Read Lelemi Ala Alɛdi 1 23 Bible Online

Ala Alɛdi 1 23 - Lelemi bible

Ala Alɛdi 1 23

¹Dawid ɔ́ɔbi lɛlɔ geen asa na ɔ́ƒuna ubidi Salomo ka ɔdi Israel ɔga.

²Na uwi ɔdi kama ni, Dawid ɔ́lɔ Israelƒuɔ batɔnkune bammɔ ku bakpane ku Lewiƒuɔ bammɔ ɔ́sala.

³Ɔ́ka Lewiƒuɔ banana bani náaƒɔ áani akwa avlaatɛ na bana bumomo bɔbla nkyuli mpim avlaatɛ-maane.

⁴Mmɔ na ɔ́su ɔnini, “Lewiƒuɔ nkyuli mpim aavlanyɔ-ine ndubo kabla butaabla na kakpakɔ kammɔ kemmo. Na mpim ɛku babla bana batɔnkune ku litemi batɛne.

⁵Na mpim ine ndubo kakpakɔ bagyumanane bunwini na mpim ine beteedie lɛnu na bataagya agyala ani na líte-ma teemwi Unwoti.”

⁶Ɔmmɔ kama ni, Dawid úle Lewiƒuɔ bammɔ ɔ́kya esu atɛ kemmo na bana adua kenye. Na ama ndi Gerson ku Kohat ku Merari.

⁷Gerson ɔ́wɔ bebi bananabi inyɔ bani ndi Ladan ku Simei.

⁸Ladan ɔ́wɔ Yehiel ku Setam ku Yoel.

⁹Na bebi bamɛni ƒui bénwini lɛtɔ benengu na bana ɔti Ladan bebi ku bawɔ kemmo. Simei ɔ́wɔ Selomot ku Hasiel ku Haran.

¹⁰Kama ƒui ni, Simei ɔ́sɔ úbawɔ bebi bananabi ine bamba. Na ama ndi Yahat ku Sina ku Yeus ku Beria. Na Yeus ku Beria bátawɔ na bemomo. Anwuɔsu ama ku bana bebi ku bawɔ ƒui ni, ɔtɔ unwi bekyuli kani na béti-ma.

¹²Kohat ɔ́wɔ bebi ine bani ndi Amram ku Isa ku Hebron ku Usiel.

¹³Na Amram ɔmɛni náwɔ Aaron ku Mose. Na Aaron ku nwuna kaba kemmo bebi na báƒuna ka bataanu kakpakɔ ala kedee ammɔ lɛlɔ. Na bataabla Unwoti kabla na akpala bɔkyula kemmo na ama ndubo buteete bekyuli kusɛ kusɛ na Unwoti lɛnyi kemmo.

¹⁴Na Mose ɔni ndi Katɔti ukyuli ɔƒunadi bebi bani na ɔ́wɔ ndi Gersom ku Eliese na bana kaba kemmo bebi na baanu aani Lewiƒuɔ.

¹⁶Gersom ubi ɔnanabi unengudi ndi Sebuel.

¹⁷Eliese ɔ́wɔ ubi unwi pɛ ɔni ndi Rehabia. Na Rehabia ɔmɛni ɔ́wɔ bebi pii geen.

¹⁸Kohat ɔ́wɔ Selomit ku Isa.

¹⁹Na Hebron bebi atɔ asia ndi Yeria ku Amaria ku Yahasiel ku Yekameam.

²⁰Usiel bebi atɔ asia ndi Mika ku Isia.

²¹Na Merari bebi inyɔ bani na ɔ́wɔ ndi Mali ku Musi. Na Mali ɔ́wɔ Eleasa ku Kis.

²²Eleasa úkpi na uuubo ubi ɔnanabi uuutulo belekubi bani na ɔ́wɔ. Na bana ɔti ɔnwani ɔni baalɔ Kis bebi bananabi néti-ma.

²³Musi ɔ́wɔ Mali ku Ede ku Yerimot na bebo bebi bananabi ɛtɛ.

²⁴Bekyuli bammɔ ndi Lewiƒuɔ adua ku atɔƒi ammɔ. Na bani na báƒɔ akwa aavlanyɔ iye betulo ni, ama na béte kabla na Unwoti kakpakɔ.

²⁵Amu na Dawid ɔ́su ɔnini, “Unwoti Israel Katɔti úte nwuna bekyuli keyi buɛɛ na badubo Yerusalem bulie uwi ƒui.

²⁶Anwuɔsu ɔsɔ uuubo banii Lewiƒuɔ bammɔ basɔ beteeti Unwoti kevo kammɔ ku ala ani na beeti taabla akpala bɔkyula mmɔ taavinku ɔ́si kesii kadi usie kesii bamba.”

²⁷Ka ɔ́si ɔƒaani ni, Lewiƒuɔ bani na báƒɔ ɔ́si akwa aavlanyɔ ku kama ni,

²⁸badubo Unwoti kabla bɔbla na beteebunku Aaron kaba kemmo bebi. Na bada kakpakɔ kaduli ku kakpakɔ kammɔ kemmo ƒui sɛɛn na banu ka ala ani na beeti taabla akpala lɛlɔ kabla mmɔ ƒui ese sɛɛn.

²⁹Na ama ndubo adila kedee ammɔ ƒui lɛlɔ butaanu. Edula ebi ɔlaaƒɔ ɔni na beeti taabla adila akpala ku bodobodo vɛɛvɛɛ ku adila etela biala buƒi ku ɔlaaƒɔ ɔni na básala ku nnɔ mmɔ ni, bana kabla na kadi ka banu-nya kaduɛ.

³⁰Ɔƒɛni ɔtanta ku useyi uwi biala ni, Lewiƒuɔ bammɔ na ɔdi ka bagya Unwoti enu na bedie lɛnu bemwi-nwu.

³¹Na Lɛnwunameyi biala lɛlɔ lɛnɔ si bábla akpala bɔkyula béte Unwoti ni, ɔdi ka bagya Unwoti enu na bedie lɛnu bemwi-nwu. Na lɛni kani ɔdubuse na kɔbuli kɔwɔdi bɔlɛ kemmo ku emeyi buni biala bɔdi kemmo lɛnɔ. Anwuɔsu ɔlɛka Lewiƒuɔ bammɔ bemomo na kakpakɔ mmɔ uwi biala kalɛ na ala ani ƒui na ɔdi ka babla ni, banu ka bábla-nya lɛni kani.

³²Uwi ɔdi návi ni, bana kabla kadi ka beteeti Unwoti kevo kedee kammɔ na bataanu-ka lɛlɔ. Na ɔƒaani ni, bana kabla ndi ka banu kakpakɔ kammɔ lɛlɔ na beteebunku Aaron kaba kemmo bebi bammɔ.