Read Lelemi Baga 2 25 Bible Online

Baga 2 25 - Lelemi bible

Baga 2 25

¹Amu na lɛkwa yaalenwidi kɔbuli leevudi kuna limeyi leevudi ka Sedekia ɔɔdi lɛga ni, Babilon Ɔga Nebukadnesar ɔ́tɔnku nwuna bekpone ƒui ka betékpo Yerusalem. Bekpone bammɔ bábla kakyakɔ na kesii kadi asa na adubuduo ɔma unengudi ɔmmɔ kemmo. Na bábla bekpone kunyekɔ bámana awodu ammɔ ƒui.

²Báka ɔma unengudi ɔmmɔ bákya útédu lɛkwa leevu-linwidi.

³Na kɔbuli kunedi limeyi yaalenwi na lɛkwa lɛmmɔ kani kemmo ni, uwi ɔmmɔ na kɔka kɔmmɔ kenye kébo kaayu ɔkplu geen úte bekyuli bammɔ kalɛ bakɛ lɛla lɛdi muedi badi.

⁴Ɔmmɔ ɔsu ka bekpone báƒɛ awodu ammɔ ni, Yudaƒuɔ ɔga ku nwuna bekpone báwia kasiakɔ na békeli bátɔlɔ usien ɔmmɔ. Na ina ka Babilonƒuɔ báka bámana ɔma ɔmmɔ ni, bakɛ bagadine ɔƒɛƒɛɛ kaƒɔkɔ, na bátásia kayakun kani na awodu anyɔ ammɔ aasa. Na bakɛ mmɔ báda bálɛ Yordan Ketu kɔwɛ kemmo.

⁵Nsu Babilonƒuɔ bekpone básia-ma kama na bétéƒie Sedekia na Yeriko, ɔsika nwuna bekpone ama békeli-nwu kudɔ bátɔlɔ bégyingya bákya amadɔ mmɔ bene.

⁶Béti Sedekia bésienku ɔma ɔni baalɔ banii Ribla na Hamat kalɔ lɛlɔ kesii kani na Nebukadnesar ɔ́tɛku-nwu litemi na ɔ́du-nwu kɔtɔ.

⁷Bádu Sedekia bebi bananabi uwi ɔni na anwu ɔlati unye ɔɔnu. Na bátu-nwu anumi bédie evuo kemmo na bákya-nwu ɔbuli báni-nwu bésienku Babilon.

⁸Na lɛkwa leevu-yaalenwi na kɔbuli kɔlɔndi na limeyi maatɛdi na Babilonƒuɔ Ɔga Nebukadnesar lɛga bɔdi kemmo ni, Nebusaradan ɔni ndi Ɔga Nebukadnesar kasusu ɔkyane ku bekpone ɔtɔnkune útéduo Yerusalem.

⁹Unengu ɔmɛni ɔ́kyula Katɔti kakpakɔ kammɔ na ɔ́kyula ɔga kesii ku lɛtɔ linengudi lɛni náƒɔ lɛnyi mmɔ ƒui ku bekyuli kɔduli lɛnɔ.

¹⁰Na Nebusaradan ɔmɛni ɔ́kpanku Babilonƒuɔ bekpone ƒui na bátáƒɛ Yerusalem awodu ɔba.

¹¹Ɔmmɔ kama bekpone unengu ɔmɛni úti bekyuli bani nébu na ɔma ɔmmɔ kemmo ku bani nkya akpakɔlɔ lɛma ku bani na bátuna ka babla Babilonƒuɔ Ɔga kabla ɔ́tɔlɔku úsienku Babilon.

¹²Na bawabane bani na ayaki ada geen kani nébu bákya na bataanu egyiibi mmo ku mmo geen bɔmmɔ lɛlɔ.

¹³Na Babilonƒuɔ bábwɛ bédie abuala egyiedi ani na bátɛ na kakpakɔ mmɔ ku ala kasiakɔ ku abuala egyiedi ntu kewikɔ kani bátu bálɛ kakpakɔ mmɔ. Na bábuma abuala egyiedi ani ƒui nse kakpakɔ mmɔ bésienku Babilon.

¹⁴Na béti ebui ku lɛsoƒi ku lɛsogya kɔbuli linyenela ku akyami ku abualagyie ala ani ƒui lɛlɔ kabla na baabla na kakpakɔ mmɔ bátɔlɔku.

¹⁵Bekpone unengu bagadine ɔgyumanane ɔmmɔ úti oloƒui ebui ammɔ ku ntu akyami gbion ani na bábla ku sika ugyiedi ku ɔƒualadi ƒui ɔ́tɔlɔku.

¹⁶Na abuala egyiedi ala ani na Ɔga Salomo ɔ́bla ku ani na ɔ́tɛ úse mmɔ ku ala kasiakɔ kammɔ ku ntu kewikɔ bonwu kammɔ ni, ala ammɔ ebo unu etulo bɔkɔku muedi.

