Read Lelemi Ala Alɛdi 1 27 Bible Online

Ala Alɛdi 1 27 - Lelemi bible

Ala Alɛdi 1 27

¹Kɔbuli biala kemmo ni, kasala bekyuli mpim aavlanyɔ-ine (24,000) mɔɔbla bekpone kabla na Israel bekpone lisu lɛmmɔ kemmo. Kasala lisu lɛmɛni lɛdi atɔƒi benengu ku kekpo kenye benyene ku ɔga ɔmmɔ benengu. Na béle abuli kabla béte ɔga benengu bammɔ na kasala lisu lɛmmɔ baabla kabla na bana kalɔ.

²Anwuɔsu kɔbuli kudeedi kemmo ni, Yasobeam ɔni ndi Sabdiel ubidi kalɔ na lisu lideedi lɛmmɔ bekyuli baabla kabla.

³Na ɔnana ɔmɛni ɔdi Peres kaba kemmo ubi.

⁴Na kɔbuli kunyɔdi kemmo ni, Dodai ɔni ndi Ahohini na nwuna ubunkune ndi Miklot kalɔ na lisu bamba baabla kabla.

⁵Na kɔbuli kɔtɛdi kemmo ni, ɔkpane Yehoada ubidi Benaia kalɔ na lisu bamba baabla kabla.

⁶Na anwu ndi bekpone benengu avlaatɛ ɔtɔnkune na ubidi Amisabad lɛnɔ ɔdi bekpone ɔtɔnkune.

⁷Na kɔbuli kunedi kemmo ni, Yoab ɔnwani Asahel kalɔ na lisu bamba baabla kabla. Na kama ƒui ni, ubidi ɔni baalɔ Sebadia nébo úbenye-nwu kenye na ɔɔtɔnku bekpone lisu lɛmmɔ.

⁸Na kɔbuli kɔlɔndi kemmo ni, Samhut ɔni nási Isra kɔdua kemmo kalɔ na lisu bamba baabla kabla.

⁹Na kɔbuli kɔkundi kemmo ni, Tekoani ɔni baalɔ Ikes ubidi Ira kalɔ na lisu bamba baabla kabla.

¹⁰Na kɔbuli maatɛdi kemmo ni, Heles ɔni nási Pelon na Eƒraim kalɛkɛ mmɔ kalɔ na lisu bamba baabla kabla.

¹¹Na kɔbuli maanedi kemmo ni, Husani ɔni ndi Sebekai na ɔ́si Sera kɔdua kemmo ni, nwuna kalɔ na lisu bamba baabla kabla.

¹²Na kɔbuli yaalenwidi ni, Abieser ɔni nási Anatot na Benyamin kalɛkɛ kemmo ni, nwuna kalɔ na lisu bamba baabla kabla.

¹³Na kɔbuli leevudi kemmo ni, Maharai ɔni nási Netoƒa na badi Sera kɔdua bekyuli ni, bana kalɔ na lisu bamba baabla kabla.

¹⁴Na kɔbuli leevu-kunwidi kemmo ni, Benaia ɔni nási Piraton na Eƒraim kalɛkɛ kemmo ni, nwuna kalɔ na lisu bamba baabla kabla.

¹⁵Na kɔbuli leevu-kunyɔdi kemmo ni, Heldai ɔni nási Netoƒa na ɔdi Otniel kaba kemmo ubi ni, nwuna kalɔ na lisu lɛmmɔ baabla kabla.

¹⁶Anyi ani na bɔdubo bunu mɛni ndi Israel adua ammɔ batɔnkune. Sikri ubidi Eliese anwu mɔɔtɔnku Ruben kɔdua bekyuli. Na Seƒatia ɔni ndi Maaka ubidi mɔɔtɔnku Simeon kɔdua bekyuli. Na Hasabia ɔni ndi Kemuel ubidi mɔɔtɔnku Lewiƒuɔ kɔdua. Na Sadok mɔɔtɔnku Aaron kɔdua bekyuli. Na Elihu ɔni ndi Dawid ɔnwani mɔɔtɔnku Yuda kɔdua bekyuli. Na Omri ɔni ndi Mikael ubidi mɔɔtɔnku Isakar kɔdua bekyuli. Na Ismaia ɔni ndi Obadia ubidi mɔɔtɔnku Sebulon kɔdua bekyuli. Na Yerumot Asriel ubidi mɔɔtɔnku Naƒtali. Na Hosea ɔni ndi Asasia ubidi mɔɔtɔnku Eƒraim kɔdua bekyuli. Na Yoel ɔni ndi Pedaia ubidi mɔɔtɔnku Manase kɔdua bekyuli bani nkya bésie ɔƒɛ kanukɔ kakɛ. Na Ido ɔni ndi Sekaria ubidi mɔɔtɔnku Manase kɔdua bekyuli bani nésie ɔƒɛ katukɔ kakɛ. Na Yaasiel ɔni ndi Abner ubidi mɔɔtɔnku Benyamin kɔdua bekyuli. Na Asarel ɔni ndi Yeroham ubidi ni, anwu mɔɔtɔnku Dan kɔdua bekyuli.

