Read Lelemi Ala Alɛdi 1 10 Bible Online

Ala Alɛdi 1 10 - Lelemi bible

Ala Alɛdi 1 10

¹Amu na Ƒilistiƒuɔ békpoku Israelƒuɔ na baabɔku-ma geen na bana anumi na bádu bana akɔ pii lɛnɔ na Gilboa Kɔbi lɛlɔ.

²Nsu Ƒilistiƒuɔ bábi básiaku-ma na béƒie Saul bebi ɛtɛ na bádu-ma. Na bebi ɛtɛ bamɛni ndi Yonatan ku Abinadab ku Malki-Saul.

³Na kekpo kammɔ kébo kaayú ɔkplu na kesii kani na Saul ɔkya. Na Saul bekisine kemmo unwi ɔ́ta kataminta úbalɛ-nwu na nwuna ɔ́ƒɔ ɔlɛ geen.

⁴Amu na Saul ɔ́su nwuna ekpola ala utine ɔnini, “Ni ƒula kewii kpa livuo kemmo na atu-mi adu, kalɛ na kadi bamba bekyuli bani na bétekulo-ma ago mɛni balábadu-mi na bataakun lɛmɛnɛ teedumi-mi.” Nsu Saul ekpola utine ɔmmɔ ɔ́yia ka ɔbla lɛni. Anwuɔsu Saul údie anwu ɔlati nwuna kewii na úbuli útébi-ka lɛlɔ.

⁵Amu ka nwuna ekpola ala utine ɔ́nu ka Saul úkpi ni, anwu lɛnɔ ɔ́kpa nwuna kewii na úbuli útébi-ka lɛlɔ, na úkpi.

⁶Anwuɔsu Saul ku nwuna bebi ɛtɛ békpi basala. Na nwuna kaba kadi kátadi lɛga kudii.

⁷Na ka Israelƒuɔ bani beli kɔwɛ kemmo mmɔ bénu ka bekpone bammɔ ƒui békeli ni, békeli na báda bana lɛma béwi. Amu na Ƒilistiƒuɔ bébo na bébelie bana lɛma lɛmmɔ kemmo.

⁸Kadi kegye ni, ka Ƒilistiƒuɔ bésie bani bétedie bekpine bammɔ adala ni, mmɔ na bánu Saul ku nwuna bebi ka békpi bátɛ Gilboa Kɔbi lɛlɔ.

⁹Békulo-nwu lili na bédie nwuna ekpola ani na ɔkya na bátala batu na bávi Ƒilistiƒuɔ lɛma ƒui básu kenye kamɛni na bana baƒiɔ kakpakɔ ku bekyuli ƒui akɔ.

¹⁰Amu na béti Saul kekpo adala bétese bana baƒiɔ ɔtɔ unwi kemmo. Na béti nwuna lili bátaƒala bana baƒiɔ bani baalɔ-ma banii Dagon ɔtɔ kemmo.

¹¹Na ka bekyuli bani beli Yabes ɔni nnkya Gilead bénu kalɛ na Ƒilistiƒuɔ bábla Saul ni,

¹²bana bekpone bani mbo kayi geen bésie na béteti Saul ukpine ku nwuna bebi béboku Yabes. Na báva-ma na kugyii kubendi kɔdi kalɔ. Na bekyuli bammɔ bényimi kenye emeyi maatɛ.

¹³Na Saul úkpi, ɔsika útasiaku Unwoti siin. Na úni Unwoti ɔda bubo na úsie like bebone kudɔ ka úteye ala únu muedi.

¹⁴Ɔni na Unwoti kudɔ na nka ɔlɛka úsie mmomu. Ɔmmɔ ɔsu, Unwoti ɔ́du-nwu. Na únwini lɛgadi lɛmmɔ úte Yisai ubidi Dawid.