Read Lelemi Ala Alɛdi 1 12 Bible Online

Ala Alɛdi 1 12 - Lelemi bible

Ala Alɛdi 1 12

¹Na banana bamɛni nébo Dawid kudɔ na Siklag uwi ɔni na úkeli Kis ubidi Saul. Na bekpone bamɛni bebunku bekyuli bani nénye-ku Dawid na békpo kekpo.

²Bebo kɔtaminta, na baakana-ku bubo geen. Na bagyi atabi lɛnɔ buƒwimi kaduɛ kɔmii ku kɔdianu. Na badi Saul lɛlɔ bekyuli bani nási Benyamin kaba kemmo akɔ.

³Na Ahieser ndi bana ɔtɔnkune na Yoas ku Asmawet bebi Yesiel ku Pelet ku Beraka ku Anatotni Yehu

⁴ku Gibeonni Ismaia ɔni ndi ukpone na nkyuli avlaatɛ bammɔ kemmo ku Yeremia ku Yahasiel ku Yohanan ku Gederani Yosabad

⁵ku Elusai ku Yerimot Bealia ku Semaria ku Haroƒini Seƒatia

⁶ku Elkana ku Yesia ku Asarel ku Yoeser ku Yasobeam ku Koraƒuɔ

⁷ku Yoela ku Sebadia ku Yeroham ɔni nási Gedorƒuɔ akɔ.

⁸Gadƒuɔ badi bámami lɛlɔ bétébunku Dawid na nwuna kagyumanakɔ kpakplaa kani na úsie ɔkya na ketele kalɔ kakwiidi kemmo. Na badi bekpone bani mbo kayi na benye kagyumana bete kekpo, na bagyi atula ku kayi lɛgyumanala bɔda kaduɛ. Bekyuli bamɛni anumi álɛ bagyata anumi, na bebo ababla aani lɛku kemmo abi lɛlɔ bakwa.

⁹Eser ntɔ na Obadia ɔsia-nwu kama na Eliab ɔsia ɔtɛdi.

¹⁰Na Mismana ɔsia unedi na Yeremia ɔsia ɔlɔndi.

¹¹Na Atai ɔsia ɔkundi. Na Eliel ɔsia maatɛdi.

¹²Na Yohanan ɔsia maanedi. Na Elsabad ɔsia yaalenwidi.

¹³Na Yeremia ɔsia leevudi. Na Makbanai ɔsia leevu-unwidi.

¹⁴Na Gadƒuɔ bekpone bamɛni badi bekpone batɔnkune. Na bani ndi bayikune geen baatɔnku bekpone apim na bani nsia baatɔnku eti anyɔ.

¹⁵Na ama ndi bekyuli bani na bávia bésie Yordan Ketu bésie ɔvi ɔni ngye uwi ɔni na ketu kammɔ kéyi ku atu na kɔbuli kedeedi kemmo bátábɔku bekyuli bani ƒui nli kɔwɛ kemmo ɔ́si ɔƒɛ katukɔ útédu kanukɔ.

¹⁶Benyamin ku Yuda kaba bekyuli badi lɛnɔ bébo Dawid kudɔ na nwuna kagyumanakɔ na kesii kani na ɔkya.

¹⁷Amu na Dawid úsie útásiaku-ma na ɔ́su-ma ɔnini, “Si atubɔyɔ kemmo na bɛkɛ bibo ka bibebunku-mi ni, nnye kagyumana ka lɛƒɔ-mii libunku lɛlɔ. Nsu si bubo na bíbo bɛnii bibedie-mi bite mina bekisine ɔni na mina enu ese sɛɛn na ńtabla likpidi lɛdi bɔdi ni, na muuvele bula bati Katɔti nnii, ɔtɛku-mii litemi lɛmmɔ.”

¹⁸Mmɔ na Katɔti kɔyu kɔ́ƒɔ Amasai bekpone avlaatɛ ɔtɔnkune kemmo na ɔ́su ɔnini, “O Dawid! Bɔdi ƒula badi. O Yisai ubi! Bunye-ɔ kama. Keyi buɛɛ kasiaku-ɔ na kasɔ kasiaku-ɔ! Keyi buɛ kasiaku bekyuli bani muute-ɔ kebunku. Ɔsika ƒula Katɔti ɔdubute-ɔ kebunku.” Anwuɔsu ɔ́ƒɔ-ma úbunku nwuna bekpone lɛlɔ. Na ɔ́bla-ma bekpone batɔnkune.

¹⁹Bekpone badi bási Manase kaba kemmo na bébo bébenye Dawid kama uwi ɔni na ɔ́siaku Ƒilistiƒuɔ ka bétékpoku Ɔga Saul. Nsu geen ni, bétebunku Ƒilistiƒuɔ kekpo kammɔ. Ɔsika Ƒilistiƒuɔ batɔnkune básu banini, “Bɔdubɔyii udu si Dawid ɔ́sɔ ɔ́blaku Ɔga Saul unwi.”

