Read Lelemi Ala Alɛdi 1 13 Bible Online

Ala Alɛdi 1 13 - Lelemi bible

Ala Alɛdi 1 13

¹Amu na Dawid ɔ́ni úde bekpone batɔnkune bani mɔɔnu bekpone esu mpim mpim lɛlɔ ku bekpone esu eti anyɔ anyɔ lɛlɔ.

²Na ɔmmɔ kama ɔ́su Israelƒuɔ ƒui ɔnini, “Si ɔdia-mii na ɔdi bula Unwoti Katɔti lɛyɔla ni, na buti kenye bumene bula banwani bani na bégyingya bákya Israel lɛmii lɛlɔ. Na bɔsɔ buti kadi lɛnɔ bumene bakpane ku Lewiƒuɔ bani nnkya-ma kudɔ na bana lɛma ku bebuo kɔdikɔ. Na bebebunku-bu

³na busie na butaƒɔ Unwoti Bunyimi Adaka ɔni na bɔ́sɔ búteye lili kudii ɔ́su uwi ɔni na Saul ɔɔdi lɛga mmɔ.”

⁴Amu na bekyuli bammɔ ƒui bénu kalɔ ka bádubusie ɔsika ɔdia-ma lɛni.

⁵Anwuɔsu Dawid ɔ́lɔ Israelƒuɔ bammɔ ƒui ɔ́siku Sihor Ketu kudɔ na Egyipte útédu Hamat ka bésie betéti Bunyimi Adaka ɔmmɔ basiku Kiriat-Yearim.

⁶Na Dawid ku bekyuli bammɔ ƒui bésie Yudaƒuɔ ɔma ɔni ndi Baala na basɔ baalɔ-nwu Kiriat-Yearim ka bátaƒɔ Katɔti Bunyimi Adaka ɔni na Unwoti lɛnyi lɛ́sia-nwu lɛlɔ na unye bebweyi badi udu ku avwi lɛlɔ na baalɔ-ma Kerub.

⁷Bététi Katɔti Bunyimi Adaka ɔmmɔ básiku Abinadab kaduli. Na béti adaka ɔmmɔ básia kɛɛkɛ ɔwɔdi ɔdi lɛlɔ. Na Usa ku Ahio bákya báagyumana kɛɛkɛ ɔmmɔ.

⁸Na ulu lɛlɔ ni, Dawid ku Israelƒuɔ bammɔ bakɛ beemwi Katɔti ku agya. Na beedie lɛnu na baatɔ́. Bada lɛbentaa ku ebi ku enukpɛ agyala ku abambadi baagyá ku kɔkpɛɛ.

⁹Uwi ɔni bédu Kidon kakpa kesii kani beewiile edula ebi ni, Usa údie kɔnu ɔnii uunyene adaka ɔmmɔ ɔsika ebuo ɔni nti adaka ɔmmɔ ɔ́gbanta.

¹⁰Amu na Unwoti ɔ́kɛ kɔnyi ɔ́kya Usa na ɔ́ƒiɛmi-nwu ɔ́va kalɔ ka útuku adaka ɔmmɔ ɔsu. Anwuɔsu úkpi na Unwoti anumi mmɔ.

¹¹Dawid ɔ́kɛ kɔnyi na Unwoti kɔnyi kɔni na úti ɔ́kya Usa mmɔ ɔsu ɔ́si kɔnyi kɔni na Unwoti úti ɔ́kya Usa ɔsu. Anwuɔsu úti úbedu ɔmwi ni, kesii kammɔ baalɔ bani Peres-Usa

¹²Limeyi lɛmmɔ ni, Dawid ɔ́yia Katɔti geen na úye ɔnini, lɛlɔ ɔnini, “Dɛ na ndubɔbla na liti Bunyimi Adaka ɔmɛni lisienku mina kaduli?”

¹³Anwuɔsu Dawid úteti Bunyimi Adaka ɔmmɔ útesienku Yerusalem. Mmomu ɔ́da-nwu úse ɔnana ɔdi baalɔ banii Obed-Edom kaduli na ɔdi Gatni.

¹⁴Na Unwoti Bunyimi Adaka ɔmmɔ úse Obed-Edom kaduli kammɔ abuli atɛ. Na Unwoti úte Obed-Edom kaduli kusɛ kusɛ na lɛla biala baabla kemmo.