Read Lelemi Ala Alɛdi 2 10 Bible Online

Ala Alɛdi 2 10 - Lelemi bible

Ala Alɛdi 2 10

¹Rehoboam úsie Sekem kesii kani na Israelƒuɔ ƒui benye bagya-nwu ka bese-nwu lɛga na bebi-nwu gagabwa kammɔ.

²Mmɔ ni, Nabat ubidi ɔnanabi ɔni baalɔ Yeroboam únu lɛla lɛni mɔɔlɛ́, anwuɔsu únwini ɔ́si Egyipte úbo ɔ́si kesii kani na nka úsie útábɛ Salomo.

³Na Israelƒuɔ adua ani na akya kalɔ kammɔ katɔ kakɛ bátala na bátálɔ Yeroboam béboku. Amu na bana ƒui báta bésie Rehoboam kudɔ na bátásu-nwu banini,

⁴“Ƒ'ɔti Salomo únye-bu lɛlɔ na bútaabla kabla kpakplaa. Nsu si awɔ áya na bula kabla kammɔ kákɔsi ɔkplu bɔyu lɛni ni, bɔdubo lili kalɔ bɔkya bute-ɔ na babla lɛla biala na adubɔsu-bu anii bɔbla bute-ɔ.”

⁵Amu na Rehoboam úde kenye ɔnini, “Binwini bibo na emeyi atɛ kama na ndubudie lɛla lɛni na bíye-mi kenye lite-mii.”

⁶Mmɔ na Rehoboam ɔ́tɔlɔ úsie bakutine benengudi ku batɔnkune badi kudɔ bani nádi benengu béte ɔti uwi ɔni na ɔ́kya na útéye-ma ɔnini, “Bi na ɔlɛka lɛsu bekyuli bamɛni?”

⁷Amu na bédie kenye banini, “Si aayɔ́ anii bekyuli bamɛni bábla-a kabla na beteenu-ɔ litemi bɔdi ni, amu taabla lɛƒɔndia na ese-ma kenye ka adubɔya na bana kabla kasɔ kalayu ɔkplu mmomu kadubɔbla buɛɛ.”

⁸Nsu Rehoboam úni na úteti bana kasusu kani na bákya-nwu. Mmomu ɔ́tɔlɔ úsie bakloƒu bakɔdi kudɔ bani ndi-nwu ligye na ɔƒaani badi nwuna bakutine kudɔ.

⁹Ama na útéye ɔnini, “Bi na bɛɛkali ka lɛsu bekyuli bani mɔɔsu-mi mɛni banii mbla na bana kabla kabla-ma kpɛtɛ kpɛtɛ?”

¹⁰Amu na nwuna kasusu bakyane bakɔdi bamɛni básu-nwu banini, “Lɛla lɛni na abu bɔ́kali ka asu-ma ndi ɔnini, ‘Si bíti mina ɔti bɛ́kɔku-mi ni, bɛdubɔnu bɔti ka mina ɔti ɔ́sɔ na mina kudɔ na mina kɔnu lɛnimi libliidi ƒui líbomo litulo mina ɔti kavobi.

¹¹Ɔ́ya na bɛ́bla kabla kpakplaa, nsu ami ndubɔya na bɛbla bitulo lɛni. Na si ɔdi ɔ́ƒiɔ ni, kugyiimi na uuti taaní ukyuli ɔmmɔ kɔtu, nsu ndubuti ebola ani na bábla ku abuala ani mbo ɔbi yayaaya bɔni bani maƒiɔ kɔtu!’ ”

¹²Rehoboam ku anwu badi bammɔ bénwini bébo emeyi atɛ kama.

¹³Na Rehoboam úni benengu bammɔ bɔlɛ na úteti-mu munu munu mmomu útemi ku ogya geen

¹⁴na ɔ́su-ma kasusu kani na ɔ́ƒɔ ɔ́siku nwuna kasusu bakyane bakɔdi kudɔ ɔnini, “Mina ɔti ɔ́ya na bɛ́bla kabla kpakplaa, nsu ami ndubɔya na bɛbla kani na kebo ɔkplu ketulo kammɔ muedi. Na ɔ́ni bekyuli bani náƒiɔ kɔtu ku kugyiimi, nsu ebola ani na béti abuala ani na ebo yayaaya na ndubuti lɛni bani maƒiɔ kɔtu.”

¹⁵Amu ka bekyuli bammɔ bánu báti ka Rehoboam ɔɔɔdubo-ma litemi bunu ɔsu ni, báva momoomo básu banini, “Bɔdubɔta bunye Dawid ɔtɔ kemmo bekyuli litemi lɛlɔ na utalɛka bunu-ma litemi na bɔdi-ni lɛlɔ. Bɔkana na butaabla lɛla lɛni na abu alati bɔɔyɔ́. Bula kadi bekyuli Israelƒuɔ, bibo na bɛya na buteesie bula ɔma! Na Rehoboam utaadi nwuna bekyuli lɛlɔ.” Amu na Rehoboam ɔ́tala Adoniram ɔni nnye kabla bɔbla kenye ɔnii utátɛmiku bekyuli bammɔ, nsu bekyuli bammɔ bébo-nwu atabi bádu. Mmɔ na Rehoboam úkeli úsie nwuna ɔpɔnkɔ kɛɛkɛ kudɔ na útéti-nwu na úkeli ɔ́tɔlɔ úsie Yerusalem. Na ɔmmɔ kama Israelƒuɔ adua ani na ási kalɔ kammɔ katɔ kakɛ ƒui bátɔlɔ bésie bana kalɔ lɛlɔ na bányonu Rehoboam na utaadi bani ndi Yudaƒuɔ kani lɛlɔ. Na ɔ́si limeyi lɛmmɔ lɛlɔ ni, Israelƒuɔ adua atɔdi ammɔ áta enye Dawid ku nwuna ɔtɔ kemmo bekyuli bani na Yuda kalɔ lɛlɔ lɛlɔ.