Read Lelemi Ala Alɛdi 1 16 Bible Online

Ala Alɛdi 1 16 - Lelemi bible

Ala Alɛdi 1 16

¹Na uwi ɔmmɔ ni, béti Bunyimi Adaka ɔmmɔ bébese kevo kani na Dawid ɔ́tu úte Bunyimi Adaka ɔmmɔ kemmo. Na bábla bɔkyula ƒui akpala ku unwi bɔbla akpala lɛnɔ béte Katɔti.

²Na ka Dawid ɔ́wɔlɔ ala amɛni bɔbla ni, úvele ka Unwoti kusɛ kusɛ ɔsiaku bekyuli bammɔ.

³Na úte bekyuli bammɔ ƒui ɔdi biala bodobodo umodi unwi ku lɛna lɛdi ku egyiibi lidu kangyiɛ.

⁴Amu na Dawid ɔ́ƒuna Lewiƒuɔ badi ka benye bataabla kabla kadi na Bunyimi Adaka ɔmmɔ kudɔ na beteevele Katɔti ala na beteemwi-nwu na bataagya-nwu enu lɛnɔ.

⁵Na Asaƒ ndi bana ɔtɔnkune na Sekaria ɔdi nwuna ubunkune. Yeiel ku Semiramot ku Yehiel ku Matitia ku Eliab ku Benaia ku Obed-Edom ku ukyuli bamba ɔni lɛnɔ na baalɔ Yeiel ama na báƒuna ka bataagya lɛbentaa ku lidu ku enukpɛ agyala.

⁶Na bakpane inyɔ bani ndi Benaia ku Yahasiel ndubo kɔkpɛɛ butaavwi limeyi ndi limeyi na Katɔti Bunyimi Adaka ɔmmɔ anumi.

⁷Amu na limeyi lɛmmɔ kani lɛlɔ ni, Dawid ɔ́su Asaƒ ku nwuna lɛlɔ bekyuli kudeedi ɔnii batu kɔgya kɔni ndubo mɛni beti bemwi Unwoti.

⁸Bɛgya Unwoti enu. Na bitaakpali-nwu lɛnyi. Bɛsu kadi bekyuli ƒui ala ani na ɔ́bla.

⁹Bidie bumwi lɛnu bite-nwu, na bibo nwuna akɔla ala budie taatina kudu.

¹⁰Amii bani ƒui mɔɔwia Unwoti ni, lɛlɔ lɛyɔ-mii na bimwi-nwu lɛnyi kedee na bɛkɔliku-nwu katɔ.

¹¹Biti bina anu bɛsia Unwoti ku nwuna ɔyikun lɛlɔ na bitaanu-nwu anumi uwi biala.

¹²Binyimo nwuna akɔla ala budie taatina ani na ɔ́bla ku kalɛ na ɔ́tɛ litemi na ulu siin lɛlɔ.

¹³Nwuna kabla ɔblane Israel kaba bebi na bɛdi. Na bɛdi-nwu bekyuli baƒunadi bani ndi Yakob bebi.

¹⁴Unwoti ndi bula Katɔti. Na anwu mɔɔtɛku kayawi ƒui litemi.

¹⁵Nwuna anu asia lɛla lɛni na únyimi lɛlɔ uwi ƒui. Na nwuna linyese lise lite kaba mpim mpim bekyuli.

¹⁶Bunyimi bɔmmɔ na únyimiku Abraham na úse kenye ɔnii bɔdubɔkya anwu ku Isak lɛnɔ ntɛ.

¹⁷Bunyimi bɔmɛni kani na ɔ́lɛ ugyii úte Yakob ka amu ndi ɔda bubo ute anwu ku Israel kadi bekyuli úsela uwi ƒui kemmo.

¹⁸Ɔ́su ɔnini, “Amii na ndubuti Kanaan kalɔ ƒui lite na kana ƒui kenwini bina kadikɔ.”

¹⁹Na uwi ɔmmɔ kemmo ni, beeemomo. Na lɛnɔ ni, baƒɔ na badi na kalɔ kammɔ kemmo.

²⁰Na busie kani bakɛ beesié taavi kadi bamba bekyuli akɔ ɔ́si lɛga kadikɔ úsie lɛga kadikɔ.

²¹Na ɔ́gyumana-ma ɔni na ukyuli ina unwi útanya-ma útakya. Mmomu ɔ́tɛmiku baga bammɔ kpakplaa na ama ɔsu.

²²Na ɔ́su-ma ɔnini, “Ɔdi biala utetuku mina kadi bekyuli bani na lɛ́ƒuna. Na ɔdi utabla mina kenye bediene badi likpidi lɛdi.”

²³Amii kadi ƒui bekyuli, bɛtu ɔnu bite Unwoti. Bidie ɔnu na bɛsu bekyuli limeyi ndi limeyi kalɛ na ɔ́ƒɔ-bu ngba.

