Read Lelemi Ala Alɛdi 1 17 Bible Online

Ala Alɛdi 1 17 - Lelemi bible

Ala Alɛdi 1 17

¹Ka Dawid úsie uli nwuna ɔga kaduli kawɔdi kammɔ kemmo uwi klukwii ɔdi kama ni, ɔ́su Kenye Udiene Natan ɔnini, “Ami nli ɔga lɛgbanya lɛni na béti egyii ani na áƒɔ kuye geen bátu. Nsu Unwoti Bunyimi Adaka ɔmmɔ anwu ɔlɛ kevo kemmo.”

²Amu na Natan údie Dawid kenye ɔnini, “Lɛla biala na aakali ka abla ni, awɔ bla-ni. Ɔsika Katɔti uliku-ɔ na ɔdubo-ɔ bubunku.”

³Nsu usien ɔmmɔ kani ni, Unwoti ɔ́su Natan ɔnini,

⁴“Sie mina kabla ɔblane Dawid kudɔ na atásu-nwu ka lɛla lɛni na ami Unwoti mɔɔsu-nwu nnini, ‘Ɔɔɔdi awɔ Dawid ndubɔtu ɔtɔ ete-mi na lilie-nwu kemmo.

⁵Ńtelie ɔtɔ ɔni na bayawine béti bana enu bátu kudii, mmomu Adi Kevo kani na baalɛ taagyu ɔ́si likpo linwi úsie kesii bamba kemmo na lílie ɔ́si uwi ɔni na lídie mina kadi bekyuli Israelƒuɔ lɛ́lɛku Egyipte kalɔ lɛlɔ úti úbedu ɔmwi.

⁶Na uwi biala na mina kadi bekyuli Israelƒuɔ báta bási kesii kadi bésela kesii bamba ni, ami lɛnɔ nsiaku-ma. Na lɛlɔ badine bani na lɛ́ƒuna mmɔ ni, ɔmani na lɛ́su nnii beti egyii ani náƒɔ kuye mmɔ adi batu keliekɔ kadi bete-mi na lilie dii?’

⁷“Na ɔƒɛni ni, su mina kabla ɔblane Dawid anii ami Unwoti Ɔyikune Ƒui nnii, “ ‘Asa na ndubɔƒuna-a na enwini mina kadi Israel ɔtɔnkune ni, na nka baƒonu kani na aakpanku teesienku kadikɔ.

⁸Na kesii biala na akɛ ni, lɛ́siaku-ɔ. Na líbunku-ɔ na ádi ƒula bekisine ƒui lɛlɔ. Na ɔƒaani lɛnɔ ni, ndubɔbla-a na aƒɔ lɛnyi aani baga bamba bani náƒɔ lɛnyi bétulo ƒui na kalɔ lɛlɔ.

⁹Ɔƒɛni ni, ndubɔƒuna keliekɔ sɛsɛɛ kadi lise lite mina kadi bekyuli ka belie. Na ndubɔya na belie kesii kammɔ ɔni na bekyuli badi basɔ belékpoku-ma lɛnɔ aani kalɛ na kadi bamba badi bábla bábavi.

¹⁰Ɔsika kuuku ni, lɛni na kadi bamba bekyuli bamɛni békpoku mina kadi bekyuli Israelƒuɔ ɔ́si uwi ɔni na líse kalɔ mɔɔƒuna batɔnkune teete-ma ka batɔnku-ma. Nsu ndubɔdi-ma lɛlɔ. “ ‘Na ɔƒaani ni, muusé-ɔ kenye ka ƒula kaba kemmo bebi ndubo lɛga butaadi ƒula kalɛ.

¹¹Na si uwi ɔni na ékpi na átɔlɔ ébo ƒula bati kudɔ ni, ƒula kaba kemmo ubi na ndubɔya na bese lɛga na ƒula kenye, na ɔdubɔbla awɔ ɔlati bebi akɔ unwi. Na ndubɔya na nwuna lɛga kadikɔ kenye kpakplaa.

¹²Na ubi ɔmmɔ ndubɔtu ɔtɔ ute mina lɛnyi na ndubɔya nwuna lɛgaboku lise liteesie uwi ƒui.

