Read Lelemi Ala Alɛdi 2 23 Bible Online

Ala Alɛdi 2 23 - Lelemi bible

Ala Alɛdi 2 23

¹Amu na uwi ɔni na Ahasia ubidi ɔnanabi Yoas ɔ́bɛla lɛlɔ na kakpakɔ kemmo mmɔ akwa aku kama ni, Yehoiada ɔni ndi ɔkpane mmɔ ɔ́nu ɔti ka ɔlɛka babla lɛla lɛdi. Anwuɔsu ɔ́sia ulu biala lɛlɔ na ɔ́nu ka bekpone benengu bammɔ ketulodikɔ benye-nwu kama. Na bana badi ndi Yehoram ubidi ɔnanabi ɔni baalɔ Asaria ku Yehonan ubidi ɔnanabi ɔni baalɔ Ismael ku Obed ubidi ɔnanabi ɔni baalɔ Asaria ku Adaia ubidi ɔnanabi ɔni baalɔ Maaseia ku Sikri ubidi ɔnanabi ɔni baalɔ Elisaƒat.

²Nkyuli ɛlɔ bamɛni bésie Yuda lɛma kemmo na bátálɔ Lewiƒuɔ ku adua benengu bammɔ na bébo Yerusalem.

³Na bábasala na kakpakɔ kesii kani na bénu kalɔ ka bebunku Yoas. Mmɔ na Yehoiada ɔ́su ɔnini, “Yoas ndubo bula Yudaƒuɔ ɔga bunwini. Ɔsika ɔ́si kukuuku ni, Unwoti ɔ́su úse ka Dawid ɔtɔ kemmo ubi na ɔga ɔdubɔsi ɔdi Yudaƒuɔ ɔga na uwi bilala kemmo.

⁴Na ndubo-mii bɔtina lɛla lɛni na ɔdi bɔbla. Bakpane kasala esu atɛ ku Lewiƒuɔ badi badubunye kagyumana na Lɛnwunameyi lɛlɔ. Na lisu linwi lɛdubo kakpakɔ ɔban kenye butaagyumana.

⁵Na lisu linwi litaagyumana ɔga kesii. Na lisu lɛkladi litaagyumana kakpakɔ ɔka ɔmmɔ ɔban ɔmmɔ kayakun. Na amii bekyuli bakladi ƒui binye kagyumana na kakpakɔ kɔduli kɔmmɔ kemmo.

⁶Na bakpane ku Lewiƒuɔ bani mbo kabla limeyi lɛmmɔ lɛlɔ kani ndubɔkana na beduo kakpakɔ kammɔ kemmo. Ɔsika ama kani nábla lɛlɔ bɔbla sɛɛn ɔdi ɔni na baaka bɔbla asa na akana kakpakɔ kemmo buduo. Na ɔlɛka bakladi basɔ benye kakpakɔ kɔduli kɔmmɔ kemmo kalɛ kani na Unwoti ɔda bubo bɔɔtina kalɛ.

⁷Na amii Lewiƒuɔ ni, ɔlɛka bɛgyumana Ɔga Yoas. Na bina anumi atatimi-nwu lɛlɔ! Na binye kagyumana ku bina kuwii na bɛdu ukyuli bamba biala mebo kakpakɔ kammɔ kemmo.”

⁸Amu na Lewiƒuɔ ku bakpane bammɔ ƒui básiaku Yehoiada ulu ɔni na ɔ́tina ka babla ala basiaku mmɔ lɛlɔ. Na bagyumane bani na bana kabla káwɔlɔ muedi beeebo kuƒi ka batɔlɔ besie kɔduli. Anwuɔsu ɔtɔnkune biala ku nwuna kabla bablane bani náwɔlɔ kabla ku bɔwɔdi bani ndubo kabla kalɔ buse ƒui benye mmɔ bese.

⁹Na Yehoiada úduo kakpakɔ na útédie kuwi ku kekpo agyumanala ani na ndi Dawid adi mmɔ ɔ́lɛku keyi na úle-nya úte batɔnkune bammɔ ƒui.

¹⁰Ama lɛnɔ béle-nya béte bagyumane bammɔ na Yehoiada ɔ́nu ka ɔdi biala unye kagyumana na kesii kani na ɔ́tina ka benye bamana kakpakɔ kammɔ ku lɛkpabi lɛmmɔ kudɔ ƒui kalɛ na bagyumana ɔga ɔmmɔ na lɛƒɛnyi ƒui lɛlɔ.

