Read Lelemi Ala Alɛdi 1 14 Bible Online

Ala Alɛdi 1 14 - Lelemi bible

Ala Alɛdi 1 14

¹Na uwi ɔmmɔ kemmo ni, Ɔga Hiram ɔni mɔɔdi lɛga na Tiro ɔ́tala bekyuli badi úmene Dawid. Na béti egyii kpakplaa etenku ku banwine ku bani ngyi kalɛ na baatú atabi lɛtɔ kalɛ na bátátu keliekɔ kabuni geen béte-nwu.

²Na ɔƒɛni Dawid ɔ́nu ɔ́ti ka Unwoti ɔ́ya na nwuna lɛga lɛni na ɔɔdi na Israel línye kpi. Na ɔ́kɔliku nwuna lɛgadi lɛmmɔ katɔ geen ɔsi Israelƒuɔ ɔsu.

³Uwi ɔni na Dawid ɔɔdi lɛga na Yerusalem ni, úti beleku pii na ɔmmɔ ɔsu ɔ́kɛ bebi bananabi ku belekubi pii.

⁴Na bebi bani na ɔ́wɔ na mmɔ ndi bamɛni, Samua ku Sobab ku Natan ku Salomo

⁵ku Yibhar ku Elisua ku Elpelet

⁶ku Noga ku Neƒeg ku Yaƒia

⁷ku Elisama ku Eliada ku Eliƒelet.

⁸Uwi ɔni na Ƒilistiƒuɔ bénu ka bése Dawid lɛga ka utaadi Israelƒuɔ ƒui lɛlɔ ni, bana bekpone ƒui bátu akpagya ka batawia-nwu na bekpoku-nwu. Nsu Dawid únu litemi lɛmmɔ na anwu lɛnɔ ɔ́ta ka utekpoku-ma.

⁹Ɔƒɛni ni, Ƒilistiƒuɔ bébo bakya Reƒaim Kɔwɛ kemmo na bakya beebile ala na mmɔ.

¹⁰Ɔmmɔ ɔsu Dawid úye ɔ́siku Katɔti kudɔ ɔnini, “Nteesie ntékpoku Ƒilistiƒuɔ? Adubɔnyonu-ma akya-mi enu kemmo?” Amu na Unwoti údie kenye ɔnini, “Teesie na ndubuti-ma lɛkya-a enu kemmo.”

¹¹Anwuɔsu Dawid ku nwuna bekpone báta bésie Baal-Perasim. Na mmɔ na bátádi Ƒilistiƒuɔ lɛlɔ. Na Dawid ɔ́su ɔnini, “Kalɛ na ntu bɔɔbwɛ taalɛ kesii kadi ni, lɛni na Katɔti ɔ́bwɛ ɔ́lɛ mina bekisine lɛlɔ na úti-ma ɔ́kya-mi enu kemmo.” Ɔmmɔ ɔsu kesii kammɔ baalɔ bani Baal-Perasim.

¹²Na Ƒilistiƒuɔ báda bana baƒiɔ báva mmɔ. Na Dawid ɔ́ya na bákyula-ma.

¹³Limeyi lɛdi lɛnɔ ni, Ƒilistiƒuɔ básɔ báta bésie kɔwɛ kɔmmɔ kemmo.

¹⁴Ɔmmɔ ɔsu Dawid ɔ́sɔ úye Katɔti únu lɛla lɛni na ɔbla. Na Katɔti údie-nwu kenye ɔnini, “Bítesie siin. Mmomu bɛka bɛmana-ma na bikpoku-ma na kugyii kubendi kɔmmɔ anumi mmɔ.

¹⁵Na si bɛnya binu kɔku ka ɔbla aani bekyuli esie mɔɔví kugyii kubendi kɔmmɔ katɔ kakɛ na bikeli bitekpoku-ma. Ɔsika ɔmɛni ndubɔtina ka Katɔti ɔ́gyu ɔ́tɔ bina anumi útekpoku Ƒilistiƒuɔ bammɔ.”

¹⁶Ɔmmɔ ɔsu Dawid ɔ́bla kalɛ kani na Unwoti úbo-nwu ɔda. Na békpo bádi Ƒilistiƒuɔ bekpone lɛlɔ. Ɔsi Gibeon utédu Geser.

¹⁷Anwuɔsu Dawid ɔ́ƒɔ lɛnyi na kalɔ kammɔ ƒui lɛlɔ. Na Unwoti ɔ́ya kadi ƒui baayia-nwu.