Read Lelemi Ala Alɛdi 1 15 Bible Online

Ala Alɛdi 1 15 - Lelemi bible

Ala Alɛdi 1 15

¹Uwi ɔni na Dawid ɔ́tu lɛtɔ úte lɛlɔ ɔ́wɔlɔ na kesii baalɔ Dawid ɔma unengudi ni, ɔ́klibi kesii kadi lɛnɔ úte Katɔti Bunyimi Adaka. Na ɔ́tu Adi Kevo úte-nwu.

²Ɔmmɔ kama Dawid ɔ́su ɔnini, “Ukyuli biala útalɛka uti Katɔti Bunyimi Adaka ɔmɛni amu ntu Lewiƒuɔ kani, ɔsika ama na Unwoti ɔ́ƒuna ka beteeti Bunyimi Adaka ɔmmɔ. Na bataabla akpala na nwuna anumi uwi ƒui.”

³Amu na Dawid ɔ́lɔ Israelƒuɔ ƒui ɔ́sala na Yerusalem na ɔ́su-ma ka betéti Katɔti Bunyimi Adaka ɔmmɔ beboku. Na uti use kesii kani ɔ́klibi úse úte-nwu.

⁴Na ɔ́lɔ Aaron kaba bekyuli ƒui ɔ́sala ku Lewiƒuɔ bamɛni.

⁵Na ɔ́si Kehat kaba kemmo ni, Uriel ndi bana ɔtɔnkune na nwuna banwani bumomo bɔdi eti anyɔ ku aavlanyɔ (120).

⁶Na ɔ́si Mereri kaba kemmo ni, Asaia ndi bana ɔtɔnkune na bana bumomo bɔdii, eti ene ku aavlanyɔ (220).

⁷Na ɔ́si Gerson kaba kemmo ni, Yoel ndi bana ɔtɔnkune na bana bumomo bɔdii eti anyɔ ku avlaatɛ (130).

⁸Na ɔ́si Elisaƒan kaba kemmo ni, Semaia ndi bana ɔtɔnkune na bana bumomo bɔdi eti ene (200).

⁹Na ɔ́si Hebron kaba kemmo ni, Eliel ndi bana ɔtɔnkune na bana bumomo bɔdi liti ku avlaatɛ.

¹⁰Na ɔ́si Usiel kaba kemmo ni, Aminadab ndi bana ɔtɔnkune na bana bumomo bɔdi eti anyɔ ku leevu-inyɔ (112).

¹¹Ɔmmɔ kama ni, Dawid ɔ́lɔ bakpane Sadok ku Abiatar ku Lewiƒuɔ bamɛni, Uriel ku Asaia ku Yoel ku Semaia ku Eliel ku Aminadab

¹²na ɔ́su-ma ɔnini, “Amii ndi Lewiƒuɔ atɔƒi amɛni benengu anwuɔsu amii Lewiƒuɔ banwa bakladi ni, ɔlɛka bikisi lɛlɔ na bɛbla lɛlɔ bɔbla sɛɛn ɔdi ɔmmɔ na bitéti Unwoti Bunyimi Adaka ɔni ndi Israelƒuɔ Katɔti mmɔ biboku na biti bibese kesii kani na lɛ́klibi líte-nwu mɛni.

¹³Amii ɔsu na Unwoti ɔ́kɛku-bu kɔnyi kukpidi kɔmmɔ ɔsika ɔɔɔdi amii nágyu Adaka ɔmmɔ kudeedi na búteye Unwoti lɛnɔ bútenu ulu ɔni lɛlɔ na bɔsia bɔgyu Adaka ɔmmɔ kalɛ na ɔɔyɔ́.”

¹⁴Anwuɔsu bakpane ku Lewiƒuɔ bammɔ békisi lɛkɔ bábla lɛlɔ bɔbla sɛɛn ɔdi kalɛ na bakana beti Unwoti ɔni ndi Israelƒuɔ Katɔti Bunyimi Adaka ɔmmɔ.

¹⁵Na béti Bunyimi Adaka ɔmmɔ básia ligyii lɛlɔ na bágyu básia amangba aani kalɛ na Mose ɔ́tina-ma ka babla.

