Read Lelemi Ala Alɛdi 2 2 Bible Online

Ala Alɛdi 2 2 - Lelemi bible

Ala Alɛdi 2 2

¹Salomo ɔ́lɛ ugyii ka ɔtu kakpakɔ kani na bataakpa Unwoti na ɔtu ɔga kesii lɛnɔ ute lɛlɔ.

²Na úte nkyuli mpim liti ku aavlanyɔ kabla ka beteeti atula teeboku katukɔ mmɔ. Na nkyuli mpim liti ku avlaatɛ bataanwi atabi na kɔbi lɛlɔ. Na nkyuli mpim ɛtɛ ku eti leevu-anyɔ bataanu kabla kammɔ lɛlɔ.

³Ɔmmɔ kama ni, Salomo ɔ́sia Hiram ɔni ndi Tiroƒuɔ ɔga kenye ɔnini, “Uwi ɔni na mina ɔti Dawid ɔɔtú nwuna ɔga kesii na akwa adi kama mɛni ni, awɔ na ɔ́ya na éboku-nwu ligyigba lɛbuni kpakplaa lɛni kabla na ɔ́bla. Adubɔsɔ akana na ete-mi lɛdi ɔƒɛni?

⁴Nnye mɔɔtú kakpakɔ lite Unwoti Katɔti kesii kani na bekyuli bataakpa-nwu. Na badubɔkyula oloƒui ƒɛƒɛɛ na mmɔ na beti bodobodo ɔni nse kedee lɛnɔ bete-nwu na mmɔ. Na bekyuli bani nébo babakpa-nwu badubuti bana akpala beboku-nwu na mmɔ ɔtanta biala ku useyi uwi biala ku Lɛnwunameyi biala ku kɔbuli biala limeyi lideedi lɛlɔ ku Katɔti emeyi buni aƒunadi biala bɔdi lɛlɔ. Na badubo ɔmɛni ƒui butaabla uwi ƒui aani kalɛ na Unwoti ɔda bubo bɔmmɔ bɔ́tina pɛpɛɛpɛ.

⁵“Na kakpakɔ kamɛni kadubɔbla kakpakɔ kenengudi geen, ɔsika bula Katɔti úbomo utulo baƒiɔ lidu ƒui.

⁶Ukyuli ɔdi ɔɔɔdubo bɔkana na ɔtu ɔtɔ bonwu ɔmmɔ udu ute Katɔti na ulie-nwu kemmo. Ɔ́si katɔ útédu katɔ kakaaka ƒui muedi kalakana-a bɔda. Na lɛla lɛni kani na mɔɔwia ka lɛbla ndi ka lɛtu kesii kani na buteeti bula akpala teete-nwu.

⁷“Anwuɔsu mene-mi ukyuli ɔni na ɔɔɔdi kanwi kani na ɔgyi mmomu ɔni mɔɔkana na ɔɔbla sika ugyiedi ku ɔƒualadi ku abuala egyiedi ku kalɔ kemmo abuala ku adi ani muukeye geen lɛnɔ lɛlɔ kabla. Na ukyuli ɔmmɔ ɔdubɔbla kabla na Yerusalem mɛni ku Yuda ubunku bekyuli bani na mina ɔti ɔ́ƒɔ ka babla kabla na kayu kenye bete-nwu.

⁸“Ngyi ka ebo kabla bablane bani na bagyi ligyii bukulo ku bɔbwɛ kabla kemmo kaduɛ geen na Lebanon. Anwuɔsu muuvele-ɔ nnii mene-mi ligyii kpakplaa lidu lidu lɛmmɔ. Na ndubuti mina kabla bablane limene na bebebunku-ma,

⁹ɔsika mɔɔwia ligyii geen asa na makana kakpakɔ bonwu kani mɔɔdia bɔnu na keekeye mɛni udu bɔtu.

¹⁰Na ƒula ligyii bekulone ni, ndubɔƒɔ-ma kakpa akyami mpim eti anyɔ ku aavlanyɔ-ɛlɔ ku atoti akyami ammɔ udu bɔkɔku kani ku ntɛ lɛsii ine bɔkɔku eti anyɔ ku leevu-ɛlɔ ku nnɔ lɛnɔ bɔkɔku bɔmmɔ lɛni kani.”

¹¹Amu na Hiram lɛnɔ ɔ́sɔku kenye ɔ́sia úmene Salomo ɔnini, “Ngyi ka Unwoti ubo bɔyɔ geen ute nwuna kadi bekyuli, ɔsika ɔ́ƒuna-a ka enwini bana ɔga.

¹²Bekyuli ƒui bemwi Israel Unwoti Katɔti ɔni nédie katɔ ku kalɔ! Úte Dawid ɔnanabi ɔni na ɔ́da anu na ɔɔsia ala anu taabla-nya uwi lɛlɔ. Na ɔɔɔdi ɔmmɔ lɛti mmomu kasusu kásɔ kebo-nwu ka ɔtu kakpakɔ ute Unwoti na ɔtu ɔga kesii lɛnɔ ute lɛlɔ.

¹³“Na líti Huram-Abi ɔni na anu ese-nwu nwaa mɛni muumene-ɔ.

¹⁴Uni ɔdi uleku ɔni na ɔ́si Israelni ɔni baalɔ Dan kɔdua kemmo na ɔti ɔ́si Tiro. Huram ɔmɛni ɔgyi sika ugyiedi ku ɔƒualadi ku abuala egyiedi ku kalɔ kemmo abuala kpakplaa ku atabi ƒui lɛlɔ kabla kaduɛ na ɔɔɔdi ɔmmɔ lɛti mmomu ɔgyi adi budulo ku egyii kama evuo adi kabla lɛnɔ kaduɛ. Na ɔɔnwí ala geen taasiaku udu biala na átina-nwu lɛlɔ. Na ɔdubɔkana na ubunku ƒula kabla bablane ku bekyuli bani na ƒula ɔti Ɔga Dawid ɔ́ƒɔ ka bababla kabla na kayu kenye mmɔ kaduɛ.

¹⁵“Anwuɔsu téti ƒula kakpa ku atoti ku nnɔ ku ntɛ bɔni na ése kenye ka adubuti aƒɔ mina kabla bablane kayu mene.

¹⁶Ndubo-ma bɔsu na bese kalɔ ku ligyii lɛmmɔ bukulo na Lebanon. Na bekyuli bumomo bɔni na aawia na beti basia ntu anumi lɛlɔ bemene-ɔ na Yopa na ƒula kabla bablane bala-ni basiku mmɔ besienku Yerusalem.”

¹⁷Salomo ɔ́ka baƒɔ bani ƒui nkya Israel kalɔ lɛlɔ aani kalɛ na ɔti Dawid ɔ́bla uwi ɔni na ɔdi ɔga na bana bumomo bɔdi nkyuli mpim eti atɛ ku ɛtɛ ku nkyuli eti leevu-anyɔ (153,600).

¹⁸Na úte nkyuli mpim liti ku aavlanyɔ (70,000) kabla ka beteeti atula teeboku katukɔ mmɔ. Na nkyuli mpim liti ku avlaatɛ (80,000) bataanwi atabi na kɔbi lɛlɔ. Na ɔ́ƒuna nkyuli mpim ɛtɛ ku eti leevu-anyɔ (3,600) kabataanu kabla kammɔ lɛlɔ na banu ka báwɔlɔ kabla kammɔ bɔbla lɛnɔ kaduɛ.