Read Lelemi Ala Alɛdi 2 22 Bible Online

Ala Alɛdi 2 22 - Lelemi bible

Ala Alɛdi 2 22

¹Uwi ɔni na Arabiaƒuɔ báagyu bátɔ bébekpo Yuda asa na Ahasia ɔdubunwini ɔga ni, bádu nwuna banwani bananabi bana ƒui na Ahasia ɔmɛni kani nébu. Anwuɔsu na Yerusalemƒuɔ bése-nwu lɛga ka utaadi-ma lɛlɔ.

²Akwa aavlanyɔ-anyɔ na ɔ́ƒɔ asa na únwini ɔga. Na lɛkwa linwi kani na ulie Yerusalem ɔ́di lɛga. Ahasia uni baalɔ Atalia na ɔdi Israelƒuɔ ɔga ɔni baalɔ banii Omri uwɔ.

³Na anwu nébile ubidi ɔnanabi atu ɔnii ɔbla likpidi ɔƒiɔ Unwoti. Na ɔ́siaku Ɔga Ahab ku nwuna bebi ku bawɔ udu ukpidi kama.

⁴Geen na ɔti kukpi kama ni, Ahasia ɔ́bla likpidi ɔ́ƒiɔ Unwoti na uwi ɔni na útáƒuna Ahab lɛlɔ bekyuli ka benwini-nwu kasusu bakyane. Na ɔkɛnku kasusu kani na baakya-nwu ɔsu na úbo kalɔ.

⁵Bana litemi na únu ɔsu na úsie útásiaku Israel Ɔga Yoram na bétékpo Ɔga Hasael ku Siriaƒuɔ bekpone na Ramot ɔma kemmo na Gilead kalɔ lɛlɔ. Kekpo kammɔ kemmo na Ɔga Yoram ɔ́ƒɔ ɔlɛ kaduɛ

⁶na ɔ́tɔlɔ úsie Yesreel ɔma utábwi lɛlɔ. Na Ahasia úsie mmɔ kama kama útánu-nwu.

⁷Na Ahasia mmɔ busie butánu Yoram kemmo na Katɔti ɔ́ya na úkpi. Amu na uwi na Ahasia útéduo Yesreel mmɔ ni, anwu ku Yoram bésie bátása ku Yehu ɔni ndi Nimsi uwɔ. Na uwi ɔmmɔ lɛlɔ ni, Unwoti ɔ́ɔsu Yehu ɔnii ɔdu ɔnanabi biala na Ahab ɔtɔ kemmo.

⁸Na uwi ɔni na Yehu ɔdaku ɔmɛni bɔbla ni, ɔ́nu ka Yudaƒuɔ batɔnkune badi ku Ahasia ɔnwani bebi bananabi badi bani na ama ku Ahasia nébo ɔma mmɔ bébo mmɔ. Na mmɔ mmɔ kani na Yehu ɔ́du-ma

⁹na ɔ́kya batu ɔnii batáwia Ahasia ɔmmɔ ɔlati beboku. Na Yehu batu bamɛni bátánu-nwu ka ɔ́bɛ ɔkya Samaria. Mmɔ na bákpanku Ahasia béboku Yehu na ɔ́du anwu lɛnɔ kɔnakunwi. Na ka baabu Yehosaƒat ɔsu ni, báva Ahasia ukyuli bɔva, ɔsika nwuna nana ndi Yehosaƒat ɔmɛni na anwu ɔ́sia ulu biala lɛlɔ ka ɔdi Unwoti litemi lɛlɔ. Na ɔmmɔ kama ni, ukyuli ɔdi ɔsɔ uuubo na Ahasia kaduli na bese-nwu Yudaƒuɔ lɛga.

¹⁰Amu na uwi ɔni kani na Atalia únu ka bádu ubidi ɔnanabi Ahasia ni, ɔ́bla kasusu ka ɔdu Ahasia lɛlɔ bekyuli bani ndi bagadine mmɔ ɔdi biala. Na ɔ́ɔkɛ kuƒi kɔmmɔ lɛnɔ,

¹¹nsu Yehoseba ɔni ndi Yehoram ubidi ulekubi na ɔdi Ahasia ɔtibi údie Yoas na ɔgbankpi ɔmɛni kemmo uwi ɔni kani lɛlɔ na nka báasala nwuna banwani bakladi na badubo-ma bɔdu. Yehoseba ɔmɛni ulieku ɔkpane ɔni baalɔ Yehoiada. Anwuɔsu ɔ́kana na útiku Ahasia ubidi ɔnanabi ɔnamu blii ɔni ndi Yoas ɔmɛni ku nwuna kabla ɔblane lɛlɔ ɔnune útábɛla ɔtɔ ɔtɛdi ɔdi kemmo na kakpakɔ mmɔ na úkeli Atalia kasusu kekpidi kani na ɔdanku mɛni.

¹²Yoas ɔ́bɛ ɔ́kya kakpakɔ mɛni akwa aku uwi ɔni na Atalia ɔɔdi Yuda lɛlɔ aani uleku ɔga.