²³Amu na uwi ɔni na Dawid ɔ́lɛ ugyii ka ɔka Israel kadi bekyuli ni, úbo-ma ɔda ka bataka bekyuli bani na bana akwa ébo kalɔ étulo akwa aavlanyɔ, ɔsika Unwoti úse kenye úse ɔ́si kuuku ka Israel bekyuli badubo bumomo geen aani kayaa ayabi muedi.

²⁴Anwuɔsu Seruia ubidi Yoab úse kalɔ ku bekyuli bammɔ bɔka, nsu uwi ɔni na Unwoti úse kalɔ ɔɔní Israelƒuɔ kɔtu ni, ɔ́da-ma bɔka ɔ́ya. Na ɔkɛnku ɔmmɔ ɔsu ni, bétenweni bekyuli bammɔ bumomo geen bátakya Dawid ala alɛdi ɔku unengudi ɔmmɔ kemmo.

²⁵Adiel ubidi Asmavet na báƒuna na ɔɔnu ala kesekɔ kani na kadi ɔga ɔmmɔ alati kadi geen lɛlɔ. Na Yonatan ɔni ndi Usia ubidi na báƒuna ka utaanu ɔga ala kusekɔ bamba kɔni na kɔkya lɛma ku akpaklɔ bamba ku kɔgyumanakɔ kɔni na kɔkya Israel ƒui lɛlɔ.

²⁶Na Esri ɔni ndi Kelub ubidi mɔɔnu kabla bablane bani mɔɔtuma na ɔga kalɔ lɛlɔ lɛlɔ.

²⁷Na Simei ɔni nádi Rama mɔɔnu egyiibi mmo bɔmmɔ lɛlɔ na Sabdi ɔni nási Seƒam mɔɔklibi ntɛ bɔni na beedie taasiku mmɔ lɛlɔ.

²⁸Na Baal Hanan ɔni nási Geder mɔɔnu nnɔ egyii ku egyii bamba ani na akya abi kaƒɔna na ɔƒɛ kanukɔ kakɛ mmɔ lɛlɔ. Na Yoas mɔɔklibi nnɔ bɔni na bédie básiku mmɔ lɛlɔ.

²⁹Sitrai ɔni nási Saron mɔɔnu ɔmantɛ bakɔ bani mɔɔdi na Saron ketele kemmo mmɔ lɛlɔ. Na Saƒat ɔni ndi Adlai ubidi mɔɔnu bebuo bani na bakya ɔkwalɛ kemmo mmɔ lɛlɔ.

³⁰Na Obil ɔni ndi Ismael kaba kemmo ubi mmɔ mɔɔnu bebuo ala betine bani mbo keƒu mmɔ lɛlɔ. Na Yedeia ɔni nási Meronot mɔɔnu bebuo ala betine bebliidi lɛlɔ. Na Yasis ɔni ndi Hagritni mɔɔnu baƒonu ku bese lɛlɔ.

³¹Na bekyuli bammɔ ndi bekyuli bani mɔɔnu Dawid lɛgadi ala ani na ubo lɛlɔ.

³²Dawid ɔnwani ubidi ɔni ndi Yonatan ɔdi ɔnundane geen na nwuna lɛlati ɔsu uute Dawid kasusu geen. Na Yehiel ɔni ndi Hakmoni ubidi nátaatina Dawid bebi bananabi ala.

³³Na Ahitoƒel ku Husai ɔni ndi Arkini lɛnɔ badi nwuna kasusu bakyane akɔ inyɔ badi.

³⁴Yehoiada ɔni ndi Benaia ubidi nsia Ahitoƒel kama aani Dawid kasusu ɔkyane. Kama asa na Abiatar lɛnɔ úbenwini nwuna kasusu ɔkyane. Na Yoab nádi nwuna bekpone ɔtɔnkune.