Read Lelemi Baga 2 6 Bible Online

Baga 2 6 - Lelemi bible

Baga 2 6

¹Limeyi lɛdi ni, kenye bediene lɛkpa lɛni na ama ku Elisa baasa ni, básu-nwu banini, “Kesii kani bulie mɛni kese blii suɛ kete-bu.

²Anwuɔsu te-bu kuƒi na busie Yordan Ketu kɔtu na butáda akpa adi na buti bɔtu keliekɔ bute lɛlɔ.” Amu na Elisa ɔ́su-ma ɔnini, “Kuƒi kɔtɛ. Biteesie.”

³Mmɔ na kenye bediene bammɔ kemmo unwi ɔ́su Elisa ɔnini, “Buvele bɔda-a, bo na abasiaku abu ƒula kabla bablane na busie.” Amu na Elisa údie kenye ɔnini, “Línu. Ndubo buteesie.”

⁴Ɔmmɔ ɔsu ɔ́siaku-ma na bátɔlɔ. Na ka bétédu Yordan Ketudɔ mmɔ ni, bése kalɔ baadá akpa ammɔ.

⁵Na ka unwi ɔkya ɔɔdá kugyii kɔdi ni, nwuna kadadi kánu kéduo Yordan Ketu kemmo. Amu na ɔ́va ɔ́kpali Elisa ɔnini, “O ati, mina kadadi, ukyuli ɔdi mbo-ka!”

⁶Amu na Elisa úye-nwu ɔnini, “Wɛ kakɛ na ɔ́nu?” Na ka ɔ́tina-nwu kesii kammɔ ni, Elisa úkulo kegyiimi kadi na úƒwimi úsienku kesii kani na kadadi kammɔ kánu mmɔ. Kɔnakunwi lɛbuala lɛmmɔ lɛ́ta lɛ́sia ntu anumi.

⁷Amu na Elisa ɔ́su ɔnana ɔmmɔ ɔnini, “Die-ka.” Mmɔ na ɔnana ɔmmɔ únene kɔnu na údie nwuna kadadi.

⁸Ɔƒɛni Siriaƒuɔ ɔga ɔ́ta ka útékpoku Israelƒuɔ. Na ka Israelƒuɔ ɔga ɔ́tɛmiku nwuna bekpone ɔ́wɔlɔ ni, ɔ́su-ma ɔnini, “Ndubɔda mina keliekɔ na mɛni ku mɛni.”

⁹Amu na Katɔti ukyuli ɔmmɔ úti kenye úmene Israelƒuɔ ɔga ɔnini, “Nu kaduɛ na ulu ɔni lɛlɔ na anii aasia mmɔ. Ɔsika Siriaƒuɔ béti baayu mmɔ.”

¹⁰Anwuɔsu, Israelƒuɔ ɔga ɔ́sia kesii kani na Katɔti ukyuli ɔmmɔ ɔ́sia mmɔ anu kaduɛ, na Elisa úbo ɔga ɔmmɔ ɔda kɔlɛ kɔlɛ ka benye lɛlɔ kagyumana na kesii kammɔ.

¹¹Ɔkɛnku ɔmɛni ɔsu Siriaƒuɔ ɔga úbakɛ kɔnyi kaduɛ, ɔsika ulenu kalɔ lɛla lɛni ɔsu na ala aaví lɛni. Anwuɔsu ɔ́lɔ nwuna kabla bablane benengu bɔmmɔ ƒui ɔ́sala na ɔ́su-ma ɔnini, “Mɔɔwia ka lɛti bula akɔ ɔni geen nnye Israelƒuɔ ɔga kama na uunú ala taatásu-nwu?”

¹²Amu na bana kabla bablane bammɔ kemmo unwi údie kenye ɔnini, “Bula ɔdi biala uuunye ɔga ɔmmɔ kama. Mmomu Elisa, Katɔti Kenye Udiene ɔni nkya Israel mmɔ, mɔɔsu Israelƒuɔ ɔga ɔmmɔ kɔtɛ kɔni na aatɛmi na ƒula katɔma muedi.”