¹⁷Na adi biala bɔkuku bɔdi lɛgba bɔka aavlanyɔ-maatɛ na béti abuala egyiedi bewi-nwu eli. Na nwuna bɔkuku bɔdi lɛgba bɔka ine ku kakɛ. Na béti abuala egyiedi báka bámana ɔdi biala. Na béti bábla anwula bámana ɔdi biala lɛlɔ.

¹⁸Ɔni mbuku ni, bekpone unengu ɔmmɔ úƒie ɔkpane unengu Seraia ku nwuna ɔmansiane Seƒania ku kakpakɔ kabla bablane bani náƒɔ lɛnyi ɔ́tɔlɔku.

¹⁹Na ɔma ɔmmɔ kemmo ni, úti ukpone ɔni mɔɔnu bekpone lɛlɔ ku ɔga ɔmmɔ kasusu bakyane ɛlɔ ku bekpone unengu ɔmansiane ɔni mɔɔnu bekpone kɔkunkɛ lɛlɔ ku bekyuli bani náƒɔ lɛnyi nkyuli liti ku leevu lɛnɔ ɔ́tɔlɔku.

²⁰Na bekpone unengu Nebusaradan úti bekyuli bammɔ úsienku Babilonƒuɔ ɔga na Ribla.

²¹Na Hamat ɔmii ni, mmɔ na ɔga ɔmmɔ ɔ́ya na bébo benengu bammɔ bádu. Anwuɔsu béƒie Yudaƒuɔ bammɔ bálɛku bana kalɔ lɛlɔ bátákya kalɔ bamba lɛlɔ.

²²Ɔmmɔ kama ni, Babilonƒuɔ Ɔga Nebukadnesar úti Gedalia ɔni ndi Ahikam ubidi na ɔdi Saƒan uwɔ ɔ́bla Yudaƒuɔ lɛlɔ ɔnune. Na úti-nwu úse ka utaanu Yudaƒuɔ bekyuli bakladi bani na béteƒie-ma bétesienku Babilon lɛlɔ.

²³Na uwi ɔni na Yudaƒuɔ kabla benengu ku benengu bani na béteti lɛlɔ bétete Nebukadnesar bénu ka béti Gedalia bábla bana lɛlɔ ɔnune ni, básala lɛlɔ na bátánu Gedalia na Mispa. Na kaba benengu bammɔ ndi Netania ubidi Ismael, ku Karea ubidi Yohanan, ku Tanhumet ɔni nási Netoƒani ubidi Seraia, ku Yaasania ɔni nási Maaka.

²⁴Na Gedalia ɔ́su-ma ɔnini, “Líti mina litemi muute-mii ɔni na utalɛka bɛyia Babilonƒuɔ kabla bablane bammɔ. Mmomu bɛsɔ bɛkya kalɔ kamɛni lɛlɔ na bɛsiaku Babilonƒuɔ Ɔga Nebukadnesar kama, na lɛla biala lɛdubusie kaduɛ lite-mii.”

²⁵Nsu kɔbuli maatɛdi na lɛkwa lɛmmɔ kemmo ni, Ismael ɔni ndi Netania ubidi na ɔdi Elisama uwɔ na ɔdi bagadine kemmo unwi úti nkyuli leevu na bésie Mispa na bétékpoku Gedalia na bádu-nwu. Na ɔ́sɔ ɔ́du Israelƒuɔ ku Babilonƒuɔ bani nkya-nwu kudɔ mmɔ.

²⁶Ɔmmɔ kama ni, Israelƒuɔ bani ndi bawabane ku balakɛne ƒui ku bekpone benengu békeli bésie Egyipte kalɔ lɛlɔ. Ɔsika baayia Babilonƒuɔ bammɔ.

²⁷Na lɛkwa lɛni na Ewil-Merodak ɔ́bla Babilonƒuɔ ɔga ni, údie kɔnyana bɔnu ɔ́tina Yudaƒuɔ Ɔga Yekonia. Na ɔ́da-nwu údie aban ɔtɔ ɔni na ɔtɛ kemmo. Ɔmɛni ɔ́lɛ na lɛkwa avlaatɛ-maatɛdi kɔbuli leevu-kunyɔdi limeyi aavlanyɔ-maatɛdi kama uwi ɔni béti Ɔga Yekonia bátákya ɔtɔ.

²⁸Ewil-Merodak ɔ́nu ɔga ɔmmɔ kɔnyana na úte-nwu kenyekɔ kani nákɔ na kebo ɔbu ketulo baga bakladi bani béƒie bátákya Babilon mmɔ kadi.

²⁹Anwuɔsu béte Yekonia kuƒi ka ɔvumana nwuna batɔntɛne adala. Na útaadiku Babilonƒuɔ ɔga ɔmmɔ na kadikɔ kenwi útédu uwi ɔni úkpi.

³⁰Na limeyi ndi limeyi ni, beete Ɔga Yekonia egulabi adi na uuti teeye ala ani na ɔɔwia. Na bábla ɔmɛni na nwuna ngba bulie kemmo ƒui.