Read Lelemi Ala Alɛdi 1 20 Bible Online

Ala Alɛdi 1 20 - Lelemi bible

Ala Alɛdi 1 20

¹Na ɔtumawi bamba uwi ɔni na kɔlɔ baga baata lɛlɔ kekpo ni, Yoab ɔ́tɔnku Israel bekpone na bétékpo Amon kalɔ na bábwɛ bana lɛma bávi. Na békpoku Raba bana ɔma unengudi ɔmmɔ na bétu ala bábwɛ béwi. Nsu Dawid anwu ɔ́sɔ ɔ́kya Yerusalem.

²Kama ni, Dawid úbesie Raba ɔma unengudi ɔmmɔ kemmo anwu ɔlati na útáda kagabwa kani na kebi Molek baƒiɔ bani na bátu bényene mmɔ lili úbimi. Na úti ubi lili. Na úti ala bamba pii ani náƒɔ kuye lɛnɔ ɔ́tɔlɔku.

³Na únye Raba ɔma unengudi ɔmmɔ bekyuli lɛlɔ na béti abuala lidu ani na beebeyi kalɔ ku kɔdadi ku ligyii ekulola na bábla kabla kpakplaa. Na lɛni kani na ɔ́ya na bábla na lɛma libliidi kemmo lɛnɔ ƒui. Ɔmmɔ kama ni, Dawid ɔ́tɔnku Israel bekpone bammɔ na bénwini bésie Yerusalem.

⁴Na uwi ɔdi kama ni, Israel bekpone bésie bétékpoku Ƒilistiƒuɔ na kesii kani na baalɔ Gese. Na kekpo kammɔ kemmo ni, Sibekai ɔni nási Husa ɔ́du ɔnana ɔni baalɔ Sipai na ɔdi Reƒaim uwɔ na bádi Ƒilistiƒuɔ lɛlɔ.

⁵Na kekpo bamba kadi na Israelƒuɔ ku Ƒilistiƒuɔ békpo kemmo ni, Yair ubidi Elhanan ɔ́du Lami ɔni ndi Goliat ɔni nási Gat ɔma kemmo ɔnwani. Na Goliat ɔmɛni lɛtula lɛni na ɔda akpɛlɛ ani nlɛ-nwu lili ese aani lɛbuala lɛni lɛlɔ na adi bedine beebó kɔdi abuli taada.

⁶Na Ƒilistiƒuɔ bekpone bamɛni akɔ ni, ukyuli bamba ɔni na ɔ́si Reƒaiƒuɔ kaba kemmo ɔ́kya na úbomo na ɔ́kuku geen. Na ubo animi aku na kɔnu biala lɛlɔ. Na lɛgba lɛnɔ ubo animi aku na ɔdi biala lɛlɔ. Na ana ƒui ebo aavlanyɔ-ine. Amu na kekpo bamba kadi na békpo na Gat kemmo ni,

⁷ɔnana ɔmɛni ɔkya ɔɔpii Israelƒuɔ bekpone. Anwuɔsu Yonatan ɔni na ɔdi Dawid ɔnwani Simei ubidi ɔ́du-nwu.

⁸Dawid ku nwuna bekpone bádu nkyuli ɛtɛ bani na bási Gat ɔma kemmo mɛni na badi Reƒaiƒuɔ kaba kemmo bekyuli.