¹³Ndubɔdi-nwu kɔti. Na anwu lɛnɔ ɔdi mina ubi. Na bɔyɔ bɔni nkya ami ku-nwu ntɛ bulékulo kudii aani ami ku Saul ɔni náka-nwu bulie ɔdi kalɛ.

¹⁴Ndubɔnu ka awɔ ku ƒ'ubidi ku ƒula kaba kemmo bebi ndubo mina kadi bekyuli lɛlɔ butaadi na mina lɛgakadikɔ uwi biala.’ ”

¹⁵Amu na Natan úsie útásɔku Unwoti kenye kammɔ ɔ́su Dawid lɛni kani.

¹⁶Ɔmmɔ kama ni, Dawid úsie útéduo kevo kani kemmo na Bunyimi Adaka ɔmmɔ use mmɔ kemmo na ɔ́yu úlie kalɔ na ɔ́kpali Unwoti ɔ́su ɔnini, “Unwoti Katɔti, ami ku mina kaduli bekyuli ƒui bútamanku bútete ala ani na áabla éte-bu muedi

¹⁷asa na ásɔ eesé-bu kenye kamɛni ka asɔ abla ala ani na etulo ammɔ ete ami ku mina kaba kemmo bebi. Adanku-mi aani ukyuli ɔni na ɔ́ƒɔ kuye geen kɔdi.

¹⁸“Ƒula kabla ɔblane na ndi na agyi mina lili kemmo kasusu ƒui. Bi na ndubɔsɔ lɛkana bɔsu ɔƒɛni bɔsiku kalɛ na ákɔliku-mi kɔtɔ mɛni lɛlɔ?

¹⁹Awɔ ɔlati bɔyɔ bɔdi ka abla ala enengudi amɛni udu ete-mi na ese-mi kenye kamɛni udu.

²⁰“Baƒiɔ badi beeese ƒula kalɛ. Unwoti, awɔ lɛti ndi Katɔti na lɛla biala na búnu bɔ́siku-ɔ lɛlɔ ƒui adi sɔsɔ.

²¹Na kadi bamba bekyuli badi beeebo kalɔ kammɔ lɛlɔ aani Israel, kadi bekyuli bani na awɔ ɔlati édie álɛku bekyuli bamba kabla bɔbla kemmo ásiku Egyipte kalɔ lɛlɔ ka benwini awɔ badi. Na ɔkɛnku ƒula akɔla budie taatina ani na ábla ɔsu ni, ƒula lɛnyi lɛ́ƒɔ kuye geen na kadi ƒui bekyuli akɔ. Na ɔkɛnku ɔmmɔ lɛlɔ na ábɔku kadi bamba bekyuli ku bana baƒiɔ ƒui álɛku ƒula kadi bekyuli lɛtɔtɔ na ama beti mmɔ benwini bana keliekɔ.

²²Áƒuna Israel ka unwini ƒula kadi bekyuli úsela uwi ƒui na awɔ enwini bana Katɔti.

²³“Unwoti Katɔti, buvele bla kenye kani na ése ami ku mina kaba kemmo bebi te-bu uwi ƒui.

²⁴Na ƒula lɛnyi lɛdubɔƒɔ kuye lisie ɔgyu uwi ƒui, na bekyuli ƒui badubɔsu banii, ‘Unwoti Ɔyikune Ƒui mɔɔdi Israel lɛlɔ na ɔdi bana Katɔti.’ Na mina lɛgakadikɔ kadubunye kpakplaa.

²⁵“Awɔ ndi mina Katɔti na awɔ nése kenye ka mina kaba kemmo bebi ndubo lɛga butaadi. Ɔmmɔ ɔsu na ami lɛnɔ líse kayi na mɔɔkpali-ɔ teevele ala amɛni ina ka ƒula kabla ɔblane na ndi.

²⁶Awɔ ndi Unwoti Katɔti na awɔ nése-mi kenye kabuni kamɛni.

²⁷Na ɔƒaani ni, te mina bebi ku bawɔ ƒui kusɛ kusɛ uwi ƒui na aya na benwini ƒula bagadine baƒunadi. Éete mina kaduli bekyuli kusɛ kusɛ na ngyi ka adubute-bu kusɛ kusɛ uwi ƒui.”