¹⁶Amu na Dawid ɔ́su batɔnkune bammɔ ɔnii baƒuna Lewiƒuɔ badi na beteedie lɛnu na bataagya agyala na lɛbentaa ku kɔbuli agyala bamba lɛlɔ ku enukpɛ agyala.

¹⁷Ɔmmɔ ɔsu Lewiƒuɔ bammɔ báƒuna Yoel ubidi Heman na nwuna banwani akɔ. Na báƒuna Asaƒ ɔni ndi Berekia ubidi. Na báƒuna Kusaia ubidi Etan na nwuna banwani akɔ na Merare kɔdua kemmo.

¹⁸Na bamanyene bani lɛnɔ mbunku-ma ndi Sekaria ku Yaasiel ku Semiramot ku Yehiel ku Uni ku Eliab ku Benaia ku Maaseia ku Matitia ku Eliƒelehu ku Mikneia ku Obed-Edom ku Yeiel.

¹⁹Na bagyane Heman ku Asaƒ ku Etan ni, ama ndubɔgya enukpɛ agyala ani ndi abuala egyiedi.

²⁰Na Sekaria ku Asiel ku Semiramot ku Yehiel ku Uni ku Eliab ku Maaseia ku Benaia ni, ama ndubo kɔbuli agyala eblidi bɔgya.

²¹Na Matitia ku Eliƒelehu ku Mikneia ku Obed-Edom ku Yeiel ku Asasia ni, ama ndubo kɔbuli agyala enengudi bɔgya.

²²Na Kenania na báƒuna ka ɔnu lɛnu bɔtu ku bɔgya kabla kammɔ lɛlɔ, ɔsika ɔgyi kɔgya lɛlɔ ala geen.

²³Ɔmmɔ kama báƒuna Berekia ku Eldana ka bataagyumana Bunyimi Adaka ɔmmɔ kayakun.

²⁴Na bakpane bani ndi Sebania ku Yosaƒat ku Netanel ku Amasai ku Sekaria ku Benaia ku Elieser ni, ama ndubunye bunye adaka ammɔ anumi bataavwi kɔkpɛɛ. Na Obed-Edom ku Yehia lɛnɔ badubo bubunku bani mɔɔgyumana Bunyimi Adaka ɔmmɔ kayaku lɛlɔ.

²⁵Anwuɔsu Dawid ku Israel benengu bammɔ ku bekpone batɔnkune bammɔ bakɛ ku lɛlɔyɔ ka bésela Obed-Edom kaduli betétiku Bunyimi Adaka ɔmmɔ.

²⁶Na Katɔti úte Lewiƒuɔ bammɔ ɔlɔkplu ku ɔyikun ɔni na badubuti beti Bunyimi Adaka ɔmmɔ, anwuɔsu bádu ɔmantɛ bakɔ maatɛ ku baƒonu bagyani maatɛ béti bákpa.

²⁷Na Dawid ku Lewiƒuɔ bani nti Bunyimi Adaka ɔmmɔ ku Kenania, kɔgya lɛlɔ ɔnune ɔmmɔ, ku lɛnu bediene bammɔ ƒui bakya lɛwu gyɔlɔɔ kpɛtɛ kpɛtɛ.

²⁸Na uwi ɔni na beti Bunyimi Adaka ɔmmɔ na beeduo Yerusalem ni, ukyuli biala ɔɔva ku lɛdi momoomo na baagyá agyala ku bebuo ese ku kɔkpɛɛ ku enukpɛ agyala ku lɛbentaa ku kɔbuli agyala bamba lidu lɛnɔ.

²⁹Amu na Saul ubidi ulekubi ɔni ndi Dawid beleku akɔ unwi údie lili ɔ́siku nwuna ƒansili na ɔ́nu ka beti adaka ɔmmɔ badububoku Dawid ɔma unengudi kemmo. Na ka ɔ́nu kalɛ na Dawid ɔɔtɔ́ ku lɛlɔyɔ ni, Dawid ala ékpi-nwu ɔkwɛ kɔnakunwi.