Read Lelemi Ala Alɛdi 2 15 Bible Online

Ala Alɛdi 2 15 - Lelemi bible

Ala Alɛdi 2 15

¹Na uwi ɔdi kama ni, Katɔti ɔ́tɛmiku Oded ubidi ɔnanabi ɔni baalɔ Asaria. Uwi ɔdi kama ni, Katɔti ɔtɛmiku Obed ubidi Asaria.

²Mmɔ kani na Asaria ɔ́ta kɔnakunwi úsie Asa kudɔ na útásu-nwu ɔnini, “Awɔ Ɔga Asa ku Yuda ku Benyamin kadi bekyuli, binu! Uwi biala na bɛɛsia Unwoti ɔda bubo anu na bɛɛdi-mu lɛlɔ na bɛɛkpá-nwu ni, ɔdubulieku-mii na ubunku-mii na uledie-mii atu na uni-mii kudii.

³“Ɔsika uwi gyɔlɔɔ ɔdi mɛni ni, Israelƒuɔ béni na basɔ balakpa Katɔti geen ɔmmɔ na iye benu bakpane bani na nka badubɔkana na batina-ma ala basiku Katɔti ɔmmɔ lɛlɔ. Na béni na baladi Unwoti ɔda bubo lɛlɔ.

⁴Nsu uwi biala na ɔgbankpi ɔdi anwu úbo ni, beenwíni teebo Unwoti Katɔti kudɔ ka bakpa-nwu.

⁵Ala ƒui éƒu ákya Israel na emeyi ammɔ kemmo ɔni na ɔdi ɔgbankpi ute ukyuli biala ka usie mmɔ kesii kadi.

⁶Kɔlɔ kuukpóku lɛlɔ na lɛma na bekyuli baabwɛ lɛlɔ lɛma linengudi taayila-nu udu. Ɔsika Katɔti ɔ́ya na lɛbibo bɔnwuna takɛ bɔ́ƒɔ kesi kesii.

⁷“Anwuɔsu ɔlɛka bise kayi. Na bitete lili! Katɔti ɔlati ɔdubɔbu-mii na ɔkɔliku-mii katɔ si bɛɛdi nwuna ɔda bubo lɛlɔ.”

⁸Uwi ɔni kani na Ɔga Asa únu kenye udiene Asaria kenye kamɛni ni, mmɔ kani na úbo ɔda ɔnii bebo baƒiɔ biala babwɛ na Yuda ku Benyamin kalɔ kemmo mmɔ na bayila-ma udu. Na babwɛ bani ƒui na bakya lɛma lɛni na úkpo úƒie ɔ́ƒɔ na Eƒraim kalɛkɛ kemmo mmɔ lɛnɔ ƒui. Na ɔ́sɔku lɛkpabi lɛni nnye kakpakɔ lɛgbanya anumi mmɔ lɛnɔ ɔ́klibi.

⁹Asa ɔ́ya na bálɔ Yuda ku Benyamin kalɔ bekyuli ƒui bábasala ku bekyuli bani na bakya Eƒraim kalɛkɛ kemmo mmɔ ƒui. Na bálɔ Manase ku Simeon kɔdua bekyuli bani nkya ɔƒɛ kanukɔ kakɛ na Yuda kalɔ kemmo. Ɔsika bekyuli bamɛni ketulodikɔ benye Ɔga Asa kama na baadi nwuna litemi lɛlɔ, ɔsika bánu báti ka Unwoti ɔsiaku-nwu geen.

¹⁰Amu na Asa lɛga bɔdi lɛkwa leevu-lɛlɔndi kemmo ni, bana ƒui bása na Yerusalem.

¹¹Limeyi lɛmmɔ kani lɛlɔ na béƒie ɔmantɛ bakɔ eti leevu-ene ku baƒonu ku bese mpim maatɛ bálɛku bebuo bani na bákpanku básiku Gerar mmɔ akɔ na bádu-ma bákpala béte Unwoti.

¹²Na bése kenye kpakplaa ka badubɔsiaku Unwoti Katɔti kama siin na basɔ balálɛ-nwu kama mmomu badubo butaakpa anwu ɔni nabana bati kuuku bákpa-nwu lɛti pɛ.

¹³Na ukyuli biala na úni ɔnii ulénu Unwoti Katɔti litemi na wadi-ni lɛlɔ ni, badubɔdu-nwu.

¹⁴Na ukyuli biala úse kenye kpakplaa ka badubɔdi linyese lɛmɛni lɛlɔ bete Unwoti. Na bádi limeyi lɛmmɔ ku ebiti kɔvanu kɔkpɛɛ.

¹⁵Lɛlɔ lɛ́yɔ ukyuli biala na kenye kpakplaa kani na bése mɛni ɔsu na ɔkɛnku ɔmmɔ ɔsu Unwoti lɛnɔ úte-ma kusɛ kusɛ ɔnii keyi kayɔku-ma na bakɛ bɔnwuna ɔsiku bana bekisine kudɔ.

¹⁶Asa unieku ɔni baalɔ Maaka ɔ́tu baƒiɔ bonwu badi úte uleku Asera kɔwɔ baƒiɔ, anwuɔsu Asa ɔ́bwɛ-ma úwi kalɔ na ɔ́la bana lɛla biala útákyula na Kidron Kɔwɛ kemmo. Na ɔ́ya na bátu Maaka ɔmɛni beleku lɛga lɛni na ɔɔdi.

¹⁷Na uwi ɔni ƒui na Asa úlie ni, útaadi Unwoti litemi lɛlɔ kaduɛ ina ka ɔɔɔdi baƒiɔ bani ƒui na nkya Israel kalɔ lɛlɔ na ɔ́bwɛ.

¹⁸Na sika ɔƒualadi ku ugyiedi ala ani ƒui na bédie bése Unwoti ni, úti-nya útése kakpakɔ ɔtɔ kemmo.

¹⁹Keyi buɛɛ kákya Yuda kalɔ lɛlɔ mmɔ na akwa avlaatɛ ani kemmo na Asa ɔ́di lɛga mmɔ kemmo.