Read Lelemi Ala Alɛdi 2 16 Bible Online

Ala Alɛdi 2 16 - Lelemi bible

Ala Alɛdi 2 16

¹Na Asa lɛga bɔdi lɛkwa avlaatɛ-lɛkundi kemmo ni, Israelƒuɔ Ɔga Basa útátu awodu ɔ́mana Rama kalɛ na busie teetenku lɛlɔ bɔdi bɔsɔ bulakya ama ku Yudaƒuɔ Ɔga Asa ku nwuna bekyuli ntɛ.

²Ka Asa únu ɔmɛni ni, úti sika ɔƒualadi ku ugyiedi ɔ́siku nwuna lɛgakadikɔ ku Unwoti kakpakɔ na úti úmene Aram Ɔga Benhadad na Damasko ɔnii batásu-nwu kenye kamɛni banini,

³“Mɔɔyɔ ka abu ku-ɔ bɔbla unwi aani kalɛ na ƒ'ɔti ku mina ɔti bábla unwi dii. Nu, líti sika ugyiedi ku ɔƒualadi ɔmɛni muumene-ɔ, na ekulo unwi bɔbla bɔni nkya awɔ ku Israelƒuɔ Ɔga Basa ntɛ, na ɔda nwuna bekpone udie mina ɔmii lɛlɔ.”

⁴Benhadad ɔ́bla lɛla lɛni na Asa ɔ́su-nwu na úti Siriaƒuɔ bekpone úmene Israel kalɔ lɛlɔ na bétékpo Iyon ku Dan ku Abel-Maim ku Neƒtali lɛma lɛni kemmo na baaklibi ala buse ƒui na béƒie-ni báƒɔ.

⁵Uwi ɔni na Ɔga Basa únu lɛla lɛni nálɛ ni, ɔ́da Rama bɔtu ɔ́ya na údie kabla kammɔ atu.

⁶Amu na Asa údie lɛdi úte ukyuli biala na ɔkya Yuda kalɔ lɛlɔ mmɔ ɔnii beti atabi ku ligyii lɛni na Baasa ɔ́ya na béti bébewi Rama mmɔ ka batu bamana-nwu na ɔbla kagyumanakɔ kpakplaa mmɔ batɔlɔku mmɔ. Na ɔ́ya na béti atula ammɔ kani bátu bámana Geba ku Mispa.

⁷Na ala ammɔ bɔlɛ bɔwɔlɔ kama uwi klukwii ɔdi kama ni, Kenye Udiene Hanani úsie Asa kudɔ na útásu-nwu ɔnini, “Siriaƒuɔ ɔga lɛlɔ na éti ƒula anu ásia na ɔni na eti ƒula anu asia Unwoti ƒula Katɔti lɛlɔ? Ɔkɛnku ɔmmɔ ɔsu ni, aaadubo bɔkana na adi Siriaƒuɔ bekpone lɛlɔ kudii.

⁸Nyimo Kus ku Libia bekpone kalɛ na bebo ɔkplu geen ku bana bapɔnkɔ kɛɛkɛ ku bekpone bapɔnkɔ beliene bammɔ! Nsu ka éti ƒula anu ásia Unwoti lɛlɔ ka ubunku-ɔ na uwi ɔmmɔ kemmo ɔsu ni, ákana-ma lɛlɔ bɔdi.

⁹Unwoti ɔɔsia ukyuli biala anu uwi biala na uuti nwuna ɔyikun teete bani na béti bana anu básia-nwu lɛlɔ na basiaku-nwu kama siin uwi biala. Nsu kɔdɔlɔ lɛla na awɔ ábla mɛni. Na ɔmmɔ ɔsu keyi buɛɛ kasɔ kaaadubo ƒula lɛgakadikɔ kammɔ bɔkya uwi ɔdi lɛnɔ.”

¹⁰Ka Asa únu lɛla lɛmɛni ni, úti kɔnyi geen na ɔ́ya na bákya Hanani aban ɔtɔ. Na lɛni kani na ɔ́bla anwu ɔlati nwuna bekyuli kalala.

¹¹Lɛla biala na Ɔga Asa ɔ́bla ni, bénweni-ni bákya Yudaƒuɔ ku Israelƒuɔ baga ala alɛdi ɔku kemmo.

¹²Na nwuna lɛga bɔdi lɛkwa avlaatɛ-yaalenwidi kemmo ni, Asa úbakɛ ɔgba ɔdi na ɔlɛ ɔmmɔ ɔ́yu-nwu ɔkplu geen. Nsu nwuna anu ƒui ásia alakpi bablane lɛlɔ kani na ɔɔɔdi Unwoti ka ubunku-nwu.

¹³Na akwa anyɔ kama ni, úbekpi.

¹⁴Amu na asa na uwi ɔmɛni ubo lɛni ni, Ɔga Asa ɔ́ya na béku nwuna kaƒiɔtɔ bése na ɔdi atabi ubu ɔni na bédie na Yerusalem atakpɛ kɔbi kɔdi lɛlɔ. Anwuɔsu mmɔ na báva-nwu. Na béti kesudi ku ugyulo nnɔmii ƒɛƒɛɛ bɔdi béwi kɔƒiɔtɔ kammɔ kemmo ƒui tɛɛ. Na bákyula likpose ekyweni livongu bonwu lɛdi béte-nwu na mmɔ béti bákɔliku-nwu lɛnyi katɔ.