Read Lelemi Ala Alɛdi 2 11 Bible Online

Ala Alɛdi 2 11 - Lelemi bible

Ala Alɛdi 2 11

¹Uwi ɔni na Rehoboam únwini úsie Yerusalem kama ni, ɔ́bla kasusu ka útékpo Israel na ɔsɔ utaadi kalɛkɛ kemodi kammɔ ƒui lɛlɔ. Anwuɔsu ɔ́lɔ bekpone mpim eti atɛ ku avlaatɛ ɔ́siku Yuda ku Benyamin adua kemmo úbasala.

²Nsu na uwi ɔmmɔ lɛlɔ ni, Unwoti ɔ́ɔtɛmiku Kenye Udiene Semaia

³ɔnii ɔsu Rehoboam ku ukyuli biala na Yuda ku Benyamin adua kemmo ɔnini,

⁴“Unwoti uubó-mii ɔda ɔnii bina ɔdi utata kekpo ku adua ani na akya katɔ kakɛ mmɔ ɔdi. Ɔsika bina lɛlɔ bekyuli kani na badi. Binwini biteesie ɔma! Ɔsika Unwoti ɔlati náya na ala amɛni ébo éte lɛni.” Rehoboam ku nwuna bekpone bénu Unwoti litemi na bétekpoku Yeroboam ku nwuna bekpone.

⁵Yerusalem na Rehoboam úlie útaadi lɛga na Yuda kalɔ lɛlɔ na ubo lɛma linengudi pii lɛni na úti únwini kɔgyumanakɔ kpakplaa kesii kani na nwuna bekpone. Na lɛma lɛmmɔ lɛdi ndi

⁶Betlehem ku Etam ku Tekoa,

⁷ku Bet-Sur ku Soko ku Adulam ku

⁸Gat ku Maresa ku Siƒ ku

⁹Adoraim ku Lakis ku Aseka ku

¹⁰Sora ku Aiyalon ku Hebron. Na uwi ɔni na ɔ́tu ɔmana lɛma lɛmɛni ɔ́wɔlɔ na Yuda ku Benyamin kalɛkɛ ni,

¹¹ɔ́wia bekpone ɔtɔnkune úte lɛma lɛmmɔ ɔdi biala bekpone na úti adila ku ntɛ ku nnɔ útése-ma kudɔ mmɔ.

¹²Lɛni kani na úte-ma atula ku kekpo agyumanala. Na ekpo amɛni na nwuna ɔyikun ɔni na úti ɔda Yuda ku Benyamin adua ammɔ ɔ́sala ɔkya.

¹³Na uwi ɔmɛni kemmo ƒui ni, bakpane ku Lewiƒuɔ bani na bakya adua atɔdi ammɔ kemmo ƒui ni, ama benye Ɔga Rehoboam kama.

¹⁴Ɔƒɛni ka Yeroboam ku baga bamba bani násia-nwu kama bétenu kalɔ ka Lewini ɔdi ɔbla ɔkpane kabla na Israel kalɔ lɛlɔ ɔsu ni, Lewiƒuɔ pii bátɔlɔ na báda bana lɛma ku bebuo kɔdikɔ kɔlɔ kammɔ ƒui béwi na bátɔlɔ bésie Yerusalem ku Yuda lɛma bamba lɛnɔ kemmo.

¹⁵Yeroboam ɔlati ɔ́ƒuna nwuna bakpane bani mɔɔkpá na kadi bamba baƒiɔ bani na bése béte lɛlɔ na abi eli mmɔ lɛlɔ na Israel kalɔ lɛlɔ na ekpo ani na ɔ́tu bese ku ɔmantɛ bakɔ bebi ayu ekpidi baƒiɔ ɔ́lɛ mmɔ.

¹⁶Nsu Israelƒuɔ badi baayɔ́ ka bataakpa Unwoti Katɔti ɔni na bana bati kuuku bákpa mmɔ, anwuɔsu bekyuli bamɛni básiaku Lewiƒuɔ ku bakpane bammɔ bátɔlɔ bésie Yerusalem kesii kani na badubɔkana na babla akpala bete Unwoti.

¹⁷Na akwa atɛ kemmo ƒui ni, na bákya Ɔga Rehoboam kalɔ na baadi nwuna litemi lɛlɔ na nwuna lɛgakadikɔ kemmo aani kalɛ na béteenu Dawid ku Salomo litemi na bátaadi-ni lɛlɔ.

¹⁸Amu na Rehoboam úti uleku ɔdi baalɔ banii Mahalat. Na ɔti ndi Dawid ubidi ɔnanabi ɔni baalɔ banii Yerimot. Na uleku ɔmɛni uni baalɔ banii Abihail ɔni ndi Yese ubidi ɔnanabi Eliab ubidi ulekubi.

¹⁹Rehoboam ku Mahalat báwɔ bebi bananabi ɛtɛ na bana anyi ndi Yeus ku Semaria ku Saham.

²⁰Rehoboam úti uleku bamba ɔni baalɔ banii Maaka ɔni ndi Absalom ubidi ulekubi. Na bebi bananabi bani na báwɔ ndi Abiya ku Atai ku Sisa ku Selomit.

²¹Beleku bani na Rehoboam úti bebo leevu-maane ku basɔnɔ bani lili na úvele, nsu útabla-ma tɔ elila liti ku leevu. Na ubo bebi bananabi aavlanyɔ-maane ku bebi belekubi liti ku leevu. Ɔƒɛni Rehoboam ɔɔyɔ́ ulekudi Mahalat teetulo beleku bani ƒui na úti.

²²Anwuɔsu anwu ku-nwu ubidi ɔnanabi udeedi ɔni baalɔ Abiya na ɔ́ɔƒuna úse ka ɔdi lɛga si uwi ɔni na anwu ɔsɔ uuubo.

²³Na Rehoboam ɔ́da anu geen ɔsu ni, nwuna bebi bananabi akɔ unwi unwi na úti únyene lɛma lɛni na bátu bése kalɔ kammɔ bɔgyumana kenye na nwuna lɛgakadikɔ. Na ɔ́wia ala ani ƒui na baawia úte ɔdi biala na ɔ́wia beleku lɛnɔ úte bana akɔ ɔdi biala na uti.