Read Lelemi Ala Alɛdi 1 18 Bible Online

Ala Alɛdi 1 18 - Lelemi bible

Ala Alɛdi 1 18

¹Na uwi ɔdi kama ni, Dawid úsie útékpoku Ƒilistiƒuɔ na ɔ́di-ma lɛlɔ na úƒie bana ɔma ɔni baalɔ Gat ɔ́ƒɔ ku akpaklɔ ani na ede amadɔ mmɔ.

²Na ɔ́di Moabƒuɔ lɛnɔ lɛlɔ, anwuɔsu bénu kalɔ ka bataaƒɔ lɛlɔ bɔdi kayu teete-nwu aani ɔga ɔni mɔɔdi-ma lɛlɔ kalɛ.

³Na kekpo bamba kemmo ni, Dawid ku nwuna bekpone békpoku Sobaƒuɔ bétédu kesii kani baalɔ banii Hamat. Na bana ɔga ndi Rehob ubidi ɔni ndi Hadadeser. Na kekpo kammɔ kálɛ uwi ɔni na Hadadeser ku nwuna bekpone bátu akpagya na bási bésela betékpoku kadi kani bekyuli nli Euƒrate Ketu amadɔ.

⁴Nsu Dawid ku nwuna bekpone bádi-ma lɛlɔ na béƒie bana bapɔnkɔ kɛɛkɛ apim unwi báƒɔ. Na bekpone mpim maatɛ bani mɔɔka kɛɛkɛ lɛnɔ béƒie-ma. Na béƒie bekpone mpim aavlanyɔ bani nkɛ lɛgba. Na bapɔnkɔ bani béƒie báƒɔ ni, bébo lɛna ƒui lɛgba báƒɛ na kébu eti anyɔ kani.

⁵Amu ka Siriaƒuɔ bani na bási Damasko lɛnɔ bébo banii bebebunku Sobaƒuɔ Ɔga Hadadeser ni, Dawid ɔ́du bana mpim aavlanyɔ-inyɔ.

⁶Ɔmmɔ kama Dawid úle nwuna bekpone ɔ́kya Damasko na ɔ́kɛ ɔyikun na Siriaƒuɔ lɛlɔ. Anwuɔsu Siriaƒuɔ lɛnɔ baaƒɔ lɛlɔ bɔdi kadikɔ kayu teete Dawid. Na kesi kesii na Dawid úsie ni, Unwoti uubunku-nwu na ɔɔdi nwuna bekisine lɛlɔ.

⁷Na kekpo kammɔ kama ni, Dawid úƒie Hadadeser benengu sika ugyiedi kayi agyumanala ɔ́ƒɔ na úti-nya úsienku Yerusalem.

⁸Na abuala egyiedi ani baakywɛɛ ala na Beta ku Berotai lɛma lɛni lɛlɔ na Ɔga Hadadeser útaadi mmɔ ni, úti ketulodikɔ ɔ́tɔlɔku. Kama ni, abuala amɛni na Salomo ɔ́ya na bakywɛne béti bétu lɛkyami bonwu lɛni na bátaalɔ banii ɛpu mmɔ béte-nwu. Na úti ɔdi ɔ́bla kakpakɔ kammɔ akpa ku ala bamba ani na béti bákya ɔtɔ ɔmmɔ bɔdia.

⁹Uwi ɔni na Hamat ɔma ɔga ɔni baalɔ Toi únu ka Dawid úkpoku Ɔga Hadadeser na ɔ́di-nwu lɛlɔ ni, ɔ́tala ubidi ɔnanabi Hadoram ka usie na utéte Dawid mmo na nwuna lɛlɔ bɔdi ɔsu. Na Hadoram ɔmɛni ɔdanku sika ugyiedi ku ɔƒualadi ku abuala egyiedi úsienku Dawid.

¹¹Dawid úti etela ammɔ úte Unwoti úbunku sika ɔƒualadi ku ugyiedi ɔni na úƒie ɔ́ƒɔ Edom ku Moab ku Amon ku Ƒilisti ku Amalek kadi bekyuli kudɔ.

¹²Ɔmmɔ kama Seruia ubidi Abisai útékpoku Edom kadi bekyuli na kesii kani na baalɔ Mma Kɔwɛ kemmo na ɔ́du nkyuli mpim leevu-maane.

¹³Na ɔ́ya na bekpone badi básɔ bakya mmɔ na kadi kammɔ bekyuli baaƒɔ lɛlɔ bɔdi kayu teete Dawid aani ɔga ɔni mɔɔdi-ma lɛlɔ. Na kesii biala na Dawid úsie útékpo ni, Unwoti uubunku-nwu na ɔɔdi lɛlɔ.

¹⁴Dawid ɔ́di Israel lɛlɔ kaduɛ na ɔɔtɛ etemila siin.

¹⁵Na uwi ɔmmɔ kemmo ni, Seruia ubidi Yoab nádi bekpone unengu ƒui ɔni mɔɔdi bekpone bammɔ lɛlɔ. Na Ahilud ubidi Yehosaƒat ndi ukyuli ɔni mɔɔda aban lɛku lɛni kemmo na ala alɛdi ƒui akya.

¹⁶Na Ahitub ubidi Sadok ku Abiatar ubidi Ahimelek ndi bakpane. Na Sawsa ndi ɔku unwenine.

¹⁷Na Benaia, ɔni ndi Yehoiada ubidi, mɔɔnu Keretiƒuɔ ku Peletiƒuɔ lɛlɔ. Na Dawid bebi bananabi ndi benengu bani kunyekɔ nákɔ katɔ kutulo ƒui kabla bablane bammɔ akɔ.