Read Lelemi Baga 2 8 Bible Online

Baga 2 8 - Lelemi bible

Baga 2 8

¹Na uwi ɔmmɔ kemmo ni, Elisa ɔ́su Sunemni uleku ɔni ubidi nékpi na ɔ́sɔ ɔ́gyila-nwu mmɔ ɔnini, “Tɔlɔ mɛni ku ƒula kaduli bekyuli na biteesie kesii bamba kani na aayɔ́, na bitélie mmɔ uwi ɔdi, ɔsika Unwoti ɔ́ɔlɛ ugyii ka kɔka kubendi kɔdi kubo kalɔ kamɛni lɛlɔ akwa maatɛ.”

²Amu na uleku ɔmmɔ únu lɛla lɛni na Elisa ɔ́su-nwu mmɔ. Anwuɔsu anwu ku nwuna kaduli bekyuli bátɔlɔ na bétélie Ƒilistiƒuɔ kalɔ lɛlɔ akwa maatɛ.

³Ka akwa ammɔ édu áwɔlɔ ni, uleku ɔmmɔ ɔ́sɔ únwini úbo Israel kalɔ lɛlɔ. Na útévele ɔga ɔnii ɔsɔku nwuna kaduli ku kalɔ ƒui ute-nwu.

⁴Na uleku ɔmmɔ ɔ́nu ɔga ɔmmɔ ku Gehasi ɔni ndi Elisa kabla ɔblane ka bakya baatɛmi. Na ɔga ɔmmɔ ɔɔyɔ́ ka ɔ́ti akɔla budie taatina lidu lidu lɛni na Elisa ɔ́bla.

⁵Uwi ɔni na Gehasi ɔkya ɔɔsu ɔga ɔmmɔ kalɛ na Elisa ɔ́sɔku ukyuli ɔni nékpi mmɔ úboku ngba ni, kɔnakunwi kani na uleku ɔni ubi na ɔ́sɔku úboku ngba mmɔ ɔ́da úbalɛ ka uvele ɔga na ɔsɔku nwuna ala ute-nwu. Amu na Gehasi ɔ́su ɔga ɔmmɔ ɔnini, “Unengu, ku ɔga, aanu uleku ɔni ubidi nékpi na Elisa ɔ́sɔku-nwu úboku ngba ku ɔnamu ɔmmɔ ka benye mɛni.”

⁶Na ɔga ɔmmɔ úye uleku ɔmmɔ únu kalɛ na ɔ́lɛ, na uleku ɔmmɔ ɔ́sɔku ɔ́su-nwu. Amu na ɔga ɔmmɔ úti uleku ɔmmɔ litemi ɔ́kya nwuna unengu ɔdi lɛkɔkɔ na ɔ́su-nwu ɔnini, “Nu na basɔku nwuna ala bete-nwu ku egulabi ani ƒui na bákɛ básiku nwuna kalɔ kammɔ lɛlɔ ɔ́si uwi ɔni ɔ́tɔlɔ úbedu uwi ɔni na ɔ́sɔ únwini úbo mmɔ.”

⁷Limeyi lɛdi ni, Elisa úsie Damasko, na Siriaƒuɔ Ɔga Ben-Hadad uuƒi. Na básu ɔga banini, “Katɔti ukyuli ɔmɛni ɔ́si ɔgyu kakaaka ƒui úbo ɔkya mɛni.”

⁸Ɔ́ya na bálɔ Hasael na ɔ́su-nwu ɔnini, “Wia etela adi da na atánu Katɔti ukyuli ɔmmɔ na asia-nwu lɛlɔ na eye Unwoti ete-mi anini, ‘Ndubo bɔta ɔlɛ ɔni muuƒi mɛni?’ ”

⁹Ɔmmɔ ɔsu Hasael úsie Elisa kudɔ, na baƒlumu aavlene beti ala abuni geen ƒui ani na ɔ́wia ɔ́siku Damasko na ɔ́su Elisa ɔnini, “Ƒula ubidi Ben-Hadad ɔni ndi Siriaƒuɔ ɔga nátala-mi ɔni mbeye-ɔ ɔnini, ‘Ndubo bɔta ɔlɛ ɔni muuƒi mɛni?’ ”

¹⁰Amu na Elisa údie kenye ɔnini, “Unwoti údie ɔ́tina-mi ka ɔdubukpi. Nsu su-nwu ka ɔlɛ ɔmmɔ ɔdubɔba-nwu.”

¹¹Na Elisa unye ɔɔnu Hasael ɔnusɛ lɛni laa útédu ka kɔƒa kúkpo Hasael. Ɔmmɔ kama Katɔti ukyuli ɔmmɔ úsie kalɔ uuwulo.

¹²Amu na Hasael úye-nwu ɔnini, “Ati, bi ɔsu na eewulo?” Amu na Elisa údie kenye ɔnini, “Ɔsika ngyi kalala kani na adubo Israelƒuɔ bɔbla. Adubo ogya bɔtu bɔkya bana lɛma lɛni bátu awodu bamana, na adu bana bakloƒu na kuwii kenye, na eƒwimi bana banamu wɛlɛ wɛlɛ aƒiɛmi kalɔ, na aya na bawawa bana beleku baƒɔndane.”

