Read Lelemi Ala Alɛdi 2 19 Bible Online

Ala Alɛdi 2 19 - Lelemi bible

Ala Alɛdi 2 19

¹Amu na Yehosaƒat anwu ɔ́sɔ únwini úbeduo Yerusalem buɛɛ na nwuna ɔga kesii.

²Nsu Hanani ubidi ɔnanabi ɔni ndi Kenye Udiene Yuhu úbasiaku-nwu na ulu lɛlɔ na ɔ́su-nwu ɔnini, “Na kebunku kani na éte Ahab ɔlalane ɔmmɔ ɔsu ni, éti lɛlɔ énwini ukyuli ɔni muukisi Unwoti ɔkpana. Anwuɔsu Unwoti úti kɔnyi ɔ́kya-a!

³Nsu ɔɔɔdi ala ƒui nébie na ƒula lɛlɔ. Awɔ náƒɛ Asera baƒiɔ lɛƒiɔgyii lɛni na bálɛ na baakpá-ma na lise-ma kedee ƒui na ɔmmɔ lɛti ɔɔtina ka aayɔ́ ka ataadi Unwoti litemi lɛlɔ.”

⁴Yerusalem na Yehosaƒat ɔ́kya, nsu ɔɔyɔ́ busie taatávi nwuna lɛgakadikɔ kammɔ kemmo ɔ́si Beerseba na kalɔ kammɔ kada kakɛ útédu Eƒraim abi lɛlɔ kalɔ kammɔ kawɔkɔ na katɔ kakɛ. Na ɔɔtɛmiku bekyuli bammɔ teedie ala kalɔ teete-ma kalɛ na basɔ benwini bebo Unwoti kudɔ na batakpa-nwu kalɛ kani na ɔni na bana bati kuuku bákpa kalɛ.

⁵Na ɔmmɔ kama ɔ́ƒuna litemi batɛne úte kagyumakɔ lɛma linengudi lɛmmɔ ƒui na Yuda kalɔ kemmo

⁶na ɔ́su-ma ɔnini, “Bɛnu lɛlɔ kemmo kaduɛ si uwi ɔni na bɛɛlɛ bina etemila adi ugyii na bina litemi katɛkɔ. Ɔsika Unwoti kadi bekyuli na badi mɛni. Na lɛla biala na bɛ́lɛ ugyii ni, lɛdi lɛɛɛdubo-nwu bɔbɛ.

⁷Anwuɔsu bɛnu ka bɛ́bla bina kabla ƒui na bíti ɔbu bíte-nwu. Na bɛti lɛnɔ ka ɔɔɔdubo-mii kuƒi bute na bɛnu ukyuli ɔdi anumi bɛbla lɛla lɛdi iye bɛbɛ bɛƒɔ lɛla lɛdi bɛsiku ɔdi kudɔ bɛdi.”

⁸Yehosaƒat ɔ́ƒuna Lewiƒuɔ badi lɛnɔ ku bakpane ku lɛtɔ benengu badi ka benwini litemi batɛne bamɛni na Yerusalem.

⁹Na ɔ́su-ma ɔnini, “Bɛbla Unwoti kabla siin na bitalɛ-nwu kama!

¹⁰Yudaƒuɔ kadi bekyuli badubo etemila lidu lidu buti buboku-mii kudɔ banii bɛtɛ bite-ma ku bekyuli bɔdu etemila muedi. Ɔdi ka bɛtɛ etemila amɛni udu ƒui na bibo bekyuli bammɔ ɔda ka bada ekpidi bɔbla bɔƒiɔ Unwoti baya kalɛ na uleti kɔnyi ulakya Yudaƒuɔ ƒui na ɔni-ma kɔtu. Na binyimo ka si bɛ́siaku ala ani kalɔ na muudie teete-mii mɛni lɛlɔ ni, Unwoti ɔɔɔdubo-mii bɔƒiɔ bɔdi budie na uubo ka bani-mii kɔtu kɔdi.

¹¹“Na lɛla biala na lɛdanku bɔƒɔtaadi ulu ɔdi lɛlɔ ni, ɔkpane unengudi ɔni ndi Amaria ni, anwu kani ndubo bɔkana na ɔlɛ ugyii. Na Ismael ubidi ɔnanabi ɔni ndi Sebadia na ɔdi Yudaƒuɔ ɔtɔnkune ni, anwu ndubɔkana na ɔlɛ etemila bamba anya ugyii. Na Lewiƒuɔ bakladi badubo-ɔ kebunku buteete. Nye kpakplaa na ndubo Unwoti buteevele teete-ɔ kalɛ na ubunku-ɔ na akana na ataabla lɛbuni lɛmmɔ uwi biala.”