Read Lelemi Baga 2 5 Bible Online

Baga 2 5 - Lelemi bible

Baga 2 5

¹Na uwi ɔmmɔ ni, Naaman ɔdi Siriaƒuɔ bekpone ɔtɔnkune na ɔdi ukyuli ɔni na Siriaƒuɔ ɔga ɔɔbu geen. Ɔsika ɔkɛnku Naaman lɛlɔ na Unwoti ɔ́ya na Siriaƒuɔ békpo bádi lɛlɔ. Nsu na uuƒi ɔlɛgyie.

²Na bekpone badi bétésie bávi Israel kalɔ lɛlɔ. Na mmɔ na bánu Israelni ulekubi ɔdi. Na Siriaƒuɔ bamɛni bákpanku ulekubi ɔmɛni bátɔlɔku na úsie uli Naaman ulekudi kudɔ ɔɔbla-nwu kabla.

³Limeyi lɛdi ni, ulekubi ɔmɛni ɔ́su uni ɔnini, “Si wadia ni, nka ndubɔyɔ nnii mina ati usie Samaria utánu kenye udiene ɔni nkya mmɔ. Na ɔbwi-nwu ɔlɛ ɔni nda-nwu mmɔ.”

⁴Ka Naaman únu litemi lɛmɛni ni, úsie Samariaƒuɔ ɔga kudɔ na útásu-nwu lɛla lɛni na ulekubi ɔmɛni ɔ́su-nwu.

⁵Amu na ɔga ɔmmɔ ɔ́su Naaman ɔnini, “Teesie Israelƒuɔ ɔga kudɔ, na eti kakunkɛ kamɛni ada.” Anwuɔsu Naaman lɛnɔ úti ala, na úti sika ɔ́ƒualadi ebi akyami liti ku avlaatɛ-ine ku sika ugyiedi akyami leevu-maatɛ ku adi bɔda unwi unwi leevu na ɔ́yu ulu.

⁶Na lɛla lɛni nkya kakunkɛ kammɔ kemmo ndi ɔnii, “Nkɛnku ɔku ɔmɛni lɛlɔ muudie mina kabla ɔblane Naaman lɛtina-a. Na mɔɔyɔ́ ka abwi ɔlɛ ɔni nda-nwu.”

⁷Ka Israelƒuɔ ɔga ɔ́ka kakunkɛ kamɛni ni, ɔtɔtɔ ɔ́gyu-nwu na ɔ́ni nwuna awu ɔ́bwɛ. Na údie lɛdi ɔ́su ɔnini, “Dɛ na Siriaƒuɔ ɔga ɔɔnu-mi ɔsu na ɔnii ami mbwi ɔnana ɔmɛni? Munuu ɔɔkali ka Katɔti na ndi na mbo kukpi ku ngba ɔyikun yoo? Lɛla lɛni na ɔ́bla mɛni ni, údie ɔ́tina ka unye ɔɔwia kuƒi na ɔkya kadɔ na ami ku-nwu ntɛ.”

⁸Uwi ɔni na Kenye Udiene Elisa únu ka Israelƒuɔ ɔga ɔ́ni nwuna awu ɔ́bwɛ ni, úti kenye úmene-nwu ɔnini, “Bi ɔsu na áni ƒula awu ábwɛ? Ya na ɔnana ɔmmɔ ubanu-mi. Na ɔdubo bɔnu bɔti ka kenye udiene ɔdi ɔkya Israel.”

⁹Anwuɔsu Naaman úti nwuna bapɔnkɔ ku bapɔnkɔ kɛɛkɛ na bétedi bénye Elisa kaduli kayakun kenye.

¹⁰Amu na Elisa ɔ́tala nwuna kabla ɔblane ɔnii utásu-nwu ɔnini, “Teesie na atákpi ntu na Yordan Ketu kemmo maatɛ na ƒula ɔlɔna ɔdubɔsɔ unwini ubo kalɛ na úse na abla sɛɛn.”

¹¹Nsu Naaman úti kɔnyi na ɔ́tɔlɔ na ɔ́su ɔnini, “Lɛ́bu nnii ɔdubɔlɛ ubo-mi kudɔ. Na ɔkpali nwuna Unwoti Katɔti lɛnyi na udie kɔnu na ɔbɔku ɔlɛ ɔmmɔ ɔlɛku-mi lɛlɔ na lɛkɛ ɔlɔkplu.

¹²Munuu bɔdi na Damasko etukpa ani ndi Abana ku Ƒarpar aaadia eeetulo etukpa ani ƒui nkya Israel?” Ɔmmɔ ɔsu úti kɔnyi na ɔ́tɔlɔ.

¹³Amu na Naaman kabla bablane bésie-nwu kudɔ na bétéye-nwu banini, “Ati, si kenye udiene ɔmɛni bɔsu na ɔ́su-ɔ ɔnii wia ala bonwu bonwu boku ni, nka aaadubo bɔbla? Amu na si ɔ́su-ɔ ɔmɛni ɔnii, ‘Teesie na atákpi na ɔlɛ ɔba-a,’ anwu na eení?”

¹⁴Ɔmmɔ ɔsu Naaman útéduo Yordan Ketu kemmo, na ɔ́nyina lɛlɔ ɔ́kya ntu bɔmmɔ kemmo maatɛ aani kalɛ na Katɔti ukyuli ɔmmɔ ɔ́su-nwu, na nwuna ɔlɔna ɔ́sɔ únwini úbo na ɔ́bla sɛɛn aani ubiwɔ ɔdi kalɛ.