²⁴Bɛkɔ lɛsa bite bekyuli kalɛ na uukeye na kadi ƒui akɔ. Na bɛsu akɔla ala budie taatina ani na ɔ́bla na bekyuli ƒui akɔ.

²⁵Ɔsika bula Unwoti úbomo na nwuna lɛnyi lɛ́kɔ katɔ anwuɔsu na ɔlɛka bumwi-nwu na bɔyia-nwu butulo baƒiɔ ƒui.

²⁶Ɔsika baƒiɔ bani mɔɔdi kadi bamba bekyuli ƒui lɛlɔ badi ala avɔdi ku anwidi sɔɔn ani naaadi lɛla lɛdi. Nsu Unwoti nédie kayaa ala ƒui.

²⁷Unwoti úbomo geen na nwuna bukeye bɔ́ka bɔ́mana-nwu. Na nwuna ɔyikun ku lɛlɔyɔ bɔ́ƒɔ nwuna kakpakɔ kedee kammɔ kemmo.

²⁸Amii kadi ƒui bekyuli, bidie Unwoti kenyekɔ kani muukeye bɛtina ku kalɛ na ubo ɔyikun.

²⁹Bimwi Unwoti lɛnyi lɛni muukeye na biti etela biboku-nwu. Amii kalɔ lɛlɔ bekyuli ƒui biboku eli kalɔ na bimwi Unwoti ɔni nébomo na use kedee.

³⁰Na lɛlɔ litaatɔ-mii ku liƒu na nwuna anumi. Kalɔ kemodi kammɔ kenye kana lɛgba lɛlɔ kpi na kalákunku kudii.

³¹Na ebiti ataada awɔ kalɔ ku kana ala ƒui. Na bɛsu na kadi ƒui bekyuli akɔ bɛnini, “Unwoti Katɔti mɔɔdi lɛga.”

³²Na ɛpu ɔmmɔ uteedie lɛdi momoomo ku ala ani ƒui nkya-nwu kemmo. Na mmo bɔmmɔ ƒui ku ala ani nkya aku kemmo ƒui bidie lɛnu ku lɛlɔyɔ bite yiiduu.

³³Na egyii ammɔ adubudie lɛnu ebo kudu na Unwoti ɔni ndubo anumi. Ɔsika ɔdubo ubatɛku kayawi bekyuli litemi na ulu siin lɛlɔ.

³⁴Bɛgya Unwoti enu, ɔsika ɔdia na ɔɔyɔ́-bu uwi ndi uwi.

³⁵Bɛva momoomo bɛnini, “Unwoti bula Ɔƒɔne, ƒɔ-bu ngba!” Na asiku-bu kɔlɔ bamba lɛlɔ asɔku abásala. Ya na lɛlɔ lɛyɔ-bu na bɔgya-a enu na bumwi ƒula lɛnyi kedee ku kudu.

³⁶Bimwi Unwoti ɔni ndi Israelƒuɔ Katɔti lɛnyi ɔsi ɔƒɛni úsela uwi ƒui. Mmɔ na ukyuli biala ɔ́su ɔnini, “Ɔsia lɛni,” ku “Bimwi Unwoti.”

³⁷Ɔmmɔ kama ni, Dawid ɔ́ƒuna Asaƒ ku Lewiƒuɔ ɔ́siku nwuna kɔdua kemmo ka bataabla akpala limeyi ndi limeyi na kesii kani na Bunyimi Adaka kedee ɔmmɔ use.

³⁸Na Obed-Edom ku nwuna lɛlɔ bekyuli liti ku leevu-maane ndi bana bebunkune. Na Hosa ku Obed-Edom ɔni ndi Yedutum ubidi ndi bagyumanane.

³⁹Dawid ɔ́ƒuna ɔkpane Sadok lɛnɔ ku nwuna lɛlɔ bekyuli bani ndi bakpane ka bataabla kabla na Katɔti Adi Kevo kammɔ kemmo na Gibeon.

⁴⁰Na bataabla akpala ɔtanta biala ku useyi uwi biala aani kalɛ na ɔkya ɔda bubo bɔni na Unwoti úte Israelƒuɔ kemmo.

⁴¹Heman ku Yedutum ndi bana bebunkune úbunku bekyuli bamba bani lɛnɔ na báƒuna ka beteemwi Unwoti na kalɛ na ɔɔyɔ́-bu uwi ndi uwi ɔsu.

⁴²Na Heman ɔmɛni ku Yedutum ndubo kɔkpɛɛ lɛnɔ butaavwi na bataagya enukpɛ agyala ku agyala bamba lɛnɔ si uwi ɔni na baakpá na kevo kammɔ kemmo mmɔ. Na Yedutum kɔdua bekyuli ndi bagyumanane na Gibeon.

⁴³Amu na ɔmmɔ kama ni, bekyuli bammɔ bátɔlɔ bésie bana kɔduli na Dawid lɛnɔ únwini úsie nwuna kaduli bekyuli kudɔ.