Read Lelemi Ala Alɛdi 2 1 Bible Online

Ala Alɛdi 2 1 - Lelemi bible

Ala Alɛdi 2 1

¹Ka Unwoti Katɔti úte Dawid ubidi Ɔga Salomo lɛnunda ɔsu ni, ɔ́ya na únwini ɔga ɔyikune geen, na nwuna ɔyikun ɔ́di nwuna lɛgakadikɔ kammɔ ƒui lɛlɔ.

²Limeyi linwi ni, Salomo ɔ́su Israel kadi bekyuli ku bekpone benengu ku lɛku batine ku atɔƒi benengu ƒui kenye kadi.

³Mmɔ na anwu ku nwuna kadi bekyuli ƒui bákɔ bésie Gibeon Kɔbi lili, ɔsika uwi ɔmmɔ kemmo ni, Katɔti Bunyimi Adaka ɔni na Unwoti kabla ɔblane ɔni ndi Mose ɔ́nwi na kalɔ kakwiidi kemmo mmɔ ni, mmɔ na únye.

⁴Nsu na uwi ɔmmɔ lɛlɔ ni, Salomo ɔti Dawidi ɔ́ɔda Bunyimi Adaka ɔmmɔ ɔ́gyu kesii kani baalɔ banii Kiriat-Yearim mmɔ úbenyene kevo kani na anwu Dawid ɔ́tu úte Adaka ɔmɛni na Yerusalem.

⁵Nsu abuala egyiedi lɛkpabi lɛni na Besaleel lɛnɔ ɔ́tu únyene Adaka ɔmɛni anumi lɛ́mu linye kɔbi lili mmɔ. Anwuɔsu mmɔ na Salomo ku nwuna kadi bekyuli bákɔ bésie bátábla akpala. Besaleel ɔmɛni ɔ́ti ndi Uri ɔni ɔti ndi Hur.

⁶Na abuala egyiedi lɛkpabi lɛmmɔ kudɔ ni, Salomo ɔ́du bebuo apim unwi ɔ́bla akpala bɔkyula ƒui ɔdi úte Katɔti na mmɔ.

⁷Na usien ɔmmɔ ni, Katɔti údie lɛlɔ ɔ́tina Salomo na ɔ́su-nwu ɔnini, “Salomo, vele-mi lɛla biala na aayɔ́ na ndubuti-ni lite-ɔ.”

⁸Mmɔ ni, Salomo údie kenye ɔnini, “Unwoti Katɔti, édie ƒula lɛƒɔndia bonwu átina mina ɔti Dawid uwi biala kemmo, na ami na ásɔ éti énwini Israelƒuɔ ƒui ɔga.

⁹Ábla-mi na ndi bana ɔga, nsu nu kalɛ na bemomo aani kɔnwinimi kɔni nwi kalɔ. Anwuɔsu ni, sia anu na adi ƒula kenye kani na ése mina ɔti lɛlɔ

¹⁰na aya na lɛda anu. Na ete-mi lɛlati lɛni námanku-mi aani ɔga kalɛ na meti mada ƒula kadi bekyuli bonwu bamɛni.”

¹¹Amu na Katɔti ɔ́su-nwu ɔnini, “Salomo, akana na nka eye-mi anii nte-ɔ lɛkɛ iye aƒɔ lɛnyi iye elie ngba gyɔlɔɔ iye ƒula bekisine bayii udu. Nsu na ala amɛni ƒui kenye ni, lɛnunda ku lɛlati na éye-mi kalɛ na eti atɔnku mina kadi bekyuli.

¹²Anwuɔsu ndubɔya na ada anu geen na ati lɛla lɛnɔ. Na ɔmmɔ kama lɛnɔ ni, ndubɔya na enwini ɔlakɛne geen etulo baga bani ƒui néelie bábavi ku bani masia-a kama ƒui lɛnɔ.”

¹³Ɔmmɔ kama ni, Salomo ɔ́tɔlɔ Gibeon mmɔ únwini úbo Yerusalem Israel ɔma unengudi ɔmmɔ kemmo.

¹⁴Na Salomo ɔ́sala bapɔnkɔ ku bapɔnkɔ kɛɛkɛ bumomo aani apim unwi ku eti maane (1,400) ku bapɔnkɔ mpim leevu-inyɔ (12,000) bani na úle ɔ́kya lɛma linengudi lɛdi kemmo ku Yerusalem.

¹⁵Na Salomo lɛgadi uwi ni, ɔ́ya na sika ɔƒualadi ku ugyiedi ɔ́bu na Yerusalem aani atabi. Na ɔ́ya na bálɛ sida egyii na émomo geen aani kɔnwingyie egyii ani nábu akya Yuda abi kaƒɔna mmɔ.

¹⁶Na kalɛkɛ kani na baalɔ banii Musri ku Kue ni, mmɔ na Salomo beyedine béye nwuna bapɔnkɔ ku bana kɛɛkɛ béboku-nwu.

¹⁷Na beeye ɔpɔnkɔ kɛɛkɛ unwi taasiku Egyipte sika ɔƒualadi antabi akyami maatɛ unu. Na ɔpɔnkɔ unwi kuye kɔdi sika ɔƒualadi antabi lɛkyami linwi ku kakɛ unu. Na beyedine bammɔ basɔku-ma beye bete Hetiƒuɔ ku Siriaƒuɔ baga.