Read Lelemi Ala Alɛdi 2 14 Bible Online

Ala Alɛdi 2 14 - Lelemi bible

Ala Alɛdi 2 14

¹Abiya úbekpi na báva-nwu na Yerusalem na ubidi ɔnanabi ɔni baalɔ Asa úbenwini ɔga. Na akwa leevu kemmo ƒui ni, atu áyɔ Yudaƒuɔ ƒui na keyi buɛɛ kákya.

²Asa ɔ́di Unwoti nwuna Katɔti litemi lɛlɔ na útaabla ala ulu lɛlɔ siin.

³Úbo baƒiɔ ƒui ɔ́bwɛ ku bana abi ƒui. Na úkulo baƒiɔ ligyii lɛni na bálɛ béte Asera baƒiɔ bɔkpa mmɔ bene ƒui. Na ala ani na bávɔ ku atabi ani bánwi bábla báƒiɔ mmɔ ƒui ɔ́bwɛ-nya úwi kalɔ kpɛtɛ kpɛtɛ.

⁴Na ɔmmɔ kama ɔ́su ukyuli biala na Yuda kalɔ lɛlɔ mmɔ ɔnii utaakpa Unwoti Katɔti kalɛ kani na bana bati kuuku bábla. Na ɔdi biala utaadi Unwoti ɔmmɔ ɔda bubo ku nwuna ala ani na ɔ́tina mmɔ lɛlɔ kaduɛ.

⁵Baƒiɔ lɛtɔ lɛni ƒui na bátu ku oloƒui kakyulakɔ abi ƒui ɔ́bwɛ lɛla lɛdi biala na Yuda kalɔ lɛlɔ mmɔ.

⁶Amu na Unwoti úte Yuda kusɛ kusɛ na atu bɔyɔ búbo uwi ɔni ƒui na Asa ɔɔdi lɛga mmɔ. Na ɔ́ya na bátu bámana lɛma pii na línwini kagyumanakɔ kpakplaa.

⁷Ɔ́lɔ bekyuli bammɔ ɔ́sala na ɔ́su-ma ɔnini, “Bɛya na bɔtu awodu bɔmana lɛma lɛmmɔ na bɔtu kɔgyumanakɔ kpakplaa lɛnɔ na bɔbla lɛban lɛni na buti abuala kpakplaa butaabala-ni kenye. Ɔsika kalɔ kamɛni kamu kadi abu kadi, ɔsika bɔɔdi bula Unwoti Katɔti litemi lɛlɔ. Ɔ́ya na atu áyɔ-bu ásiku bula bekisine kudɔ.” Na bekyuli bammɔ lɛnɔ bénu lɛla lɛni na Ɔga Asa ɔ́su-ma na bábla básia lɛɛni.

⁸Bekpone pii bani mbo kayi na bebo ogya bákya Asa. Na mpim eti aku bási Yuda kɔdua kemmo na bada kekpo agyumanala ku atula. Na mpim eti alɔ ku avlaatɛ bási Benyamin kɔdua kemmo na bada kɔtaminta ku kuna atula.

⁹Sera ɔni nási Kus kalɔ lɛlɔ ɔ́tɔnku bekpone mpim mpim akpa leevu úsienku kekpokɔ na ɔma ɔnii baalɔ banii Maresa na Yuda kalɔ lɛlɔ. Na ɔdanku kekpo kɛɛkɛ eti aku.

¹⁰Asa úsie útásiaku-nwu na mmɔ na bana akpa anyɔ ƒui báklibi lɛlɔ béte kekpo na kɔwɛ kɔni na baalɔ banii Saƒata kemmo.

¹¹Amu na Asa ɔ́kpali úvele ɔnini, “Unwoti Katɔti awɔ kani ndubɔkana na ebunku bekpone bani neeebo ɔyikun na badi bani na bebo ɔyikun lɛlɔ. Anwuɔsu ƒula lɛlɔ na bula anu asia ka ebunku-bu. Na bɔdubo bekpone bani mbo ɔyikun geen mɛni bukpoku buti bute ƒula lɛnyi ɔbu. Na bɔgyi ka ulakana na wadi-ɔ lɛlɔ, ɔsika awɔ ndi Unwoti bula Katɔti.”

¹²Unwoti úbunku Asa ku nwuna bekpone na bádi Kus bekpone bamɛni lɛlɔ. Na bana bekisine bekpone bamɛni békeli bátɔlɔ.

¹³Nsu Asa ku nwuna bekpone bábɔku-ma laa útédu kesii kani baalɔ banii Gerar. Na bususu geen na bésusu-ma ɔni na Kusƒuɔ básɔ bátakana na benwini benye basiaku-ma! Amu na Yudaƒuɔ bekpone bammɔ béti lɛla biala na lɛdi Kusƒuɔ bamɛni lɛdi bénwini bana ɔdi.

¹⁴Na bekyuli bani nkya Gerar ekutɛ mmɔ bénu lɛla lɛni nálɛ na béti bɔyia geen béte Unwoti. Anwuɔsu úse ɔ́bla Yudaƒuɔ kpɛtɛ kpɛtɛ geen ka badi bana bekisine bammɔ lɛlɔ na béti bana ala ani ƒui náƒɔ-na kuye bálɛku bana lɛma kemmo bátɔlɔku.

¹⁵Na akpaklɔ ani na bana bebuo lɛlɔ banune bábla na baanu bebuo lɛlɔ ni, bétékpoku-ma na béti bana bese ku baƒonu pii bátɔlɔku. Na bénwini bésie Yerusalem.