Read Lelemi Ala Alɛdi 2 21 Bible Online

Ala Alɛdi 2 21 - Lelemi bible

Ala Alɛdi 2 21

¹Yehosaƒat úbekpi na báva-nwu na kesii kani na nwuna bati kuuku bátɛ na Yerusalem na ubidi ɔnanabi ɔni baalɔ Yehoram ubenwini ɔga.

²Bebi maatɛ na Ɔga Yehosaƒat ɔ́wɔ. Na ama ndi Yehoram ku Asaria ku Yehiel ku Sekaria ku Asariahu ku Mikael ku Seƒatia.

³Yehosaƒat úte bana ɔdi biala sika ɔƒualadi ku ugyiedi ku ala bamba ani náƒɔ kuye geen. Na ɔmmɔ kama ɔ́ya na bénwini lɛlɔ badine na kɔgyumanakɔ lɛma linengudi lɛmmɔ kemmo na Yuda kalɔ lɛlɔ. Nsu ubidi udeedi anwu ni, ɔ́ƒuna-nwu ka unwini ɔga na nwuna kenye.

⁴Uwi ɔni na Yehoram ɔ́nu ka nwuna ɔyikun ɔ́di Yuda ƒui lɛlɔ ɔ́wɔlɔ ni, ɔ́ya na bádu nwuna banwani bakladi ƒui ku Yuda kadi batɔnkune badi.

⁵Akwa avlaatɛ-anyɔ na Yehoram ɔ́ƒɔ asa na únwini ɔga. Na akwa maane na úli Yerusalem ɔ́di lɛga.

⁶Na uwi ɔmmɔ ni, Yehoram úti Ahab ubidi ulekubi na ɔ́siaku Ahab ku nwuna kaduli bekyuli ɔbladu ukpidi ku Israel baga bamba udunkpi ala bɔbla kama. Na úni Unwoti litemi bunu na ɔɔƒiɔ́-nwu mmomu.

⁷Nsu ka Unwoti úse kenye ka Dawid bebi ku bawɔ akɔ na ukyuli ɔdubɔsi uwi biala na ɔdi lɛga na Yuda ɔsu ni, útayila Dawidi ɔtɔ kemmo bebi ku bɔwɔ udu.

⁸Amu na uwi ɔni na Yehoram ɔɔdi lɛga mmɔ ni, Edom abi lɛlɔ kalɔ bekyuli báta bénye-nwu lɛlɔ na báƒuna bana ɔga.

⁹Anwuɔsu Yehoram ku nwuna bakutine ku bapɔnkɔ beliene báta bésie Edom. Na mmɔ ni, Edom bekpone bábaka-ma bákya na anwu úkeli ku usien.

¹⁰Nsu ɔ́bla bi ɔ́bla dɛ ni, Yuda ɔ́sɔ útakana Edomƒuɔ lɛlɔ bɔdi. Na Libna ɔma bekyuli muedi báta bénye Yehoram lɛlɔ uwi ɔmmɔ. Na ala amɛni ƒui álɛ lɛni, ɔsika Yehoram únwini kama ɔ́kya Unwoti ɔni ndi nwuna bati kuuku Katɔti.

¹¹Yehoram ɔ́tu baƒiɔ ɔ́lɛ abi eli na bekyuli béteesie taatákpa na ɔ́ya na bekyuli báƒiɔ Unwoti.

¹²Amu na limeyi linwi lɛdi ni, Kenye Udiene Elia únweni ɔku ɔdi úte Yehoram na ɔdanku kenye kadi ɔnini, “Lɛ́ƒɔ linyesia lɛdi lɛ́siku Unwoti Katɔti ɔni na bula ɔti kuuku Dawid ɔ́kpa líboku-ɔ. Na kenye kammɔ ndi ka Unwoti ɔnii ɔgyi ka átasiaku ƒ'ɔti Yehosaƒat ɔbladu kama iye Nana Asa ɔbladu kama.

¹³Mmomu elie ngba aani Israel baga bekpidi bammɔ kalɛ na ákya Yuda kadi bekyuli ka bada Unwoti bɔkpa baya kalɛ kani na Ahab ku nwuna ɔtɔ kemmo bekyuli bábla kalɛ. Na awɔ ɔlati ƒula banwani bani na nka badia betulo-ɔ ƒui muedi ádu-ma.

¹⁴“Na alaekpidi bonwu ani na ábla mɛni ɔsu ni, Unwoti ɔdubo ƒula lɛgakadikɔ bekyuli ku ƒula ɔtɔ kemmo bekyuli kɔtu bɔni geen na ubile ala ani ƒui na ebo na ayii udu kede kede.

¹⁵Na kaƒɔ ɔlɛ kpakplaa ɔdi ɔdubo-ɔ bubo na ɔlɛ ɔmmɔ na adubo buƒi ebo abi laa na eti ekpi.”

¹⁶Na ɔmmɔ kama ni, Unwoti ɔ́ya na Ƒilistiƒuɔ ku Arabiaƒuɔ bani na beli bede Kus mmɔ béti kɔnyi bákya Yehoram.

¹⁷Kadi kamɛni bekyuli bébo bébekpo Yuda na béyu-ma agala ƒui bátɔlɔku básiku ɔga kesii mmɔ. Na béƒie Yehoram ulekudi ku bebi ƒui bátɔlɔku aani batɔntɛne kalɛ. Na ubi unwi ɔni kani nébu ndi ɔnamudi ƒui ɔni baalɔ Ahasia.

¹⁸Amu ka ala amɛni álɛ lɛni áwɔlɔ ni, Unwoti ɔ́ya na kaƒɔ ɔ́lɛ ɔdi úbo Yehoram ɔni na ukyuli biala ulakana bɔbwi.

¹⁹Na ɔbla akwa anyɔ kama ni, Yehoram úbekpi na únu ɔlɛ geen. Na bátakyula likpose livongu lɛdi bétete-nwu ka úkpi ina ka lɛni na bekyuli bammɔ bábla béte nwuna bati kuuku.

²⁰Akwa avlaatɛ-anyɔ na Yehoram ɔ́ƒɔ asa na únwini ɔga. Na úlie Yerusalem mmɔ ɔ́di lɛga akwa maane. Na ukyuli ɔdi útewulo kɔnyana ka úkpi asa na badubuti-nwu batáva na Yerusalem, nsu ɔɔɔdi kesii kani na baavá baga.