¹³Amu na ɔga ɔmmɔ úbo-ma ɔda ɔnini, “Biteesie bitáwia kesii kani na ɔkya. Na ndubɔtala bekyuli na betéƒie-nwu beboku-mi.” Amu na bésie na bébo bábasu-nwu banii, “Ɔkya Dotan.”

¹⁴Mmɔ na béti bekpone bani na bebo ɔyikun geen ku bani muulie bapɔnkɔ ku bapɔnkɔ kɛɛkɛ, na bátáka bámana ɔma ɔmmɔ usien.

¹⁵Amu ka Elisa kabla ɔblane ɔmmɔ ɔ́ta lɛdigye ni, ɔ́nu ka bekpone ku bani muulie bapɔnkɔ kɛɛkɛ báka bámana ɔma ɔmmɔ. Amu na kabla ɔblane ɔmmɔ ɔ́kpali nwuna ati na úye-nwu ɔnini, “O ati, bi na bɔdubo bɔbla?”

¹⁶Amu na Katɔti kenye udiene ɔmmɔ údie kenye ɔnini, “Tayia, ɔsika bekyuli bani nnye-bu kama betulo bani nnye-ma kama.”

¹⁷Amu na Elisa ɔ́kpali Katɔti ɔ́su-nwu ɔnini, “O Unwoti, bimi mina kabla ɔblane ɔmɛni anumi na ɔnu.” Mmɔ na Unwoti lɛnɔ úbimi kabla ɔblane ɔmmɔ anumi na ɔ́nu ka bapɔnkɔ ku bapɔnkɔ kɛɛkɛ lɛni mɔɔda ku ogya benye abi lɛlɔ na báka bámana Elisa.

¹⁸Uwi ɔni bekisine bammɔ báni beedé Elisa ni, Elisa ɔ́kpali Katɔti ɔ́su ɔnini, “Ya na bekyuli bamɛni anumi abwɛ-ma.” Na sɔsɔ anumi ábwɛ-ma aani kalɛ na Elisa úvele.

¹⁹Amu na Elisa ɔ́su bekisine bammɔ ɔnini, “Ɔɔɔdi ulu ɔmmɔ mɛni. Na ɔɔɔdi ɔma ɔmmɔ lɛnɔ na ɔdi. Bɛsiaku-mi na ndubuti-mii ntátina ɔnana ɔni na bɛɛwia.” Na ɔ́tɔnku-ma na bétédu Samaria.

²⁰Na ka béduo ɔma unengudi ɔmmɔ kemmo ni, Elisa ɔ́su Unwoti ɔnini, “Bimi bekyuli bamɛni anumi na basɔ bataanu!” Amu na Unwoti lɛnɔ úbimi-ma anumi. Na ka bátɛ anu ni, bánu ka bakya Samaria ɔma kemmo.

²¹Uwi ɔni na Israelƒuɔ ɔga ɔ́nu-ma ni, úye Elisa na lɛlɔ bɔtɔ kemmo ɔnini, “Mina ɔti, ndu-ma? Dɛ na aasu, ndu-ma?”

²²Amu na Elisa údie kenye ɔnini, “Tadu-ma. Bi ɔsu na ɔlɛka adu bekyuli bani na awɔ ɔlati éti ƒula kataminta ku kewii éƒie asiku kekpokɔ eboku ɔma? Se-ma adila ku ntu na badi na bani, na aya na benwini beteesie bana ɔtɔnkune kudɔ.”

²³Anwuɔsu ɔga ɔmmɔ lɛnɔ ɔ́nwa adila kaduɛ na bádi na báni. Na ka báwɔlɔ ni, ɔ́ya na bátɔlɔ. Na bénwini bésie bana ɔtɔnkune kudɔ. Na ɔ́si ɔmɛni ɔsu ni, Siriaƒuɔ básɔ bátata bétebo banii bébekpoku Israelƒuɔ na bana kalɔ lɛlɔ.

²⁴Uwi ɔdi kama ni, Siriaƒuɔ Ɔga Ben-Hadad ɔ́kpanku nwuna bekpone ƒui ka betékpoku Israelƒuɔ. Ɔmmɔ ɔsu bátáka Samaria ɔma ɔmmɔ bákya ntɛ.

