Read Lelemi Ala Alɛdi 2 12 Bible Online

Ala Alɛdi 2 12 - Lelemi bible

Ala Alɛdi 2 12

¹Uwi ɔni na Rehoboam ɔ́nu ka nwuna ɔyikun ɔ́di nwuna lɛgakadikɔ kammɔ ƒui lɛlɔ ɔ́wɔlɔ ni, uwi útetu asa na anwu ku nwuna bekyuli ƒui béni na básɔ belenu na baladi Unwoti litemi lɛlɔ.

²Anwuɔsu na Rehoboam lɛga bɔdi lɛkwa lɛlɔndi kemmo ni, Unwoti ɔ́ni-ma kɔtu na ɔ́ya na Egyipteƒuɔ Ɔga Sisak úbekpo Yuda kalɔ kammɔ ƒui na kalɛ na basɔ baaasiaku-nwu siin mmomu bálɛ-nwu kama ɔsu.

³Sisak ɔmɛni útiku nwuna bekpone ku kekpo kɛɛkɛ apim unwi ku eti ene ku bekpone bapɔnkɔ beliene liti ku leevu. Na ɔdanku Egyipteƒuɔ bekpone bani nkya Libia kalɔ kemmo ku Sukot ku Kus kalɔ lɛnɔ kemmo úboku.

⁴Na bébeƒie bekyuli bani ƒui na bakya Yuda lɛma kɔgyumanakɔ kpakplaa kɔmmɔ kemmo ƒui asa na bábwɛ bétéduo Yerusalem.

⁵Na uwi ɔmmɔ kemmo ni, Rehoboam ku Yudaƒuɔ benengu bammɔ békeli bésie Yerusalem batábɛ Sisak kekpo kammɔ. Mmɔ na Kenye Udiene Semaia ɔ́su-ma ɔnini, “Unwoti ɔnii ka bɛ́bla atuɔkplu na bítenu-nwu litemi ɔsu ni, anwu lɛnɔ úni-mii na údie-mii atu. Na Unwoti ɔɔɔdubo-mii bubunku na Sisak kekpo kani na ɔ́ta-mii lɛlɔ mɛni kemmo!”

⁶Lɛla lɛni na Rehoboam ku batɔnkune bamɛni bábla líduo-ma na básu banini, “Unwoti ɔdi ɔ́tɛ. Abu nálɛ-nwu kama sɔsɔ.”

⁷Amu ka Unwoti únu lɛni ni, ɔ́su Semaia ɔnini, “Lɛla lɛni na Yuda kadi bekyuli bábla ni, ekpidi ammɔ éduo-ma sɔsɔ. Anwuɔsu lɛɛɛdubo bɔya na Sisak ku nwuna bekpone badi-ma lɛlɔ na bayila-ma udu ƒui kede kede. Nsu kɔnyi kɔmmɔ kútayɔ-mi tɔ ɔsu ni,

⁸ɔdubo-ma lɛlɔ bɔdi na kekpo kamɛni kemmo na bakya-nwu kalɔ na utaadi-ma lɛlɔ. “Na mina bekyuli bada anu na ɔmɛni lɛlɔ na kavumana kani nkya ka bataabla baƒɔ ɔga ɔdi kabla ku ɔni na bataabla-mi kabla ntɛ.”

⁹Sisak úsie útékpo Yerusalem sɔsɔ na úƒie bana ala ani náƒɔ-ma kuye na kakpakɔ ku ɔga kesii ubunku Salomo sika ugyiedi abuala kekpo agyumanala ƒui ɔ́ƒɔ ɔ́tɔlɔku.

¹⁰Amu na Rehoboam ɔ́ya na bábla abuala egyiedi agyumanala bése sika ugyiedi adi ammɔ kenye na úbo bagyumanane bani nnye lɛma linengudi lɛmmɔ ɔban kenye ka bada-mi edu kaduɛ.

¹¹Na uwi ndi na Rehoboam úsie Unwoti kakpakɔ mmɔ ni, bagyumanane bammɔ beeti abuala egyiedi agyumanala ammɔ teesienku kakpakɔ mmɔ na basɔku-nwu beboku kesii kani na beli baagyumana mmɔ uwi biala na Rehoboam ɔ́wɔlɔ nwuna lɛkpa.

¹²Rehoboam ɔ́sɔ únwini anumi úboku Unwoti lɛlɔ, anwuɔsu Unwoti útaya na bayila Yuda udu ƒui kede kede, anwuɔsu ala ásɔ ádianku-nwu.

¹³Akwa aavlene-unwi na Rehoboam ɔ́ƒɔ asa na únwini ɔga. Na ɔ́di lɛga lɛmmɔ akwa leevu-maatɛ na Yerusalem ɔma unengudi mmɔ kesii kani na Unwoti ɔ́ƒuna ka bakpa-nwu. Na uni ɔni baalɔ Naama ni, ɔ́si Amon ɔma kemmo. Lɛga lɛ́yu Rehoboam na ɔ́lɛ ɔyikun lɛnɔ geen.

¹⁴Nsu ɔ́bla likyulikpi, ka úni ɔnii ulasiaku Unwoti ulu lɛlɔ ɔsu.

¹⁵Na ala ani ƒui na Rehoboam ɔ́bla ku nwuna kaduli bekyuli kɔtɛ ƒui ni, bénweni ala ammɔ bákya kenye bediene inyɔ badi lɛku kemmo bani ndi Semaia ku Ido. Na Ɔga Rehoboam lɛga bɔdi kemmo ni, anwu ku Israelƒuɔ Ɔga Yeroboam béteekpo bukpo bukpo.

¹⁶Na uwi ɔni na Rehoboam úbekpi ni, báva-nwu na nwuna bati kuuku kudɔ na Yerusalem na ubidi ɔnanabi Abiya úbenwini ɔga.