Read Lelemi Ala Alɛdi 2 18 Bible Online

Ala Alɛdi 2 18 - Lelemi bible

Ala Alɛdi 2 18

¹Na uwi ɔmɛni kemmo ni, Yehosaƒat únwini ɔlakɛne geen na ɔ́ƒɔ lɛnyi lɛnɔ. Na anwu ku Israel Ɔga Ahab bényimi lɛla lɛdi ɔkɛnku ubidi ɔnanabi ku Ɔga Ahab ubidi ulekubi lɛlɔ buti lɛlɔ. Na bétu bunyimi bɔmmɔ kɔba na ɔ́kya kɔnu ɔku ɔmmɔ kalɔ.

²Amu na limeyi linwi na ɔmmɔ kama ni, Yehosaƒat ɔ́vi ɔgbami úsie Ahab kudɔ na Samaria ɔma unengudi kesii kani na uli mmɔ. Na Ahab lɛnɔ ɔ́du baƒonu ku bebuo bamba na ɔ́di limeyi úte Yehosaƒat ku nwuna benengu bani na basiaku-nwu ƒui. Mmɔ na Ahab ɔ́tɛmi Yehosaƒat kɔtɛ ɔ́siku kalɛ na ɔɔyɔ́ ka ukpo Ramot ɔma na Gilead kalɔ kemmo.

³Ahab úye Yehosaƒat ɔnini, “Adubo ebebunku-mi na butékpoku Ramot-Gilead?” Amu na Yehosaƒat údie Israelƒuɔ ɔga kenye ɔnini, “Nse aani ƒula kalɛ na mina bekyuli badi ƒula bekyuli na bɔdubunyeku-ɔ na kekpo kammɔ kemmo.”

⁴Nsu Yehosaƒat ɔ́sɔ ɔ́su Israelƒuɔ ɔga ɔnini, “Mmomu, ka Unwoti kasusu bɔwia asa.”

⁵Ɔmmɔ ɔsu Israelƒuɔ ɔga ɔ́lɔ kenye bediene eti maane (400) ɔ́sala na úye-ma ɔnini, “Nteesie Ramot-Gilead na ntékpoku-ma munuu ntesie?” Amu na kenye bediene bammɔ básu-nwu banini, “Teesie! Ɔsika Unwoti ɔdubo-ma buti bɔkya awɔ ɔga enu kemmo.”

⁶Nsu Yehosaƒat úye Israelƒuɔ ɔga ɔnini, “Unwoti kenye udiene biala ɔ́sɔ uuubo mɛni na buye-nwu litemi lɛmɛni bunu?”

⁷Amu na Israelƒuɔ ɔga údie Yehosaƒat kenye ɔnini, “Kenye udiene unwi ɔdi úbu ɔni na bɔkana buye-nwu Unwoti kasusu bunu nsu muukisi-nwu. Ɔsika uledie kenye kabuni biala na mina lɛlɔ. Na kenye biala wasu mina lɛlɔ kaaadia. Na anwu baalɔ Imla ubidi Mikaia.” Amu na Yehosaƒat ɔ́su Israelƒuɔ ɔga ɔnini, “Útalɛka asu lɛni.”

⁸Ɔmmɔ ɔsu Israelƒuɔ ɔga ɔ́lɔ nwuna kabla ɔblane unwi na ɔ́su-nwu ɔnini, “Tiku Imla ubidi Mikaia boku mɛni ɔƒaani.”

⁹Na Israelƒuɔ ɔga ku Yudaƒuɔ Ɔga Yehosaƒat bakya bana baga ala na beli bana baga eboku lɛlɔ. Na beli Samaria ulu lɛlɔ na kesii kani baakɔ́ ɔlaaƒɔ. Na kenye bediene bammɔ ƒui béli-ma kudɔ baasú ala na bana anumi.

¹⁰Na Kenaana ubidi Sedekia úti lɛbuala na ɔ́bla bebuo ese anyɔ adi na ɔ́su ɔnini, “Lɛni na Unwoti ɔɔsu ɔnini, ‘Ése amɛni na adubuti akya Siriaƒuɔ ɔlɛ lɛlɔ útédu ka áyila-ma udu ƒui.’ ”

¹¹Na lɛni kani na kenye bediene bakladi ƒui lɛnɔ baasu banini, “Biteesie bitékpoku Ramot-Gilead na bɛdubɔdi-ma lɛlɔ, ɔsika Unwoti ɔdubuti-ma ɔkya ɔga enu kemmo.”

