Read Lelemi Ala Alɛdi 2 20 Bible Online

Ala Alɛdi 2 20 - Lelemi bible

Ala Alɛdi 2 20

¹Na uwi ɔdi kama ni, Moab kadi bekyuli ku Amon kadi bekyuli básala lɛlɔ ku Meuniƒuɔ badi na báta bétékpo Yehosaƒat.

²Na batu bábasu Yehosaƒat banini, “Bekisine bekpone lisu bonwu lɛdi lɛ́si Edom abi lɛlɔ kalɔ kemmo na Ɛpugyie ɔmmɔ ɔƒɛ katukɔ kakɛ bébo na bébekpo bula kalɔ na béedu kesii kani na baalɔ En Gedi.”

³Amu na Yehosaƒat ɔ́kpali Unwoti na úvele-nwu ɔnii ɔtina-nwu lɛla lɛni na ɔlɛka ɔbla, ɔsika ɔ́yia geen.

⁴Anwuɔsu kɔnakunwi ni, báyu ulu bésie Yerusalem kesii kani na bétevele-nwu ka ubunku-ma.

⁵Amu na uwi ɔni na bekyuli bani na bási Yuda ku Yerusalem mmɔ bábasa na Unwoti kakpakɔ mmɔ báwɔlɔ ni, Yehosaƒat ɔ́ta únye kakpakɔ kaduli kawɔdi kammɔ anumi na bekyuli bammɔ ƒui anumi

⁶na ɔ́kpali Unwoti úvele ɔnini, “Awɔ Unwoti ndi Katɔti ɔni na bula bati kuuku bákpa. Na eli katɔ kakaaka mmɔ na aadi kayawi kamɛni kadi biala bekyuli lɛlɔ. Na ebo ɔyikun geen ɔni na ukyuli ɔdi biala ulakana-a lɛlɔ bɔdi.

⁷Bula Katɔti, awɔ nábɔku kadi bekyuli bani ƒui na nka beli mɛni kukuuku álɛku mɛni asa na ƒula kadi bekyuli bani ndi abu Israelƒuɔ búbelie mɛni. Na awɔ néti kalɔ kamɛni éte ƒula ɔkpana ɔni ndi Abraham bebi ku bawɔ ka kenwini bana kadikɔ uwi ƒui.

⁸Mɛni na bula bati kukuuku béli na bátu kakpakɔ béte-ɔ kalɛ na bataakpa-a teete-ɔ ɔbu.

⁹Na báƒɔ bádi ka uwi biala na kekpo iye ɔlɛ iye kɔka kúbo kalɔ kamɛni lɛlɔ ni, ƒula kadi bekyuli bamɛni bakana na beduo ƒula kakpakɔ kamɛni kemmo na bakpali-ɔ na adubudie-ma.

¹⁰“Aanu ka Amonƒuɔ ku Moabƒuɔ ku Edomƒuɔ bekpone benye beekpó-bu! Badi kɔlɔ kɔni bekyuli na nka awɔ Unwoti átatuna ka bula kadi bekyuli bekpo-ma uwi ɔni na bɔkɛ ulu bɔ́si Egyipte bɔdubo, anwuɔsu na bátayii udu.

¹¹Nsu ɔƒaani ni, aanu-ma nási badubo bebeƒie kalɔ kani na éte-bu baƒɔ-bu kudɔ benwini ama kadi.

¹²Aaadubo-ma kɔtu bɔni? Buuubo kenyekɔ kadi na bekpone bamɛni udu anumi si banii beekpó-bu sɔsɔ. Bɔɔɔgyi lɛla lɛni na bɔbla, anwuɔsu kebunku kani na buuvele.”

¹³Amu na uwi ɔni na Yudaƒuɔ banana ku beleku ku banamu bammɔ ƒui benye kakpakɔ anumi mmɔ ni,

¹⁴Unwoti Kɔyu kútemiku Yahasiel ɔni ndi Lewini na ɔ́si Asaƒ kɔdua kemmo kɔnakunwi.

