Read Lelemi Ala Alɛdi 1 26 Bible Online

Ala Alɛdi 1 26 - Lelemi bible

Ala Alɛdi 1 26

¹Kakpakɔ bagyumanane bammɔ lɛnɔ ni, béle-ma bákya esu esu kemmo na bana adua ammɔ kenye. Na Meselemia ɔni ndi Kore ubidi ɔnanabi ni, ɔ́si Kore kɔdua kemo na ɔdi Asaƒ kaba kemmo ubi.

²Ubo bebi maatɛ na bana bɔwɔ atɔ asia ndi Sekaria ku Yediael ku Sebadia ku Yatniel ku

³Elam ku Yehohanan ku Eliehienai.

⁴Kusɛ kusɛ ɔ́siaku Obed-Edom na ɔ́wɔ bebi maane. Na ama ndi Semaia ku Yehosabad ku Yoa ku Saka ku Netanel ku Amiel ku Isakar ku Peuletai.

⁶Semaia náwɔ Otni ku Reƒael ku Obed ku Elsabad. Na Elihu ku Semakia bani ndi Semaia lɛlɔ bekyuli ni, bana ƒui badi atɔƒi benengu bani na baabu geen na bana kɔdua.

⁸Na Obed-Edom kaba kemmo bebi bumomo bɔdi nkyuli liti ku leevu-inyɔ. Na badi bekyuli bani na bebo ɔlɔkplu ɔni na bakana na babla bagyumanane kabla.

⁹Na Meselemia kaba kemmo bebi bɔdi nkyuli leevu-maane. Na badi bekyuli bani mbo ɔlɔkplu.

¹⁰Na Hosa ɔni nási Merari kɔdua kemmo ni, anwu náwɔ Simri ku Hilkia ku Tebalia ku Sekaria. Hosa úti Simri ɔ́bla lɛtɔƒi unengu ina ka ɔɔɔdi anwu ndi ubi unengudi ƒui. Na nkyuli leevu-ɛtɛ na báƒuna básiku Hosa ɔtɔ kemmo ka babla bagyumanane kabla na kakpakɔ kemmo.

¹²Na bagyumanane bamɛni ni, béle-ma esu esu na bana atɔƒi benengu kenye na béte-ma kabla na kakpakɔ aani Lewiƒuɔ bakladi kalɛ.

¹³Lisu biala baagyumana kayakun kenwi na ɔɔɔkɛ bana bumomo.

¹⁴Maselemia na báƒuna ka utaagyumana kayakun kani nísie ɔƒɛ katukɔ. Na ubidi Sekaria ni, ɔdi ɔnundane geen, anwuɔsu anwu na báƒuna ka ɔgyumana kayakun kani nkya késie katɔ kakɛ.

¹⁵Na Obed-Edom na báƒuna ka ɔgyumana kayakun kani nésie kada kakɛ na báƒuna nwuna bebi ka bataagyumana ala kesekɔ.

¹⁶Ɔ́ƒɛni ɔban kayakun kani nésie ɔƒɛ kanukɔ ku ɔban kayakun kani na baalɔ banii Saleket ɔban kayakun na kakya ulu ɔtɔdi kenye ni, Supim ku Hosa na báƒuna ka bataagyumana mmɔ. Na ulu ɔni lɛlɔ na béteeti taagyumana na bɔdubo bunu mɛni.

¹⁷Limeyi ndi limeyi ni, bagyumanane ɛku beenye kakpakɔ kammɔ ɔƒɛ katukɔ na ine beenye katɔ kakɛ na ine beenye kada kakɛ na ala kusekɔ inyɔ bɔni na nkya kakpakɔ mmɔ ni, bagyumanane inyɔ inyɔ muunye mmɔ taagyumana.

¹⁸Na ulu ɔni ntɛ úsela kakpakɔ kaduli kani nkya ɔƒɛ kanukɔ ni, bagyumanane ine muunye ulu ɔmmɔ lɛlɔ na inyɔ bamba baakya kaduli kemmo geen.

