siaku kadi bamba bekyuli ɔbladu ukpidi kama ama bani na Unwoti ɔ́ka bɔbɔku ɔ́tɔnku uwi ɔni na Israelƒuɔ békpo bésela anumi. Ɔmmɔ ɔsu ɔ́bla likpidi na Unwoti anumi.

³Na ɔti Hesekia akpabi ani na úbo ɔ́ƒɛ ni, ɔ́sɔku-nya ɔ́tu. Na ɔ́tu akpabi úte Baal baƒiɔ bɔkpa. Na ɔ́sɔ ɔ́sɔku Asera baƒiɔ ɔ́tu aani kalɛ na Ɔga Ahab ɔ́bla ɔ́vi. Na Ɔga Manase lɛnɔ ɔ́kpa ayabi.

⁴Na kakpakɔ kani na Unwoti ɔ́su ka bataakpa-nwu ni, ɔ́tu akpabi ɔ́lɛ mmɔ.

⁵Na Unwoti kakpakɔ kɔduli inyɔ bɔmmɔ kemmo ni, ɔ́tu akpabi ani baakpá ayabi ɔ́lɛ-nya kemmo.

⁶Na úti ubidi lɛnɔ ɔ́bla bɔkyula akpala. Na uusé bevone ku like bebone kudɔ. Na uusié teetéye ala lɛnɔ teenu. Ɔmmɔ ɔsu ɔ́bla likpidi na Unwoti anumi na ɔ́kya Unwoti kɔnyi.

⁷Manase ɔ́tu Asera ɔƒiɔgyii ɔ́lɛ Katɔti kakpakɔ kesii kani na Unwoti ɔ́su Dawid ku ubidi Salomo ɔnini, “Na Yerusalem mɛni na kakpakɔ kamɛni kemmo ni, lɛ́ƒuna Israel lɛ́lɛku kaba kammɔ ƒui kemmo ka bataakpa-mi.

⁸Na si Israelƒuɔ badubɔdi mina ɔda bubo bɔni mina kabla ɔblane Mose úti úte-ma ƒui kaduɛ ni, lɛɛɛdubo kuƒi bute na bekyuli badi babɔku-ma balɛku kalɔ kani líti líte bana bati kuuku mmɔ lɛlɔ.”

⁹Nsu Yudaƒuɔ bétenu Unwoti litemi. Na báya na Manase ɔ́kpanku-ma na bakya baabla likpidi lɛni ntulo kadi bamba bekyuli bani na Unwoti ɔ́bɔku uwi ɔni na Israelƒuɔ békpo bésela anumi mmɔ.

¹⁰Na Unwoti úti ɔ́siaku nwuna kenye bediene lɛlɔ na ɔ́su ɔnini,

¹¹“Ɔga Manase ɔ́bla ala ani muusé lɛlɔ teetulo Amoriƒuɔ lɛdi ƒui. Na ɔ́kɛnku nwuna lɛƒiɔkpa ɔsu na ɔ́kpanku Yudaƒuɔ útákya likpidi kemmo.

¹²Anwuɔsu ami Unwoti ɔni ndi Israelƒuɔ Katɔti ndubuti ɔgbankpi ɔmɛni liboku Israelƒuɔ ku Yerusalemƒuɔ lɛlɔ. Na ukyuli biala ɔni menu litemi lɛmɛni ni, nwuna atu kemmo adubɔbla-nwu yaa.

¹³Na ndubɔni Yerusalem kɔtu aani kalɛ na lɛ́ni Samaria kɔtu. Na aani kalɛ na lɛ́bla Israelƒuɔ Ɔga Ahab ku nwuna kaba bekyuli ni, lɛni kani na ndubo Israel bɔƒɔ aani kalɛ na baaƒɔ akyami na benwini-nya teebi.

¹⁴Na bekyuli bani mebu ni, ndubudie-ma atu. Na lɛnyonu-ma lɛkya bana bekisine enu kemmo na bekpo badi-ma lɛlɔ na batuma mmo bete-ma na ama alati kalɔ lɛlɔ.

¹⁵Ndubɔbla mina bekyuli kalala kamɛni, ɔsika bábla likpidi na mina anumi na bákya-mi kɔnyi. Úti ɔ́si uwi ɔni na bana bati kuuku bálɛ Egyipte kalɔ lɛlɔ ubedu ɔmwi kadi.”

¹⁶Manase ɔ́du bekyuli pii bani nátaƒiɔ na Yerusalem lɛblɔnu lɛgba ku ubugya. Na ɔ́sɔ ɔ́kpanku Yudaƒuɔ úbunku ɔmmɔ lɛlɔ útákya lɛƒiɔkpa kemmo. Na ɔ́ya na bábla likpidi na Unwoti anumi.

¹⁷Na ala bamba ani ƒui na Manase ɔ́bla ku ekpidi ani ƒui ɔbla bénweni-nya bákya Yudaƒuɔ baga lɛlɔ kɔtɛ ɔku kemmo.

¹⁸Na Manase úkpi na báva-nwu ɔga kaduli kevomadɔ kani Usa ɔ́bla. Na ubidi Amon úti-nwu keliekɔ aani ɔga kalɛ.

¹⁹Na Amon ɔ́kɛ akwa aavlanyɔ-inyɔ asa bése-nwu lɛga na Yuda. Na ɔ́di lɛga lɛmmɔ akwa anyɔ na Yerusalem. Na uni ndi Mesulemet ubidi Harus ɔni nási Yotba.

²⁰Na aani kalɛ na ɔti Manase ɔ́bla ni, anwu lɛnɔ ɔ́bla likpidi na Unwoti anumi.

²¹Na ɔ́siaku ɔti ɔbladu ukpidi kama. Na baƒiɔ bani na ɔti ɔ́kpa ni, anwu lɛnɔ ɔ́kpa-ma.

²²Na úni Unwoti ɔni ndi bana bati kuuku Katɔti ku nwuna ɔda bubo.

²³Na Amon kabla bablane béti-nwu lɛlɔ kasusu kekpidi. Na bábɛ bádu-nwu na ɔga kaduli mmɔ.

²⁴Ka Yudaƒuɔ bamɛni bádu Amon ni, béti ubidi Yosia bábla ɔga.

²⁵Na ala bamba ani ƒui na Amon ɔ́bla bénweni-nya bákya Yudaƒuɔ baga lɛlɔ kɔtɛ ɔku kemmo.

²⁶Na báva Amon na Usa kevomadɔ, na ubidi Yosia úti-nwu keliekɔ aani ɔga kalɛ.