Read Lelemi Baga 2 7 Bible Online

Baga 2 7 - Lelemi bible

Baga 2 7

¹Amu na Elisa údie kenye ɔ́su-nwu ɔnini, “Se kɔtu na enu lɛla lɛni na Unwoti ɔɔsu. Kɔnaadi ɔƒaalɛ bene ni, ɔlaaƒɔ ntu ɔɔƒɛɛ ɔnidi bɔkɔku maatɛ ɔni mabla aani kalaku kenwi bɔkɔku kuye kɔdubɔbla sika ɔƒualadi ebi alɔ na Samaria ɔban kenye.”

²Mmɔ na ɔtɔnkune ɔni lɛlɔ na ɔga ukpo ɔ́su Elisa ɔnini, “Ɔmɛni ulakana walɛ kudii. Na ina Unwoti ɔlati ɔ́ya kakpa kána aani ɔnantu kalɛ muedi ulebo-nwu kemmo lɛni.” Amu na Elisa ɔ́su-nwu ɔnini, “Adubuti anumi anu ala ani mɔɔsu mɛni. Nsu alákɛ adila ammɔ adi aladi.”

³Banana inyɔ bani muuƒi ɔlɛgyie na béli Samaria awodu kɔyakun kama mmɔ básu lɛlɔ banini, “Bi kɔsia kɔdi-bu ɔsu na bɔmu bulie mɛni utédu ka kɔka kɔɔdu-bu?

⁴Na kɔsia kuuubo si búduo ɔma ɔmɛni kemmo. Ɔsika si búduo ni, kɔka kɔmmɔ kɔdubo-bu bɔdu kɔkya mmɔ. Na si buli mɛni lɛnɔ bɔdubukpi. Ɔmmɔ ɔsu bɛya na buteesie kesii kani na Siriaƒuɔ bekpone báda keliekɔ béli na buteti lɛlɔ bute-ma. Na si bányonu-bu ni, bɔdubulie ngba. Na si bátanyonu-bu lɛnɔ bɔdu na badubo-bu bɔdu.”

⁵Anwuɔsu uwi ɔni na kadi kese kalɔ kaayu ni, bátɔlɔ bésie Siriaƒuɔ kakyakɔ mmɔ. Nsu ka bétéduo mmɔ ni, ukyuli biala uuubo mmɔ.

⁶Ɔsika Unwoti ɔ́ya na bénu kɔkun bonwu kɔdi aani bekpone nli bapɔnkɔ ku bapɔnkɔ kɛɛkɛ lɛlɔ ndubo. Na Siriaƒuɔ básu lɛlɔ banii, “Israelƒuɔ ɔga nátákpanku Hetiƒuɔ ku Egyipteƒuɔ baga ku bana bekpone ka bebekpoku-bu.”

⁷Ɔmmɔ ɔsu useyi ɔmmɔ kani na Siriaƒuɔ békeli kalɛ na baládu-ma. Na báda bana adi ku lɛtɔ ku bapɔnkɔ ku bebuo ala betine bényene.

⁸Ka bekyuli bani muuƒi ɔlɛgyie mmɔ bédu mmɔ ni, bétéduo ɔtɔ unwi ɔdi kemmo na bádi na báni na mmɔ. Na béti bana sika ugyiedi ku ɔƒualadi ku bana adi na béti bátábɛla. Na ka bétédu adi ɔtɔ ɔbambadi kemmo lɛnɔ bábla lɛni kani.

⁹Nsu básu lɛlɔ banini, “Ɔlɛka bɔda ala amɛni bɔbla bɔya. Ɔsika buuunye bulábla lɛla lɛbuni. Ɔmwi kadi bubo litemi lɛbuni na utalɛ ka abu lɛti buti-ni bɔkya lɛlɔ. Na si bɔnii buulie na ɔtanta udu asa ni, bɔdubɔkɛ kɔtu bɔni. Ɔmmɔ ɔsu bɛya na buteesie ɔƒaani na butásu ɔga ku nwuna benengu.”

¹⁰Ɔmmɔ ɔsu bátɔlɔ Siriaƒuɔ kakyakɔ mmɔ na bénwini bésie Samaria. Na bápkali kayakun bagyumanane na básu-ma banini, “Búsie Siriaƒuɔ kakyakɔ na ka bútéduo ni, bútanu ukyuli biala. Na bútenu ukyuli biala lɛnɔ kɔku. Na bapɔnkɔ ku bebuo ala betine bani bákya kɔbuli bényene lɛnɔ bátaƒɛnimi-ma. Na kakyakɔ kammɔ kese aani kalɛ kani kese.”