¹³Amu na Hasael úye Elisa ɔnini, “Dɛ na ɔdubo bɔbla na ƒula kabla ɔblane ɔbla likpidi bonwu lɛmɛni udu ka lɛɛɛdi lɛla lɛdi na nse aani akpewe kani?” Amu na Elisa údie kenye ɔnini, “Unwoti údie ɔ́tina-mi ka awɔ ndubo Siriaƒuɔ ɔga bunwini.”

¹⁴Ɔmmɔ kama Hasael únwini úsie Ɔga Ben-Hadad kudɔ. Na ɔga ɔmmɔ úye-nwu ɔnii, “Bi na Elisa ɔ́su-ɔ?” Amu na Hasael údie kenye ɔnini, “Ɔ́su-mi ka adubɔta ɔlɛ ɔni na eeƒi.”

¹⁵Nsu ka kadi kégye ni, Hasael úti kuntu bonwu ɔdi ɔ́kya ntu kemmo na úti úbi ɔga ɔmmɔ anumi, na ɔmmɔ ɔ́ya na úkpi. Na nwuna kama Hasael úbelie-nwu kenye aani Siriaƒuɔ ɔga kalɛ.

¹⁶Na lɛkwa lɛlɔndi kemmo ɔni na Ahab ubidi Yoram ɔɔdi lɛga na Israel ni, bése Yehosaƒat ubidi Yehoram lɛnɔ lɛga na Yuda.

¹⁷Akwa avlaatɛ-inyɔ na Yoram ɔ́ƒɔ asa na úbenwini Yudaƒuɔ ɔga na Yerusalem, na úlie akwa maane ɔ́di lɛga lɛmmɔ.

¹⁸Ahab ubidi ulekubi na úti. Na ɔ́siaku Israel baga ɔbladu kama aani kalɛ na Ahab kaduli bekyuli bábla. Na ɔ́bla likpidi na Unwoti anumi.

¹⁹Nsu ɔkɛnku Dawid ɔsu ni, Unwoti ɔ́bla kasusu ka ulayila Yuda udu. Ɔsika úse nwuna kabla ɔblane Dawid kenye ka nwuna kaba bekyuli badubɔdi lɛga uwi ƒui na ɔya na asogya ɔdi utaada na nwuna lɛnyi kemmo uwi ƒui.

²⁰Na Yehoram lɛga bɔdi uwi ni, Edomƒuɔ báta bénye Yudaƒuɔ lɛlɔ na béni ka bakya-ma kalɔ. Anwuɔsu bése ama alati bana ɔga.

²¹Ɔmmɔ ɔsu, Yehoram úti nwuna bapɔnkɔ kɛɛkɛ ƒui útényene Sair. Edomƒuɔ bekpone báka bámana nwuna bapɔnkɔ kɛɛkɛ lɛmmɔ ku bana lɛlɔ banune ƒui. Nsu usien ɔmmɔ ni, báta na báwia kuƒi na básia bálɛ ntɛ mmɔ bátɔlɔ. Na nwuna bekpone bégyingya bátɔlɔ bésie bana kɔduli.

²²Na ɔ́si uwi ɔmmɔ ƒui ni, Edomƒuɔ beli béte lɛlɔ. Na uwi ɔmmɔ kemmo kani ni, Libnaƒuɔ lɛnɔ béni ka bakya-ma kalɔ.

²³Na ala bamba ani ƒui na Ɔga Yehoram ɔ́sɔ ɔ́bla ni, bénweni-nya bákya Yudaƒuɔ baga lɛlɔ kɔtɛ ɔku kemmo.

²⁴Na Yehoram úkpi na báva-nwu na Dawid ɔma unengudi baga kavakɔ. Na ubidi Ahasia úti-nwu keliekɔ aani ɔga kalɛ.

²⁵Na lɛkwa leevu-linyɔdi lɛni na Yoram ɔni ndi Ahab ubidi ɔɔdi lɛga na Israel ni, Yudaƒuɔ Ɔga Yehoram ubidi Ahasia lɛnɔ úse kalɔ ɔɔdi lɛga na Yuda.

²⁶Na ka Ahasia ɔ́kɛ akwa aavlanyɔ-inyɔ ni, úse kalɔ ku nwuna lɛga bɔdi na ɔ́di lɛga na Yerusalem lɛkwa linwi. Na uni baalɔ Atalia ɔni ndi Israelƒuɔ Ɔga Omri ubidi.

²⁷Ahasia ɔ́siaku Ɔga Ahab kaduli bekyuli ala ɔbladu kama na ɔ́bla likpidi na Unwoti anumi, ɔsika ama ku-nwu bákya kɔna na uleku ɔni na úti ɔ́siku-ma kudɔ ɔsu.

²⁸Ɔƒɛni Ahasia ku Ahab ubidi Yoram bésie bétékpoku Siriaƒuɔ Ɔga Hasael na Ramot-Gilead. Na kekpo kammɔ kemmo ni, Asiriaƒuɔ bákya Ɔga Yoram ɔlɛ lɛlɔ,

²⁹anwuɔsu únwini úsie ɔma unengudi ɔni baalɔ banii Yesreel ka utábwi lɛlɔ. Na Ɔga Ahasia úsie mmɔ ka útánu-nwu na ɔlɛ ɔni na ɔ́ƒɔ ɔsu.