¹⁹Na ɔmmɔ ndi bagyumanane kabla kani na bákya Kora ku Merari kɔdua banana enu kemmo.

²⁰Amu na báƒuna bana lɛlɔ bekyuli bani ndi Lewiƒuɔ bamba ka bataanu kakpakɔ kammɔ egulabi kesekɔ lɛlɔ ku etela ani bédie bése sɛsɛɛ béte Katɔti mmɔ lɛlɔ.

²¹Na Ladan ɔ́si Gerson kɔdua kemmo na anwu náwɔ Yehieli. Na nwuna kaba bebi pii badi atɔƒi benengu na kɔdua kɔmmɔ kemmo.

²²Na Yehieli ɔmɛni náwɔ Setam ku Yoel na ama mɔɔgyumana egulabi kesekɔ kammɔ.

²³Bekyuli bamba bani lɛnɔ mɔɔgyumana kakpakɔ egulabi kesekɔ kammɔ bási Kohat adua ani ndi Amram ku Isehar ku Hebron ku Usiel kemmo.

²⁴Sebuel ɔdi Gersom kaba kemmo ukyuli. Na Mose náwɔ Gersom. Na Sebuel ɔmɛni ndi kakpakɔ egulabi kesekɔ bagyumanane ƒui unengu.

²⁵Na Gersom ɔnwani Eliese bawɔ badi ndi Rehabia ku Yesaia ku Yoram ku Sikri ku Selomot.

²⁶Selomot ɔmɛni ku nwuna lɛlɔ bekyuli mɔɔnu etela ani na bédie sɛsɛɛ béte Unwoti mmɔ lɛlɔ. Na ala amɛni adanku Ɔga Dawid ku atɔƒi benengu ku bekpone benengu ku bekpone kenye benyene etela ani bédie bése sɛsɛɛ béte Unwoti.

²⁷Na si béƒie ala ani na áƒɔ kuye adi na kekpokɔ ni, bekyuli bamɛni beeti ana adi teeboku kakpakɔ.

²⁸Na etela biala na béti béboku kakpakɔ mmɔ ni, Selomot ku nwuna lɛlɔ bekyuli bammɔ mɔɔnu-nya lɛlɔ. Na ala amɛni adanku ani na ási Kenye Udiene Samuel uwi ku Ɔga Saul ɔni ndi Kis ubidi ku Ner ubidi Abner ku Seruia ubidi Yoab adi ƒui.

²⁹Kenania ɔni na ɔ́si Isehar kɔdua ku nwuna banwani ndi aban benengu ku litemi batɛne na ama balábla kabla na kakpakɔ kemmo.

³⁰Ɔƒɛni Hasabia ɔni na ɔ́si Hebron kɔdua kemmo ku nwuna lɛlɔ bekyuli apim unwi ku eti leevu-ine bani na bagyi ala kaduɛ geen ni, ama nnye bɔƒɔtaadi ulu ɔmmɔ lɛlɔ ala bɔtina ku aban lɛgadi lɛlɔ ala kenye. Na bekyuli bamɛni bási Israel kɔlɛkɛ kɔni nkya Yordan Ketu na ɔƒɛ kanukɔ kakɛ mmɔ.

³¹Yeriya lɛnɔ ɔdi Hebron kɔdua unengu. Na anwu ku nwuna lɛlɔ bekyuli mpim inyɔ ku eti leevu-ine bani ndi atɔƒi benengu na bekyuli baabu-ma geen ni, bana lɛkɔkɔ na bɔƒɔtaadi ulu lɛlɔ ala ku aban lɛgadi lɛlɔ ala bɔbla bɔkya. Na ama mɔɔnu ala ammɔ lɛlɔ na Ruben ku Gad ku Manase adua na ɔƒɛ katukɔ kakɛ kemmo.