Read Lelemi Baga 2 24 Bible Online

Baga 2 24 - Lelemi bible

Baga 2 24

¹Uwi ɔni na Yehoiakim ɔɔdi lɛga ni, Ɔga Nebukadnesar ɔni nási Babilon útáka Yuda ɔ́kya. Na únye Ɔga Yehoiakim lɛlɔ akwa atɛ sɔɔn na ɔɔƒɔ lɛlɔ bɔdi kayu teete-nwu. Na akwa atɛ amɛni kama ni, Ɔga Yehoiakim ɔ́ta únye ɔda bubo bɔmmɔ lɛlɔ.

²Amu na Unwoti úti bekpone ɔ́siku Babilon ku Siria ku Moab ku Amon ka bétékpoku Yehoiakim na bayila Yudaƒuɔ udu aani kalɛ na Unwoti úti ɔ́siaku nwuna kenye bediene lɛlɔ ka ɔdubo Yuda bɔbla.

³Sɔsɔ ni, ɔmɛni úbo úte lɛni ɔni na Unwoti ɔ́su ɔnii ɔdubo Yuda bekyuli ƒui bɔbɔku bɔlɛku nwuna anumi ɔ́si Ɔga Manase likpidi lɛni na ɔ́bla ɔsu.

⁴Ɔsika ɔ́du bekyuli bani nátaƒiɔ. Na Unwoti ulakana likpidi lɛmmɔ udu buteeti taakyiɛ.

⁵Na ala ani ƒui na Yehoiakim ɔ́bla ni, bénweni-nya bákya Yudaƒuɔ baga lɛlɔ kɔtɛ ɔku kemmo.

⁶Na Yehoiakim úkpi na ubidi Yekonia úti-nwu keliekɔ aani ɔga kalɛ.

⁷Na Egyipteƒuɔ ɔga ku nwuna bekpone básɔ bátakana Egyipte kalɔ lɛlɔ bɔlɛ lɛnɔ. Ɔsika Egyipteƒuɔ bátadi lɛlɔ úti ɔ́si Euƒrate Ketu útédu ɔmii ɔni ntɛ katɔ kakɛ.

⁸Akwa leevu-maane na Yekonia ɔ́ƒɔ asa na bése-nwu Yudaƒuɔ lɛga. Na úlie Yerusalem mmɔ ɔ́di lɛga abuli atɛ. Na uni ndi Elnatan ubidi Nehusta ɔni nási Yerusalem.

⁹Anwu lɛnɔ útadi Unwoti litemi lɛlɔ na ala ekpidi ani na ɔ́bla ɔsu.

¹⁰Na Yekonia uwi kemmo na Babilonƒuɔ Ɔga Nebukadnesar úbo nwuna kabla bablane ɔda na bátáka Yerusalem bákya.

¹¹Na uwi ɔmmɔ kemmo ni, Nebukadnesar ɔlati úsie Yerusalem.

¹²Na Ɔga Yekonia ku uni ku nwuna bebi bananabi ku nwuna kabla bablane ku ɔga kaduli kabla bablane béti lɛlɔ bátákya Ɔga Nebukadnesar kalɔ. Na lɛkwa maanedi na Ɔga Nebukadnesar lɛga bɔdi kemmo ni,

¹³úti Yekonia úsienku Babilon na útákya-nwu ɔtɔ. Na ɔ́buma egulabi ani ƒui nse Unwoti kakpakɔ ku ɔga kaduli ɔda aani kalɛ na Unwoti ɔ́su úse. Na Ɔga Nebukadnesar ɔ́ti sika ugyiedi akyami ani ƒui na Ɔga Salomo ɔ́vɔ úse ka beteeti taabla kakpakɔ kabla ɔ́tɔlɔku.

¹⁴Na Nebukadnesar úti bekyuli ku baga beleku ku bekyuli bani na benye kunyekɔ kunengudi ku bekyuli bani ƒui nda enu kemmo kabla ku bani na baakywɛ abualagyie ɔ́lɛku Yerusalem kalɔ kammɔ kemmo, na útakya-ma ɔtɔ. Na bana bumomo bɔbla aani mpim leevu. Na úbu bani ndi bawabane geen kani ɔkya Yuda mmɔ.

¹⁵Na Nebukadnesar úti Yekonia ku uni ku nwuna beleku ku nwuna kabla bablane ku batɔnkune úsienku Babilon na útákya-ma ɔtɔ na mmɔ.

¹⁶Nebukadnesar ɔ́sɔ úti bekpone bani mbo ɔkplu úsienku Babilon, na bana bumomo bɔbla aani mpim maatɛ. Na úti bekyuli apim unwi bani mɔɔbla bana enu kemmo kabla ku bani mɔɔkywɛ abualagyie úsienku Babilon.

¹⁷Na Nebukadnesar ɔ́ya Yekonia uni ɔnwani ɔnanabi ɔni baalɔ banii Matania ɔ́bla Yudaƒuɔ ɔga na ɔ́vumana-nwu lɛnyi ɔ́bla Sedekia.

¹⁸Na Sedekia ɔ́kɛ akwa aavlanyɔ-unwi asa na ɔ́di lɛga na Yuda. Na ɔ́di lɛga lɛmmɔ na Yerusalem akwa leevu-unwi. Na uni ndi Yeremia ubidi ɔni baalɔ Hamutal ɔni nási Libna.

¹⁹Na Ɔga Sedekia ɔ́bla likpidi na Unwoti anumi aani kalɛ na Ɔga Yekonia ɔ́bla kalɛ.

²⁰Na kɔnyi kɔni na Unwoti úti ɔ́kya Yerusalemƒuɔ ku Yudaƒuɔ ɔsu ni, ala amɛni ƒui álɛ lɛni. Na kawɔlɔkɔ ni, ɔ́bɔku-ma údie nwuna anumi. Na ɔƒɛni ni, Sedekia ɔ́ta únye Babilonƒuɔ ɔga lɛlɔ.