¹²Na ɔtalane ɔni bátála ka útéti Mikaia uboku mmɔ ɔɔsu Mikaia ɔnini, “Nu, awɔ lɛti pɛ ndi kenye udiene ɔni nébu. Na kenye bediene bakladi baasu lɛla lɛni ndia teete ɔga. Anwuɔsu, ya ƒula etemila ku bani ngye adi abla unwi. Na asu lɛla lɛni ndubɔyɔ ɔga kaƒɔ.”

¹³Nsu Mikaia údie kenye ɔnini, “Na Unwoti ɔni nli ngba lɛnyi kemmo ni, lɛla lɛni na mina Katɔti ɔ́su-mi kani ndubo bɔsu.”

¹⁴Uwi ɔni na Mikaia úbeduo ni, ɔga úye-nwu ɔnini, “Nsie ntékpoku Ramot-Gilead munuu ntesie?” Amu na Mikaia údie kenye ɔnini, “Teesie na etékpoku-ma, na adubɔdi lɛlɔ ɔsika badubo-ma buti bɔkya-a enu enu kemmo.”

¹⁵Mmɔ na ɔga ɔmmɔ úye Mikaia ɔnini, “Kɔlɛ na ɔlɛka lɛya-a na ese kenye ka alasu lɛla lɛdi eletulo lɛla lɛni ndi sɔsɔ geen litemi na Unwoti lɛnyi kemmo?”

¹⁶Mmɔ na Mikaia údie kenye ɔnini, “Lɛ́nu ka Israelƒuɔ ƒui bégyingya bewi abi eli aani baƒonu bani na beeebo lɛlɔ ɔnune. Na Unwoti ɔ́su ɔnini, ‘Bekyuli bamɛni beeebo ɔtɔnkune, anwuɔsu ɔdi biala unwini uteesie nwuna kaduli ku atu bɔyɔ.’ ”

¹⁷Amu na Israelƒuɔ ɔga ɔ́su Yehosaƒat ɔnini, “Ńtasu-ɔ ka ukyuli ɔmɛni ulásu lɛla lɛbuni na mina lɛlɔ ntu likpidi kani?”

¹⁸Amu na Mikaia úsie anumi ku nwuna kenye budie ɔnini, “Ɔmmɔ ɔsu binu Unwoti litemi. Lɛ́nu ka Unwoti úli nwuna liboku lɛlɔ na katɔ batu ƒui bénye-nwu kɔmii ku kɔdianu.

¹⁹Na Unwoti úye-ma ɔnini, ‘Ɔma ndubɔkana na ɔtɔlɔ Ahab na usie Ramot kesii kani na badubo-nwu bɔdu mmɔ?’ “Na bani nása bénye mmɔ bátɛmi básiku ɔmɛni lɛlɔ uwi klukwii ɔdi.

²⁰Kawɔlɔkɔ ni, kɔyu kunwi kɔ́lɛ kúbenye Unwoti anumi na ɔ́su-nwu ɔnini, ‘Ndubɔkana na ntátɔlɔ-nwu.’ “Mmɔ na Unwoti úye-ku ɔnini, ‘Dɛ na adubo bɔbla?’

²¹“Mmɔ na kɔyu kɔmmɔ kɔnini, ‘Ndubusie na liti ɔkɔ etemila lɛkya kenye bediene bammɔ ƒui kenye.’ “Amu na Unwoti ɔ́su-nwu ɔnini, ‘Adubɔkana-nwu bɔtɔlɔ sɔsɔ, anwuɔsu teesie na atábla lɛni.’

²²“Anwuɔsu ni, Ahab, lɛla lɛni na mɔɔsu mɛni geen nálɛku-ɔ lɛni kani pɛpɛɛpɛ. Unwoti ɔ́ya na ƒula kenye bediene bányi ɔkɔ bátɔlɔ-ɔ na ɔgyi lɛnɔ ka blii kani nébu na badubo-ɔ udu bɔyila ƒui kede kede.”