¹⁵Ɔmmɔ kama Naaman ku nwuna bekyuli bani ƒui nsiaku-nwu básɔ bénwini bésie Katɔti ukyuli ɔmmɔ kudɔ. Na úténye-nwu anumi na ɔ́su-nwu ɔnini, “Ɔƒɛni na lɛ́nu lɛ́ti ka Katɔti ɔdi uuubo kayawi uuutulo Israel lɛti pɛ.” Na úvele-nwu ɔnini, “Ƒɔ etela amɛni siku ƒula kabla ɔblane kudɔ.”

¹⁶Amu na kenye udiene ɔmmɔ údie kenye ɔnini, “Na Unwoti ɔni mɔɔkpá na uli ngba mɛni anumi ni, lɛɛɛdubo-ɔ lɛla lɛdi bɔƒɔ.” Na ina ka Naaman únye-nwu lɛlɔ ka nka uti lɛla lɛdi ute-nwu ni, Kenye Udiene ɔmmɔ útaƒɔ lɛla lɛdi.

¹⁷Amu na Naaman ɔ́su-nwu ɔnini, “Si anii aláƒɔ lɛla lɛdi ni, amu ya na beku lɛti lɛni ndubudu bebuo ala betine inyɔ buti na basiaku-mi buteesie ɔma. Ɔsika ɔ́si ɔƒɛni úsela ni, nsɔ lɛɛɛdubo akpala iye bɔkyula akpala adi bɔbla bute baƒiɔ badi amu ntu Unwoti lɛti pɛ kani.

¹⁸Nsu muuvele Unwoti ka uti likpidi lɛmɛni ɔkyiɛ ami nwuna kabla ɔblane, ɔsika si ndanku mina unengu na úduo Rimon koƒiodu na ukpo-mi lɛlɔ na úboku lili kalɔ na koƒiodu mmɔ ni, ɔlɛka ami lɛnɔ liboku lili kalɔ. Anwuɔsu Unwoti uti likpidi lɛmmɔ ani ɔkyiɛ-mi.”

¹⁹Amu na Elisa ɔ́su Naaman ɔnini, “Teesie ku keyi buɛɛ.” Ɔmmɔ kama Naaman ɔ́gyu lɛgba na úsie anumi blii.

²⁰Amu na Elisa kabla ɔblane ɔni baalɔ Gehasi ɔ́su lɛlɔ ɔnini, “Aa, mina ati ɔ́nyonu Naaman, Siriani ɔmɛni, na ɔ́tɔlɔ na útaƒɔ lɛla lɛdi. Na Unwoti ɔni nli ngba mɛni anumi ni, ndubukeli lɛsiaku-nwu kama na ntáƒɔ lɛla lɛdi lɛsiku-nwu kudɔ.”

²¹Ɔmmɔ ɔsu Gehasi úkeli ɔ́sia Naaman kama. Na uwi ɔni na Naaman ɔ́nu ka ukyuli ɔdi ɔ́kɛ usi ɔdubo ni, ɔ́yu nwuna bapɔnkɔ kɛɛkɛ lɛlɔ na úye-nwu ɔnini, “Lɛla biala lise buɛɛ bɔdi?”

²²Amu na Gehasi údie kenye ɔnini, “Buɛɛ ƒui! Mina ati nátala-mi ƒula kudɔ ka mbasu-ɔ nnini, ‘Ɔ́ƒɛni kani na nkyuli inyɔ badi bási kenye bediene lɛkpa lɛni nkya Eƒraim abi kalɔ kemmo bébeduo. Na ɔɔyɔ́ ka ete-nwu sika ɔƒualadi akyami maane ku kakɛ ku adi bɔda unwi unwi akpa anyɔ.’ ”

²³Amu na Naaman únye Gehasi lɛlɔ ɔnini, “Sɔsɔ geen na ɔdi ka ɔƒɔ lɛla lɛdi, anwuɔsu ƒɔ sika ɔƒualadi akyami leevu-maatɛ mmomu sienku-nwu.” Na únyimi sika ɔƒualadi ɔmmɔ ɔ́kya aƒo anyɔ kemmo ku adi bɔda kunyɔ kɔmmɔ. Na úti útile nwuna kabla bablane inyɔ na beti batɔ Gehasi anumi.

²⁴Na ka bédu kɔbi kɔni lɛlɔ na Elisa uli mmɔ kudɔ ni, Gehasi ɔ́ƒɔ aƒo anyɔ ammɔ na úti úsienku kaduli. Na ɔ́ya Naaman kabla bablane bammɔ bénwini bátɔlɔ.

²⁵Na anwu lɛnɔ únwini úsie Elisa kudɔ. Amu na Elisa úye-nwu ɔnini, “Wɛ na ésie akya?” Mmɔ na Gehasi údie kenye ɔnini, “Ati, ńtesie kesi kesii.”

²⁶Nsu Elisa ɔ́su-nwu ɔnini, “Uwi ɔni na ɔnana ɔmmɔ ɔ́yu nwuna ɔpɔnkɔ kɛɛkɛ lɛlɔ ka ubasiaku-ɔ ni, na nkya-mii kudɔ na kɔyu kemmo.” Na úse anumi na ɔ́su-nwu ɔnini, “Ɔɔɔdi uwi ɔmɛni kemmo na ɔlɛka baƒɔ sika ku adi ku adingyii mmo lidu lidu ku baƒonu ku ɔmantɛ bakɔ iye kabla bablane badi.

²⁷Na ɔ́si lɛla lɛni ábla mɛni ɔsu ni, Naaman ɔlɛgyie ɔmɛni ɔdububo awɔ ku ƒula kaba bekyuli ƒui ɔ́si ɔƒɛni úsela uwi ƒui kemmo.” Na ka Gehasi ɔ́tɔlɔ mmɔ ni, ɔlɛ ɔmmɔ úbewi-nwu ɔlɔna lɛlɔ. Na nwuna ɔlɔna ɔ́bla ƒututuu aani etubankɛ.