Read Lelemi Ala Alɛdi 1 19 Bible Online

Ala Alɛdi 1 19 - Lelemi bible

Ala Alɛdi 1 19

¹Na uwi ɔdi kama ni, Amonƒuɔ ɔga úbekpi. Na ubidi ɔni baalɔ Hanun na béti bése-nwu kenye na únwini bana ɔga.

²Ka Dawid únu-nwu kukpi ni, ɔ́su ɔnini, “Ndubɔbla lɛla lɛbuni lɛdi lite Nahas ubidi Hanun ɔsika lɛni kani na ɔti Nahas ɔ́bla-mi lɛƒɔndia dii.” Ɔmmɔ ɔsu Dawid ɔ́tala nwuna bekyuli badi ka batásia Hanun kɔnu na ɔti kukpi ɔsu. Ka Dawid bekyuli bétéduo Amon kalɔ lɛlɔ ni,

³básu-ma Dawid kenye kani na badanku. Nsu ka báwɔlɔ ni, Ɔga Hanun benengu bammɔ básu bana ɔga banini, “Aabu anii Ɔga Dawid ɔɔbu-ɔ na ɔɔyɔ́-ɔ ka ɔ́tala bekyuli bamɛni ɔnii babasia-a kɔnu ka ƒ'ɔti úkpi ɔsu? Alati ka bubo na bekyuli bamɛni bébo aani batu na babasia bula kalɔ kammɔ anu kaduɛ na bebekpoku-bu na badi-bu lɛlɔ?”

⁴Anwuɔsu Hanun ɔ́ya na béƒie-ma na békpeyi-ma ukwi. Lɛni kani na ɔ́ya na nwuna bekpone békulo lɛwu gyɔlɔɔ lɛni bakya mmɔ kalɔ bédie ɔ́si kavobi. Ɔmmɔ kama ɔ́ya na bédie-ma ulu na bátɔlɔ bésie bana ɔma.

⁵Ka ukyuli ɔdi úbo úbasu Dawid litemi lɛmmɔ ni, ɔ́tala batu badi na bátásiaku bekyuli bani na bábla kalala bákya-ma kɔƒa geen mmɔ na ulu lɛlɔ ɔnii batásu-ma ka ɔga ɔnini, “Bɛsɔ bɛkya Yeriko útédu ka bina likwi lɛ́sɔ lɛ́kwɛ linwini. Na ɔmmɔ kama na binwini bibo.”

⁶Uwi ɔni na Amonƒuɔ bánu báti ka Dawid ɔ́kɛ kɔnyi geen na lɛla lɛni na bábla nwuna batu ɔsu ni, bátáƒɔ kayu bonwu kadi béte Mesopotamiaƒuɔ ɔni ndi sika ɔƒualadi antabi aƒo bonwu eti aku unu na báƒɔ bana bekpone bani muulie kɛɛkɛ kemmo. Na báƒɔ badi lɛnɔ básiku Siria lɛgakɔdikɔ kɔni na kɔkya Maaka ku Soba kalɛkɛ na kayu kenye.

⁷Na báƒɔ bekpone bani muulie kɛɛkɛ kemmo nkyuli mpim avlaatɛ-inyɔ úbunku bana Maaka ɔga ku nwuna bekpone na bábada keliekɔ na kesii kani baalɔ Medeba. Na Amonƒuɔ lɛnɔ báda bana lɛma bése na bábaklibi lɛlɔ béte ka bekpo.

⁸Ka Dawid únu ɔmɛni ni, ɔ́ya na nwuna bekpone ɔtɔnkune Yoab ɔ́tɔnku bekpone bammɔ ƒui ɔnii betékpoku-ma.

⁹Na Amon bekpone bálɛ bébo ɔma unengudi ɔmmɔ ɔba kayakun na báklibi lɛlɔ béte kekpo. Na uwi ɔmmɔ lɛlɔ ni, Siriaƒuɔ lɛnɔ báklibi lɛlɔ na béesie bakya alakpi akɔ na ɔma ɔmmɔ amadɔ.

¹⁰Amu na Yoab ɔ́nu úmene ka bekpone bekisine benye kuƒie na nwuna lɛƒɛnyi inyɔ bɔmmɔ ƒui lɛlɔ. Anwuɔsu ɔ́ƒuna nwuna Israelƒuɔ bekpone babuni ƒui ka betékpo Siriaƒuɔ bammɔ.

¹¹Na ɔ́ya na ɔnwani Abisai ɔtɔnku bekpone bakladi na betékpoku Amonƒuɔ.

¹²Mmɔ na Yoab ɔ́su ɔnwani ɔnini, “Si ánu ka Siriaƒuɔ bammɔ baayu ɔkplu teetulo-mi ni, na ebo ebebunku-mi. Na si ami lɛnɔ nánu ka Amonƒuɔ bammɔ baayu ɔkplu teetulo-ɔ ni, ndubo mbebunku-ɔ.”

¹³Nye kpakplaa na bukpo bute bula kadi bekyuli ku Katɔti lɛma linengudi lɛmmɔ. Na Unwoti ɔlati ɔdubo lɛla lɛni na ɔ́nu ka lɛ́manku bɔbla.

¹⁴Yoab ku nwuna bekpone békpoku Siriaƒuɔ bamɛni kaduɛ ɔni na békulo bátɔlɔ-ma kudɔ.

¹⁵Uwi ɔni na Amonƒuɔ bekpone bammɔ bánu ka Siriaƒuɔ bammɔ békeli ni, ama lɛnɔ békeli bátɔlɔ Abisai bekpone kudɔ na bénwini bétéduo bana ɔma unengudi ɔmmɔ kemmo. Ɔmmɔ kama Yoab únwini úsie Yerusalem.

¹⁶Na ka Siriaƒuɔ bammɔ bánu báti ka bádi-ma lɛlɔ na kekpokɔ ni, bátala bekyuli bákya bana bekpone bani na bakya Euƒrate Ketu kammɔ ɔvi unyɔdi. Na Soƒak ɔni ndi Hadadese bekpone unengu ɔ́tɔnku bekpone bammɔ úsienku Amon.

¹⁷Amu ka Dawid únu lɛla lɛni na Siriaƒuɔ bammɔ baabla ni, ɔ́sala Israelƒuɔ bekpone bammɔ ƒui na bávia Yordan Ketu na úbo-ma ɔda ka beténye kunyekɔ kɔbuni na benye basiaku Siriaƒuɔ bekpone bammɔ na bekpoku-ma. Na ka kekpo kése kalɔ ni, uwi útetu asa na

¹⁸Siriaƒuɔ bammɔ békeli bátɔlɔ Israelƒuɔ bammɔ kudɔ. Na Dawid ɔ́du bekpone bani muulie kɛɛkɛ kemmo nkyuli mpim maatɛ ku bekpone bani nkɛ lɛgba mpim aavlene. Na ɔ́du bana bekpone unengu ɔni ndi Soƒak lɛnɔ.

¹⁹Amu na uwi ɔni na baga bani nákya Hadadeser kalɔ mmɔ bánu ka Israelƒuɔ bádi-ma lɛlɔ ni, ama ku Dawid béwi kenye ntu na bábla unwi na bénu kalɔ na bakya-nwu kalɔ aani bana lɛlɔ ɔdine.