²³Ɔmmɔ kama Kenaana ubidi Sedekia úsie na útáƒiɛmi Mikaia lɛtukpo. Na úye-nwu ɔnini, “Ka Unwoti kɔyu kɔlɛ-mi kemmo ni, wɛ kakɛ na kɔ́vi kɔ́sia asa na kubetemiku-ɔ?”

²⁴Amu na Mikaia údie kenye ɔnini, “Limeyi lɛdi lɛdubo na adubo bɔnu ka ɔlɛka abɛla lɛlɔ na ɔtɔ ɔdi kama kesii kadi.”

²⁵Mmɔ na Ahab ɔ́va ku lɛdi momoomo ɔ́su ɔnini, “Biƒie Mikaia! Biti-nwu bisienku ɔga ubi Yosa ku Samaria aban ɔgadine Amon kudɔ.

²⁶Na asu-ma ka lɛni na ɔga ɔɔsu, ‘Biti okloƒu ɔmɛni bɛkya ɔtɔ. Na bitete-nwu lɛla biala na ɔdi, si ɔɔɔdi bodobodo ku ntu kani wetédu ka línwini ḿbeduo buɛɛ.’ ”

²⁷Amu na Mikaia údie kenye ɔnini, “Si énwini ébeduo buɛɛ ni, na agyi anii Unwoti útatɛmi útasiaku-mi lɛlɔ.” Amu na ɔ́su bekyuli bammɔ ɔnini, “Bise mina litemi lɛni lɛ́su mmɔ likpo!”

²⁸Ɔmmɔ kama ni, Ahab ku Yehosaƒat bɔtɔnku bana bekpone na báyu ulu bésie Ramot na Gilead kalɔ lɛlɔ.

²⁹Na asa na badubusie kekpokɔ kammɔ ni, Ahab ɔ́su Yehosaƒat ɔnini, “Yehosaƒat, ndubo lɛlɔ udu bɔvumana, nsu awɔ kya ƒula agala.” Anwuɔsu Ahaba ɔ́vumana lɛlɔ udu na ɔ́tɔlɔ úsie kekpokɔ.

³⁰Na uwi ɔmmɔ kani lɛlɔ ni, Siriaƒuɔ ɔga úubo nwuna bapɔnkɔ kɛɛkɛ batɔnkune ka Ahab lɛti kani na ɔdi ka bekpoku kaduɛ.

³¹Anwuɔsu ka bekpone bammɔ bánu Yehosaƒat na nwuna agala kemmo ni, bábu ka Ɔga Ahab ɔmmɔ na ɔdi mmɔ. Anwuɔsu bése kalɔ nka beteekpoku-nwu geen. Nsu Yehosaƒat ɔ́kpali Unwoti úvele-nwu kpakplaa na Unwoti lɛnɔ ɔ́ya na Siriaƒuɔ bekpone bammɔ báda báya.

³²Na ka bánu báti ka ɔɔɔdi Ahab na ɔdi mmɔ ɔsu ni, báda-nwu bukpoku báya na bágyu bátɔlɔ-nwu kudɔ na báda anwu lɛti bényene.

³³Na tabla tabla uwi ɔni na kekpo kammɔ kéti késela anumi ni, ukpone ɔdi úbo nwuna kataminta lɛtula lɛdi na lɛ́vi Ahab kekpo agyumanala anyɔ ani nda-nwu lɛlɔ mmɔ kuƒi blii kɔdi ntɛ na lɛ́tu-nwu, nsu ɔɔɔdi bɔsusu na ɔ́susu mmɔ asa na úbo lɛtula lɛmmɔ. Mmɔ kani na Ahab ɔ́va ɔ́kpali nwuna ɔpɔnkɔ kɛɛkɛ ɔkane ɔnini, “Babla na abada-mi edie likpo lɛmɛni, ɔsika ukpone ɔdi lɛtula lɛ́kɛ-mi!”

³⁴Kekpo kammɔ késie anumi limeyi limodi na bákada Ahab békpo nwuna kɛɛkɛ kemmo kalɛ na ɔkana na utaanu Siriaƒuɔ bekpone bammɔ teemene. Na úlie mmɔ laa útédu useyi uwi na uwi ɔni na ɔƒɛ utaanu kani na úkpi.