¹⁵Mmɔ na Yahasiel ɔ́su ɔnini, “Ɔga Ɔbune ku ukyuli biala na ɔ́si Yuda ku Yerusalem, Unwoti ɔnii utalɛka bina ɔdi ɔyia iye bekpone bayikune bamɛni ɔbladu ɔdi ɔda-mii ɔƒɛ na enu aƒɛ-mii. Katɔti ɔdubo kekpo kammɔ bukpo bute-mii!

¹⁶Anwuɔsu binu lɛla lɛni na ɔlɛka bɛbla. Kɔnaadi ni, bekisine bekpone bammɔ badubo lɛlɔ bɔsiaku na babwɛ bavi kalɔ kakwiidi kani náka kámana Yeruel ɔma mmɔ. Amii lɛnɔ bisie na bitásiaku-ma na Sis ɔma kemmo si uwi ɔni na béti bákɔ baalɛ́ kɔwɛ kɔmmɔ kemmo.

¹⁷Amii bitasu bɛnii biikpó-ma munu munu. Mmomu bɛwia kunyekɔ na binye bitaanu kalɛ na Unwoti ɔdubo-mii budie bɔlɛku-ma enu kemmo. Bitayia. Amii bɛbla bɛsiaku lɛla lɛni na bínu lɛlɔ. Na uwi ɔni na bɛdubo busie buteesie mmɔ kɔnaadi ƒui ni, Unwoti anwu ɔdubo bɔgyu bɔtɔ uténye mmɔ kukuuku.”

¹⁸Amu na Yehosaƒat úboku lɛlɔ kalɔ buɛɛ na ɔ́kya lili kalɔ úte Unwoti na bakladi ƒui lɛnɔ bábla lɛni kani.

¹⁹Ɔmmɔ kama ni, Lewiƒuɔ badi na bási Kohat ku Kora adua kemmo báta bénye na bédie bumwi lɛnu béte Unwoti Israel Katɔti.

²⁰Amu na kadi kegye ɔtanta tutuutu uwi ɔni na ukyuli biala ɔdaku lɛlɔ bɔklibi ka bayu ulu beteesie kakɔ kakwiidi kani nde Tekoa mmɔ ni, Yehosaƒat ɔ́ta únye na ɔ́su ɔnini, “Banwa, binu! Si bula ƒui búti bula kɔyi bɔ́sia Unwoti lɛlɔ na bɔ́ƒɔ lɛla lɛni na kenye bediene básu-bu mmɔ bɔ́di ni, Unwoti ɔdubo-bu bubunku na bɔdi lɛlɔ.”

²¹Mmɔ na údie ulu ɔni lɛlɔ na badubo bɔsia busie mmɔ ɔ́tina-ma. Na ɔ́ƒuna bekyuli badi batɔ bakladi ƒui anumi na baatu lɛnu teemwi Unwoti taasu kalɛ na nwuna ɔyikun ɔni na ubo use kedee taasu banini, “Bɛgya Unwoti enu, ɔsika ɔdia na ɔɔyɔ́-bu uwi ndi uwi.”

²²Na ɔni kani na bése kalɔ beedie bumwi lɛnu lɛmɛni kani na Unwoti ɔ́ya na bekisine bammɔ bábla gyugyuugyu na bana kɔkyakɔ.

²³Anwuɔsu Amonƒuɔ ku Moabƒuɔ básala lɛlɔ na békpo Edomƒuɔ na bádu-ma ƒui. Na ɔmmɔ kama bana akpa anyɔ lɛnɔ bénwini bálɛku lɛlɔ na békpoku lɛlɔ na bádu lɛlɔ béwi bana kakyakɔ bewi kalɔ kede kede na asɔ alanu ukyuli ɔdi na bana nvo bɔmmɔ kemmo!

²⁴Amu na uwi ɔni na Yudaƒuɔ bédu ɔma kagyumanakɔ kani na si enye na aanu kalɔ kakwiidi kammɔ teemene ni, bánu ka bekisine bekpone bammɔ ƒui ɔdi biala ukpi ɔtɛ kalɔ na bana nvo bɔmmɔ kemmo.

