Read Lelemi Ala Alɛdi 2 17 Bible Online

Ala Alɛdi 2 17 - Lelemi bible

Ala Alɛdi 2 17

¹Ɔga Asa ubidi ɔnanabi ɔni baalɔ banii Yehosaƒat nébenwini Yudaƒuɔ ɔga na ɔ́sɔku nwuna lɛgakadikɔ ɔyikun ɔ́bla ɔwɔdi kalɛ na benye basiaku Israelƒuɔ bukpoku biala kenye.

²Na úti bekpone úmene Yudaƒuɔ lɛma linengudi lɛni ndi bana kɔgyumanakɔ kpakplaa mmɔ kemmo ku lɛma bamba kemmo lɛnɔ úbunku lɛma lɛni nkya Eƒraim kalɛkɛ kani na ɔti Asa úkpo ɔƒɔ kemmo lɛnɔ.

³Uwi ɔni na Yehosaƒat ɔti úse kalɔ ku lɛga bɔdi na Yuda kalɔ lɛlɔ ni, útaadi Unwoti litemi lɛlɔ kaduɛ na úni na útakpa Baal baƒiɔ aani kalɛ na baga bani nágyu bátɔ-nwu bábla kalɛ. Na Yehosaƒat lɛnɔ úse kalɔ ɔsiku ɔti ɔbladu kama. Na útaabu Unwoti geen na ɔɔkpá-nwu lɛnɔ. Anwuɔsu úte-nwu kusɛ kusɛ

⁵na úbunku-nwu na ɔ́ya na ɔɔkana na ɔɔdi nwuna lɛgakadikɔ kammɔ lɛlɔ kaduɛ ku ɔyikun. Na Yuda kadi bekyuli bammɔ beeboku-nwu etela ɔni náya na úbenwini ɔlakɛne geen na beete-nwu ɔbu.

⁶Ɔ́siaku Unwoti kama siin na ulu biala lɛlɔ na ɔ́sɔ útalɛ-nwu kama. Na kadi bamba baƒiɔ bani ƒui na bávɔ béte lɛlɔ na mmɔ ni, ɔ́ya na bábwɛ bana ƒui na Yuda mmɔ ku kesii kani na baakpá Asera baƒiɔ lɛnɔ.

⁷Amu na lɛkwa lɛtɛdi lɛni kemmo na Yehosaƒat ɔɔdi lɛga mmɔ kemmo ni, ɔ́ƒuna bakutine ɛlɔ na úte-ma ɔda bubo bɔdi ɔnii batina Unwoti ɔda bubo bɔmmɔ na ɔma unengudi biala kemmo na Yuda kalɔ lɛlɔ mmɔ. Na bakutine bammɔ ndi Benhail ku Obadia ku Sekaria ku Netanel ku Mikaia.

⁸Na bebo Lewiƒuɔ bebunkune yaalenwi badi bani ndi Semaia ku Netania ku Sebadia ku Asahel ku Semiramot ku Yehonatan ku Adonia ku Tobia ku Tob-Adonia. Na Katɔti bakpane inyɔ badi lɛnɔ basiaku-ma bani na baalɔ banii Elisama ku Yehoram.

⁹Na ɔni na bakɛ ulu ƒui ni, na bada Unwoti ɔda bubo ɔku ɔmmɔ na kesi kesii na bésela na nwuna kemmo na baatina bekyuli bammɔ ala taasiku.

¹⁰Amu na kadi bekyuli bani ƒui náka bámana Yuda kalɔ mmɔ baayia Unwoti ɔyikun ɔni na ubo geen, anwuɔsu badi bátakana na bata bekpoku Yehosaƒat.

¹¹Na Ƒilistiƒuɔ béboku-nwu sika ɔƒualadi ku etela bamba kalɛ na keyi buɛɛ kakya ama ku Yehosaƒat. Na Arabiaƒuɔ lɛnɔ béboku-nwu baƒonu mpim maatɛ ku eti leevu-ine. Na bese lɛnɔ lɛni kani.

¹²Ɔmmɔ ɔsu kalɛ na Yehosaƒat ɔɔkɛ́ ɔyikun teebu ni, lɛni kani na ɔɔtú kɔgyumanakɔ lɛma kpakplaa ku lɛma linengudi lɛnɔ

¹³kesii kani na uusé ala. Na ɔ́ya na bekpone babuni geen bakya Yerusalem.

¹⁴Na bási Yuda ku Benyamin adua kemmo. Na básala bekpone bammɔ na bana adua adua kenye. Amu na bábla Adna, na ɔdi bekpone bani nási Yuda ɔtɔnkune na bekpone mpim eti aku bakya-nwu kalɔ na ɔɔnu-ma lɛlɔ.

¹⁵Na Yehoanan ndi nwuna ubunkune. Na bekpone mpim eti alɔ ku avlaatɛ lɛlɔ nkya nwuna kalɔ na ɔɔnu-ma lɛlɔ.

¹⁶Na Sikri ubidi ɔnanabi ɔni baalɔ Amasia, na anwu ɔlati úti lɛlɔ úte ka utaabla Unwoti kabla, ɔdi ubunkune ɔtɛdi. Na bekpone mpim eti ene nkya-nwu kalɔ na ɔɔnu-ma lɛlɔ.

¹⁷Elida ɔdi ukpone ɔni na ubo kayi ku ogya geen, na anwu ntɔnku bekpone mpim eti ene bani nási Benyamin kɔdua kemmo. Na bana akɔ ɔdi biala ɔda kataminta ku kekpo agyumanala.

¹⁸Yehosabad ndi nwuna ubunkune na ɔdanku bekpone mpim eti alɔ ku avlaatɛ na bakya-nwu kalɔ.

¹⁹Bekpone bamɛni ndi bekpone bani mɔɔgyumana ɔga ɔmmɔ na Yerusalem. Nsu bani na úte kabla na bakya kɔgyumanakɔ lɛma linengudi lɛmmɔ kemmo na kalɔ kammɔ ƒui lɛlɔ baaakɛ.