Read Lelemi Ala Alɛdi 1 25 Bible Online

Ala Alɛdi 1 25 - Lelemi bible

Ala Alɛdi 1 25

¹Ɔmmɔ kama ni, Dawid ku kakpakɔ benengu bammɔ báƒuna Asaƒ ku Heman ku Yedutum kaba kemmo bebi ka benye lɛnu ku agyala ala kenye. Na ama ndubo Unwoti buteemwi ku bana agyala ani ndi enukpɛ agyala ku lɛbentaa lidu ƒui. Na lɛnu bɔtu ku bagyane bammɔ anyi ndubo mɛni ku bana kabla lidu.

²Asaƒ ku nwuna bebi ine bani ndi Sakur ku Yoseƒ ku Netania ku Asarela ni, bakya bana ɔti kalɔ na beedie agya uwi biala na Unwoti wasu-ma ɔnii bagya.

³Na Yedutum lɛnɔ ku nwuna bebi ɛku bani ndi Gedalia ku Seri ku Yesaia ku Simei ku Hasabia ku Matitia bakya-nwu kalɔ na baagyá lɛbentaa na beedie lɛnu teemwi Unwoti.

⁴Heman ku nwuna bebi leevu-ine bani ndi Bukia ku Matania ku Usiel ku Sebuel ku Yerumot ku Hanania ku Hanani ku Eliata ku Gidalti ku Romamti-Ese ku Yosbekasa ku Maloti ku Hoti ku Mahasiot.

⁵Na Heman ɔmɛni ɔdi ɔga kenye bediene akɔ unwi. Katɔti ɔ́kɔliku-nwu katɔ geen na uwi ɔni na ɔ́ya na ɔ́wɔ bebi bananabi leevu-ine ku belekubi ɛtɛ ɔsu.

⁶Anwu lɛnɔ nwuna bebi bákya-nwu kalɔ na baagyá lɛbentaa ku enukpɛ agyala ku lɛbentaa lidu bamba na kakpakɔ si uwi ɔni na baabla lɛkpa. Anwuɔsu Asaƒ ku Yedutun ku Heman ƒui ni, bákya ɔga ɔmmɔ kalɔ na anwu muudie lɛdi teete-ma.

⁷Bekyuli bamɛni ƒui bumomo bɔdi nkyuli eti alɔ ku avlaatɛ-maane. Na bana ƒui badi bekyuli bani na bagyi lɛnu bɔtu ku agyala lɛlɔ kabla geen.

⁸Na bani ƒui na Dawid úle kabla úte mmɔ na badi banamu iye benengu iye batinane iye batɛyane ni, ɔ́ka Unwoti buye bunu lɛla lɛni na ɔɔwia asa na úte-ma bana kabla.

⁹Amu na lɛnu bediene ku agyala bagyane bamɛni ni, béle-ma bákya esu aavlanyɔ-ene kemmo na lisu biala libo nkyuli leevu-inyɔ. Na lisu biala lɛɛdi nwuna lɛtɔƒi unengu lɛnyi. Na kalɛ na béle bana kabla béte-ma na esu ammɔ kenye atɔ asia ndubo mɛni. Yoseƒ asa na Gedalia asa na Sakur asa na Seri asa na Netania asa na Bukia asa na Asarela asa na Yesaia asa na Matania asa na Simei asa na Usiel asa na Hasabia asa na Sebuel asa na Matitia asa na Yerimot asa na Hanania asa na Yosbekasa asa na Hanani asa na Maloti asa na Eliata asa na Hoti asa na Gidalti asa na Mahasiot asa na Romamti-Ese.