²⁵Na ɔ́si kalɛ na báka bámana-ma na uwi útu ɔsu ni, adila litemi líbayu ɔkplu na mmɔ geen. Na si bádu ebuo ala utine ni, nwuna kuli lɛti kɔɔƒɔ́ sika ɔƒualadi antabi lɛkyami linwi unu. Na abloduma kuvodɔ ute kalɔ lɛmwi lɛɛƒɔ́ sika ɔƒualadi ebi alɔ.

²⁶Limeyi lɛdi ka Israelƒuɔ ɔga ɔ́si ɔɔví na ɔma awodu ammɔ eli ni, uleku ɔdi ɔ́va momoomo ɔ́su-nwu ɔnini, “Buvele bunku-mi, mina ɔga ku ati!”

²⁷Amu na ɔga ɔmmɔ údie kenye ɔnini, “Si Unwoti útete-ɔ kebunku ni, wɛ na ami ndubɔsiku kebunku lite-ɔ. Edula kewiilekɔ na kakpa munuu ntɛ kebulokɔ?”

²⁸Amu na ɔga ɔmmɔ úye-nwu ɔnii, “Bi muukpóku-ɔ?” Amu na uleku ɔmmɔ údie kenye ɔnini, “Uleku ɔni nnye-mi kudɔ mɛni násu-mi ɔnini, ‘Ti ƒ'ubidi boku na bɔdu bɔkun ɔmwi. Na kɔnaadi na bɔdu ami ɔdi lɛnɔ bɔkun.’

²⁹Ɔmmɔ ɔsu bɔ́du mina ubi na bɔ́nwa bɔ́di. Ka kadi kégye ni, lɛ́su uleku ɔmmɔ nnii, anwu lɛnɔ uti ubidi uboku na bɔdu bɔkun. Nsu úti ubidi ɔmmɔ útábɛla.”

³⁰Na ka ɔga ɔmmɔ únu litemi lɛmɛni ni, ɔ́bla-nwu kalɛ kadi. Anwuɔsu ɔ́ni nwuna awu ɔ́duli. Na ɔni na ɔkɛ awodu ammɔ lɛlɔ úsela ni, bekyuli bammɔ bánu-nwu básiku awodu kalɔ mmɔ ka ɔga ɔmmɔ ɔ́sabala adikpi ani mɔɔtina ka ɔkya kɔnyana buwulo kemmo.

³¹Amu na ɔga ɔmmɔ ɔ́su ɔnini, “Si ńtaya na bekulo Saƒat ubidi Elisa lili ɔmwi kadi asa na ɔƒɛ ɔ́sa ni, na Katɔti ɔni-mi kɔtu kpakplaa biala na ɔɔyɔ́!”

³²Ɔƒɛni ni, Elisa ulie nwuna kaduli anwu ku benengu badi asa na ɔga ɔmmɔ ɔ́tala nwuna batu na bágyu bátɔ-nwu anumi. Na asa na anwu ɔlati ɔdubɔda ɔlɛ ni, Elisa ɔ́su benengu bammɔ ɔnini, “Bilánu kalɛ na bekyuli ɔdune ɔmɛni ɔ́tala ukyuli ɔdi ka ubekulo-mi lili. Bɛnu, si nwuna ɔtalane ɔmmɔ úbo ni, na bɛkalɛ ɔtɔ ɔmmɔ bɛda-nwu na ɔtɔ ɔmmɔ uteenye lɛni. Na ɔɔɔdi anwu ɔlati lɛgba bɔnya na muunú ka lɛ́ku lɛdubo mmɔ na nwuna ɔtu ɔmmɔ kama?”

³³Na uwi ɔni na Elisa ɔmu ɔdaku bɔtɛmi kani na ɔga ɔmmɔ ɔtalane ɔmmɔ ɔ́da úbalɛ na ɔɔsu ka ɔga ɔnini, “Unwoti kudɔ na ɔgbankpi ɔmɛni ɔ́si. Na bi ɔsu na mɔɔsɔ linye ntaanu Unwoti anumi lɛnɔ?”