¹¹Amu na kayakun bagyumanane bammɔ bégyingya litemi lɛmmɔ. Na litemi lɛmmɔ líduo ɔga kaduli.

¹²Mmɔ na ɔga ɔmmɔ ɔ́ta usien ɔmmɔ na ɔ́su nwuna kabla bablane ɔnini, “Mɔɔyɔ́ ka lɛsu-mii lɛla lɛni na Siriaƒuɔ bamɛni baayɔ́ ka babla-bu. Bagyi ka kɔka kɔɔda-bu. Ɔmmɔ ɔsu bátɔlɔ bana kakyakɔ bátábɛ alakpi akɔ. Ɔsika bágyi ka bɔdubɔlɛ ɔma ɔmɛni kemmo na butáwia adila. Na bálɛ bebo bebeƒie-bu enu ku enu. Na béduo bula ɔma unengudi ɔmmɔ kemmo.”

¹³Ɔmmɔ kama kabla bablane bammɔ kemmo unwi ɔ́su ɔga ɔnini, “Ya na beti bapɔnkɔ ɛlɔ bani bébu benye ɔma kemmo mmɔ. Na buti bekyuli bammɔ bɔbla aani Israelƒuɔ bani nébu iye aani bani nékpi. Na bɔtala-ma na batáwia lɛla lɛni nálɛ mmɔ kemmo.”

¹⁴Ɔmmɔ ɔsu bédie bekyuli badi na ɔga ɔmmɔ ɔ́su-ma ka besie batávi bawia na banu lɛla lɛni nálɛku Siriaƒuɔ bekpone bammɔ.

¹⁵Na batalane bammɔ bésie laa bétédu Yordan Ketu na lɛwu ku ala ani na Siriaƒuɔ bekpone bakya baada teewi ulu lɛlɔ uwi ɔni békeli bésela kani na bánu na ulu lɛlɔ. Ɔmmɔ kama bénwini na bábasu ɔga ala ani nálɛ.

¹⁶Na Samariaƒuɔ békeli bétéduo Siriaƒuɔ bekpone kɔkyakɔ kɔni báda béwi mmɔ. Na bábuma ala ammɔ ƒui. Na aani kalɛ na Unwoti ɔ́su úse ni, kakpa kani náƒɔ kuye akyami aavlanyɔ ni, beeyé-nya sika ɔƒualadi unwi.

¹⁷Ɔƒɛni ɔga ɔmmɔ úti nwuna ɔtɔnkune ɔni lɛlɔ na úkpo-nwu mmɔ únyene ɔma kayakun kammɔ kenye ka utaagyumana-ka. Na ɔ́si kalɛ na bekyuli bákya bánwanɛ lɛlɔ na kayakun kammɔ kenye ɔsu ni, bánya ɔga ɔtɔnkune ɔmmɔ bádu aani kalɛ na Kenye Udiene Elisa ɔ́su úse uwi ɔni na ɔga ɔmmɔ úsie útánu Elisa na nwuna kaduli.

¹⁸Úbo úte kalɛ na Kenye Udiene Elisa ɔ́su ɔtɔnkune ɔmmɔ úse ka kadi bugye uwi ɔmɛni kemmo badubuye kakpa kani kaƒɔ kuye akyami leevu iye ɔlaaƒɔ ɔni náƒɔ kuye akyami aavlanyɔ sika ɔƒualadi ubi unwi na Samaria ɔma kemmo.

¹⁹Na ɔtɔnkune ɔmmɔ údie kenye uwi ɔmmɔ ɔnini, “Ɔmɛni udu ulakana na webo wete lɛni. Ina banii Unwoti ɔ́ya na kakpa kana aani ɔnantu muedi.” Na Elisa údie-nwu kenye ɔnini, “Adubuti anumi anu ka úbo úte lɛni, nsu adila ammɔ adi elétuku-ɔ kenye.”

²⁰Na ɔmɛni ndi lɛla lɛni nálɛku ɔtɔnkune ɔmmɔ. Bekyuli bani nkya mɔɔnwanɛ lɛlɔ na kayakun kenye mmɔ nánya-nwu bádu na kayakun mmɔ.