¹¹Amu na ɔmmɔ kama ni, Yehoiada úsie útákpanku Yoas ɔ́lɛku úboku kesii kani na béti kagabwa bébi-nwu lili na úti kakunkɛ kani mɔɔtina ɔga kalɛ na ɔdi nwuna kadi bekyuli lɛlɔ bákya-nwu kɔnu. Na béwi-nwu lɛga buse nnomii lili béti bátina ka bése-nwu lɛga sɔsɔ. Mmɔ na kasalakɔ bekyuli bammɔ béte yiiduu ku kɔvanu básu banini, “Ɔga ulie ngba gyɔlɔɔ!”

¹²Amu ka beleku Ɔga Atalia únu ka bekyuli bammɔ béte yiiduu ku kɔvanu lɛni ni, ɔ́ta kɔnakunwi úsie kakpakɔ mmɔ.

¹³Na mmɔ na útánu ka Yoas unye lɛkpa lɛdi na lide kayakun kammɔ kudɔ kesii kani na kadi baga kenyekɔ mmɔ. Na bagyumanane batɔnkune ku kɔkpɛɛ bavwine benye-nwu kudɔ. Na bagyane ku lɛnu bediene batɔnku bekyuli bammɔ na baakɛ́ lɛlɔyɔ teedie lɛnu ku ebiti. Mmɔ na Atalia ɔ́ni nwuna lɛwu ɔ́bwɛ na kɔnyi kemmo na ɔ́va ɔ́su ɔnini, “Amii mina bekisine bɛ́lɛ-mi kama na bɛ́kya-mi kakya!”

¹⁴Amu na Yehoiada údie lɛdi kɔnakunwi ɔ́su bagyumanane batɔnkune bɔmmɔ ɔnini, “Bitadu-nwu na Unwoti kakpakɔ kudɔ mmɔ. Bɛgyunku-nwu bɛlɛku bekpone bammɔ anumi na bɛnu ka bɛ́du nwuna kama basiakune lɛnɔ ƒui!”

¹⁵Na ɔ́wia ulu ka nka ukeli, nsu batɔnkune bammɔ béƒie-nwu na bádu-nwu na ɔban kenye kesii kani na beeti bapɔnkɔ taasiaku teeduoku ɔga kesii mmɔ.

¹⁶Amu na Yehoiada úvele Ɔga Yoas ku bekyuli bakladi bammɔ ƒui ka bablaku-nwu unwi na basiaku Unwoti kama siin na basɔ balálɛ-nwu kama. Na bana ƒui bénu kalɔ

¹⁷na bakɛ-nwu lisu kɔnakunwi békeli bésie bétébo Baal kakpakɔ ɔƒiɔtɔ bábwɛ béwi kalɔ. Na bábwɛ nwuna akpabi ammɔ ƒui ku ala ani na bávɔ bényene na bádu Baal ɔmmɔ ɔkpane ɔni baalɔ Matan na akpabi ammɔ anumi.

¹⁸Amu na Yehoiada úle kabla úte bakpane ku Lewiƒuɔ bammɔ na kakpakɔ kemmo mmɔ kalɛ kani na Dawid ɔ́bla. Na mɔɔnu akpala bɔbla teete Unwoti ti kabla lɛlɔ aani kalɛ na Mose ɔda bubo bɔɔtina. Na ama kani na ɔlɛka batɔnku bɔkpa bɔmmɔ ablala ƒui ku lɛnɔ budie.

¹⁹Na úbo bagyumanane bani nnye ɔban kɔyakun kɔmmɔ ƒui kenye ka babɔku ukyuli biala na neeese sɛɛn ka uduo kakpakɔ kammɔ batɔlɔku.

²⁰Kawɔlɔkɔ ni, Yehoiada ɔ́lɔ bagyumanane batɔnkune bammɔ ku Yuda kadi benengu belidi belidi ku bakutine bammɔ ɔ́sala ku aban bagadine benengu bammɔ. Na bekyuli lisu lɛkladi lɛmmɔ basiaku-ma kama uwi ɔni na bákpanku Ɔga Yoas básiaku kakpakɔ kammɔ kemmo na bátávi ɔban kayakun katɔdi kemmo bétéduoku ɔga kesii. Na mmɔ na útélie kalɔ na nwuna kesii aani Yudaƒuɔ ɔga.

²¹Na ukyuli ɔ́tɔ ku ebiti, ɔsika bádu beleku Ɔga Atalia na keyii buɛɛ kásɔ kébo Yerusalem ɔƒaamu.