²⁵Anwuɔsu Yehosaƒat ku nwuna bekpone béduo bésie bekisine bammɔ nvo kemmo mmɔ na bátála bana ala ani náƒɔ kuye na ana lɛlɔ ebo kɔsia ƒui bátɔlɔku. Na ala ani na bánu mmɔ adi ndi ɔmantɛ bebuo ku adi ku kabla lidu lɛlɔ kabla ablala ku ala abuni bamba pii lɛnɔ. Na emeyi atɛ na béti bála ala ammɔ na adi muedi ásɔ ébu ewi.

²⁶Amu na limeyi linedi lɛlɔ ni, ukyuli biala ɔ́lɛ úbo na bábasa na kɔwɛ kɔni na baalɔ banii Baraka Kɔwɛ kemmo. Na mmɔ na bédie lɛnu bémwi Unwoti. Na ɔmmɔ ɔsu na baalɔ mmɔ banii Bumwi Kɔwɛ.

²⁷Yehosaƒat ɔ́sɔ ɔ́tɔnku bekyuli bammɔ na bénwini bésie Yerusalem. Na bakɛ baagyá lɛbentaa na baavwi kɔkpɛɛ. Na lɛlɔ lɛ́yɔ-ma geen, ɔsika Unwoti ɔ́ya na bádi bana bekisine lɛlɔ. Na ka bébeduo ɔma kemmo ni, bávi bésie kakpakɔ kɔnakunwi.

²⁹Amu ka kadi bamba bekyuli bani na beli bede mmɔ bénu kalɛ na Unwoti úkpo Yuda bekisine úte-ma ni, liƒu bonwu líƒie-ma na báyia geen

³⁰kalɛ na ɔdi ɔsɔ ɔta ɔnii utékpo Yuda. Na Unwoti ɔ́ya na Yehosaƒat lɛgakadikɔ kákɛ keyi buɛɛ ku atu bɔyɔ.

³¹Akwa avlaatɛ-alɔ na Yehosaƒat ɔ́ƒɔ asa na únwini Yudaƒuɔ ɔga. Na úlie Yerusalem mmɔ ɔ́di lɛga akwa aavlanyɔ-alɔ. Na uni baalɔ Asuba na unieku baalɔ Silhi.

³²Yehosaƒat ɔ́di Unwoti litemi lɛlɔ aani kalɛ na ɔti ɔni baalɔ Asa lɛnɔ ɔ́bla.

³³Nsu anwu Yehosaƒat útabwɛ baƒiɔ bani na bekyuli bávɔ bése abi lɛlɔ bátaakpa mmɔ. Anwuɔsu bekyuli básiaku lɛƒiɔkpa ala bɔbla kama na ɔni na basiaku Unwoti kama siin aani kalɛ na bana bati kuuku bábla kalɛ.

³⁴Na lɛla biala na Yehosaƒat ɔ́bla uwi ɔni na ɔ́di lɛga ni, bénweni-mi bákya Yehu ɔni ndi Hanani ubidi ɔnanabi ala alɛdi Israel baga ablala ɔku kemmo.

³⁵Uwi ɔni na Yehosaƒat ɔ́di lɛga ni, anwu ku Israel ɔga ɔlalane ɔni baalɔ Ahasia bényimi unwi bɔbla lɛla lɛdi bése.

³⁶Na bénu kalɔ lɛnɔ ka banwi lɛkɔlɔ libendi lɛni ndubo ntu anumi buteesie ntu anumi.

³⁷Nsu Kenye Udiene Elieser ɔ́lɛ Yehosaƒat kpakplaa ɔnini, “Unwoti ɔdubo lɛkɔkɔ lɛmɛni udu bɔyila, ɔsika ébunku Ahasia.” Na sɔsɔ ni, lɛkɔlɔ lɛmɛni lɛ́bwɛ na lítasia ntu anumi lítabla kabla kadi.