Read Lelemi Ala Alɛdi 1 5 Bible Online

Ala Alɛdi 1 5 - Lelemi bible

Ala Alɛdi 1 5

¹Bamɛni ndi Ruben ɔni ndi Israel ubidi udeedi bebi. Ɔdi ubi udeedi geen, nsu uwi ɔni na úbile ɔti katɛnkɔ na ɔ́ya na keesé lɛlɔ ni, nwuna kenyekɔ aani ubi udeedi kalɛ béti-ka béte Yoseƒ ɔni ndi Israel ubidi. Ɔmmɔ ɔsu bátakana na béte-nwu lɛnyi bakya bebi bedeedi bɔwɔ ɔku kemmo aani ubi udeedi ɔni báka bɔ́wɔ kalɛ.

²Na ina ka Yuda mbo ɔyikun utulo nwuna banwani ƒui akɔ na ɔdi lɛlɔ ɔdine ni, Yoseƒ beti bábla Israel ubi udeedi.

³Na Ruben ɔni ndi Israel ubi udeedi bebi ndi Hanok ku Palu ku Hesron ku Karmi.

⁴Na Yoel kaba bebi ndi Semaia ku Gog ku Simei

⁵ku Mika ku Reaia ku Baal

⁶ku Beera ɔni Asiriaƒuɔ Ɔga Tiglat-Pileser úƒie ɔ́tɔlɔku. Na Beera ɔmɛni ɔdi Rubenƒuɔ ɔtɔnkune.

⁷Na kalɛ na báwɔ-ma na bana atɔƒi kaba kenye na bénweni bákya ɔku kemmo ndi Yeiel ɔni ndi bana ɔtɔnkune ku Sakaria

⁸ku Bela ɔni ndi Asas ubidi ku Sema ku Yoel. Na bélie Aroer ku Nebo ku Baal-Meon.

⁹Na ɔƒɛ kanukɔ kakɛ ni, bélie bétédu ketele kalɔ kakwiidi kammɔ kɔmadɔ na útédu Euƒrate Ketudɔ. Ɔsika bana bebuo bémomo bébu na Gilead kalɔ lɛlɔ.

¹⁰Na Saul lɛga bɔdi uwi ni, békpo bádi Hagarƒuɔ lɛlɔ. Na béti Hagarƒuɔ kakyakɔ kani ƒui na kewi Gilead ɔ́ƒɛ katukɔ.

¹¹Na Gadƒuɔ nli nde-ma na Basan útédu Salka.

¹²Na Yoel ndi bana ɔtɔnkune na Saƒam ɔsia asa na Yanai ku Saƒat na Basan mmɔ.

¹³Na bana kaduli lɛlɔ bekyuli ndi Mikael ku Mesulam ku Seeba ku Yorai ku Yakan ku Sia ku Eber na bana ƒui bebo maatɛ.

¹⁴Na bamɛni ndi Abihail kaba bebi, Huri náwɔ Abihail ɔni náwɔ Yaroa ɔni náwɔ Gilead ɔni náwɔ Mikael ɔni náwɔ Yesisai ɔni náwɔ Yahdo ɔni náwɔ Bus.

¹⁵Na Ahi ɔdi Abdiel ubidi ɔni ndi Guni ubidi na ɔdi bana ɔtɔ unengu.

¹⁶Na Gadƒuɔ bélie Gilead ɔni nkya Basan ku nwuna akpaklɔ ani nasiaku lɛlɔ ku bebuo kadikɔ kalɔ ƒiaa kani na kewi Saron mmɔ útédu kana lɛmii ƒui.

¹⁷Na bénweni ala amɛni ƒui bákya atɔƒi ku kaba kemmo bɔwɔ ɔku kemmo. Na Yudaƒuɔ Ɔga Yotam ku Israelƒuɔ Ɔga Yerobeam lɛga bɔdi uwi.

¹⁸Na Ruben ku Gadƒuɔ ku Manase kaba kakɛ bebo bekpone mpim aavlene-ine eti leevu-alɔ ku leevu (44,760) na bédu kalɛ na beti kɔtaminta ku agyumanala besie kekpo. Na bátina-ma kalɛ na beekpó lɛnɔ.

¹⁹Na bétékpoku Hagarƒuɔ ku Yetur ku Neƒis ku Nodab.

²⁰Na béti bana anu básia Katɔti lɛlɔ. Na bákpali-nwu ka ute-ma kebunku. Na Katɔti lɛnɔ únu-ma bɔkpali. Na békpo bádi Hagarƒuɔ bammɔ ku bakladi bammɔ lɛlɔ.

²¹Na béƒie ala amɛni báƒɔ básiku bana bekisine kudɔ. Bebuo ala betine mpim liti (50,000) ku baƒonu mpim eeti alɔ (250,000) ku bebuo ala betine bakɔdi mpim eti ene (200,000) ku bekyuli mpim eti anyɔ (100,000) bátɔlɔku.

²²Na bádu bekisine bammɔ kaduɛ. Ɔsika Katɔti ɔlati muukpó kekpo kammɔ. Na kaba bekyuli bammɔ bamu beli ɔmii ɔmmɔ lɛlɔ útédu ka kekpo kéƒie-ma katɔlɔku.

²³Na Manase kaba kakɛ bekyuli bamɛni bemomo geen. Na belie básiku Basan útédu Baal-Hermon ku Senir ku Hermon Kɔbi eli.

²⁴Na bekyuli bamɛni ndi bana atɔƒi benengu, Eƒer ku Yisi ku Eliel ku Asriel ku Yeremia ku Hodawia ku Yahdiel. Na bekyuli bammɔ ƒui bebo kayi na badi bekpone geen. Na báƒɔ lɛnyi na bana lɛtɔ kemmo.

²⁵Nsu bekyuli bammɔ bátasiaku bana bati kuuku Katɔti kama. Na béni-nwu na bésie bákya baakpá benwoti bani Katɔti ɔ́bɔku ɔ́lɛku kalɔ kammɔ lɛlɔ.

²⁶Ɔmmɔ ɔsu Katɔti ɔ́ya na Asiriaƒuɔ ɔga ɔni baalɔ banii Tiglat-Pileser úteduo bana kalɔ kammɔ kemmo. Na ɔ́bɔku Ruben kaba ku Gad kaba ku Manase kaba kakɛ kani nli ɔƒɛ katukɔ ɔ́lɛku kalɔ kammɔ lɛlɔ. Na úte-ma keliekɔ na Hala ku Habor ku Hara ku Gosan Ketudɔ na belie mmɔ ubedu ɔmwi kadi.