²⁰Uwi ɔni na Dawid úsie Siklag ni, Manase kɔdua bekyuli bani námami lɛlɔ bétébunku ndi Adna ku Yosabad ku Yediael ku Mikael ku Yosabad ku Elihu ku Siletai na badi bekpone bani nátɔnku bekpone apim apim Manase kɔdua bekpone akɔ.

²¹Na bébunku Dawid na békpoku bekpone bamba bani mɔɔta kekpo teebile ala ɔsika bebo kayi na beekpó geen, na úti-ma ɔ́bla batɔnkune.

²²Na limeyi ndi limeyi ni, bekpone béebo teebebunku Dawid útédu ka ɔ́kɛ bekpone bayikune lisu bonwu lɛdi.

²³Na bekpone bani nébo bébebunku Dawid na Hebron na bekpo baƒɔ Saul lɛgadi bete Dawid aani kalɛ na Unwoti ɔ́su úse bumomo ndi bamɛni.

²⁴Bekyuli bani nási Yuda kaba kemmo na báda agyumanala ku atula na báklibi lɛlɔ béte kekpo bumomo bɔdi mpim ɛku ku eti leevu-aku (6,800).

²⁵Na bani nási Simeon kaba kemmo na báklibi lɛlɔ béte kekpo bumomo bɔdii mpim maatɛ ku eti anyɔ (7,100).

²⁶Bani nási Lewi kaba kemmo bumomo bɔdi mpim ine ku eti leevu-anyɔ (4,600)

²⁷úbunku Yehoiada ɔni ndi Aaron kaba bekyuli ɔtɔnkune na bana bumomo bɔdi mpim ɛtɛ ku eti leevu-ene (3,700)

²⁸ku Sadok ɔni ndi okloƒu ukpone ɔni mbo kayi na ubo bekpone benengu aavlanyɔ-inyɔ

²⁹ku bani nási Benyamin kaba kemmo na badi Saul lɛlɔ bekyuli lɛti bumomo bɔdi mpim ɛtɛ (3,000) na nka ketulodikɔ bámu benye Saul kama úti úbedu uwi ɔmmɔ lɛlɔ.

³⁰Na Eƒraim kaba bekyuli kakɛ bani na bálɛ ugyii ka bésie na mbo kayi na badi bekpone na báƒɔ lɛnyi bumomo bɔdi mpim aavlanyɔ ku eti leevu-aku (20,800).

³¹Na Manase kaba kemodi kakɛ kenwi bani na básia lɛnyi ka besie na bétése Dawid lɛga bumomo bɔdi mpim leevu-mane (18,000).

³²Na Isakar kaba kemmo bekyuli bani nánu uwi ɔmmɔ kemmo ala báti na bagyi lɛla lɛni ndubɔlɛ kɔsia bebo batɔnkune bumomo eti ene (200) ku bana lɛlɔ bekyuli bani na lɛlɔ na baadi.

³³Na Sebulon bekpone bani na bagyi kekpo kɔkwɛ na baakana taada ekpola biala na básu ka Dawid kama kani badubunye na bebunku-nwu bumomo bɔdi mpim liti (50,000).

³⁴Na Naƒtali bekpone batɔnkune umomo bɔdi apim unwi (1,000) na bani ngyi lɛgyumanala ku atula bubo bumomo bɔdi mpim avlaatɛ maatɛ (37,000).

³⁵Na Dan kaba badi bani na báklibi lɛlɔ béte kekpo bumomo bɔdi mpim aavlanyɔ-maane ku eti leevu-anyɔ (28,600).

³⁶Na Aser kaba bekyuli bekpone bani na bagyi bukpo na baklibi lɛlɔ béte kekpo bumomo bɔdi mpim aavlene (40,000).

³⁷Na Yordan ɔƒɛ katukɔ kakɛ ƒui ni, bekyuli bani nási Ruben ku Gad ku Manase kaba bekyuli kakɛ kenwi kemmo na báda lɛlɔ ku ekpola udu biala bumomo bɔdi mpim eti anyɔ ku aavlanyɔ (120,000).

³⁸Na bekyuli bamɛni ƒui ndi bekpone bani néti lɛlɔ béte ƒaa ka besie na betékpo. Na bana ƒui bébo Hebron ka bébese Dawid lɛga na ɔdi Israel ƒui lɛlɔ. Na lɛni kani na Israelƒuɔ bakladi ƒui bada kasusu kenwi ka bése Dawid lɛga.

³⁹Na bekyuli bammɔ bádi emeyi atɛ na Dawid kudɔ mmɔ. Na baadi na baaní ɔsika bana kɔduli bekyuli béte-ma adila ku anila na bada bésienku mmɔ.

⁴⁰Lɛnɔ ni, bana liku bekyuli bani na bási ɔgyu ƒui aani Sebulon ku Isakar ku Naƒtali kaba bekyuli béti adila pii básia bana bebuo ala betine lidu lɛlɔ béboku-ma. Na ɔlaaƒɔ ku ala agyidi lidu lidu ku ntɛ ku nnɔmii ku ɔmantɛ bakɔ ku baƒonu bábu. Na sɔsɔ ni, ebiti ákya Israel.