Read Lelemi Ala Alɛdi 2 24 Bible Online

Ala Alɛdi 2 24 - Lelemi bible

Ala Alɛdi 2 24

¹Akwa maatɛ kani na Yoas ɔ́ƒɔ asa na únwini Yudaƒuɔ ɔga. Na úlie Yerusalem ɔ́di lɛga lɛmmɔ akwa aavlene. Na uni ɔni baalɔ Sibia ni, ɔ́si Beerseba.

²Na uwi ɔni na ɔkpane unengudi Yehoiada uli ngba ƒui ni, na Yoas útaayia Unwoti na útaadi nwuna litemi lɛlɔ na ɔɔbla ala ani na ese siin.

³Na Yehoiada ɔ́wia beleku inyɔ muedi úte-nwu ɔnii uti-ma kalɛ na udie kaba.

⁴Amu na uwi ɔdi kama ni, Yoas ɔ́bla kasusu ka uwi údu ka básɔku kakpakɔ kammɔ baklibi.

⁵Anwuɔsu ɔ́lɔ bakpane ku Lewiƒuɔ bammɔ ɔ́sala na ɔ́su-ma ɔnini, “Biteesie Yuda kalɔ kesi kesii na bitáƒɔ lɛkwa kuyii bɛsiku bekyuli bammɔ kudɔ biboku. Na mɔɔwia ka bɛbla ɔmmɔ ɔƒɛni kani ɔni na uwi bubile buuubo, ɔsika ɔlɛka bɔsɔku kakpakɔ kammɔ bɔklibi.” Nsu ɔmmɔ ƒui kama ni, Lewiƒuɔ bammɔ bátababla na babla lɛla lɛni na ɔga ɔ́su-ma

⁶Ɔkɛnku ɔmmɔ ɔsu na ɔga ɔmmɔ ɔ́ya na bátálɔ Yehoiada béboku na úye-nwu ɔnini, “Bi ɔsu na átatala Lewiƒuɔ bammɔ na besie batáƒɔ lɛkwa kuyii kɔmmɔ beboku? Unwoti kabla ɔblane Mose ku bekyuli bammɔ ƒui bénu kalɔ ɔ́si kukuuku ƒui ka beteete kuyi kɔmɛni na beti-ku bataanu Katɔti kevo kammɔ lɛlɔ.

⁷Na ɔƒaani ni, bɔɔwia egulabi ammɔ kpakplaa na buti bɔklibi kakpakɔ kammɔ, ɔsika Atalia uleku ukpidi ɔmmɔ bebi bananabi bébeduo mɛni na bebile ala geen na mmɔ. Na béti ala ani na ese kedee muedi bátɔlɔku bésie baakpá Baal baƒiɔ.”

⁸Ɔmmɔ kama ni, Yoas údie lɛdi úte nwuna kabla bablane ɔnii banwi ugyii adaka ɔdi bese keyi bedenku kakpakɔ kammɔ ɔban kayakun.

⁹Na únweni ɔku úmene Yuda kalɔ kesi kesii ɔnii ukyuli biala ubo ubaƒɔ nwuna kuyi na kakpakɔ mmɔ kalɛ kani na Mose úbo bana bati kuuku ɔda ɔnii bataabala.

¹⁰Amu na bekyuli bammɔ ku bana batɔnkune ƒui bénu kalɔ na béti bana kuyi béboku Yerusalem bábakya adaka ɔmmɔ kemmo.

¹¹Na limeyi ndi limeyi ni, Lewiƒuɔ bammɔ beeti adaka ɔmmɔ teeduoku kakpakɔ ɔtɔ kemmo na bewilimi egulabi ammɔ bewi ɔga ɔmmɔ ɔku unwenine ku ɔkpane ɔmmɔ ubunkune anumi na baka-nwu na basɔku adaka ɔmmɔ betése keyi na kesii kani na beesé-nwu mmɔ. Lɛni na bátaabla limeyi ndi limeyi na uwi útetu asa na bákɛ egulabi pii.

¹²Na Yoas ku Yehoiada béti egulabi ammɔ béte bekyuli bani mɔɔnu kakpakɔ kammɔ bɔklibi ala lɛlɔ na béti báwia atabi banwine ku ligyii banwine ku abuala kpakplaa ku abuala egyiedi lɛlɔ kabla bablane babuni geen.

¹³Amu na bése kakpakɔ kammɔ bɔklibi kalɔ na uwi ɔni na báwɔlɔ ni, kakpakɔ kammɔ kábla aani si kawɔdi na básɔku bátu.

¹⁴Na ɔɔɔdi egulabi ammɔ ƒui na béti bábla kabla kammɔ, anwuɔsu egulabi ani nébu ni, béti-nya béte Yoas ku Yehoiada na ama lɛnɔ béti béte na bábla kakpakɔ sika ugyiedi ku ɔƒualadi akyami lidu lidu bese kakpakɔ kammɔ kemmo. Na uwi ɔni ƒui na ɔkpane Yehoiada úlie ngba ƒui ni, bátaabla ɔnyi ƒɛƒɛɛ ɔni mɔɔyɔ́ Katɔti kaƒɔ akpala bɔkyula ɔdi teete Unwoti limeyi ndi limeyi.

¹⁵Na úlie ngba útu uwi geen na ɔ́ƒɔ akwa eti anyɔ ku avlaatɛ asa na úkpi.

¹⁶Na báva-nwu na kɔƒiɔtɔ kɔni kemmo na baavá bagadine na Yerusalem, ɔsika ɔ́bla ɔdi úte Israelƒuɔ ku Katɔti ku kakpakɔ kammɔ ƒui.

¹⁷Amu na uwi ɔni na Yehoiada úkpi ni, Yudaƒuɔ batɔnkune bammɔ bésie bátátɔlɔ Yoas mini mini na ɔ́tunaku-ma ka ɔbla lɛla lɛni na baawia.

¹⁸Anwuɔsu bétebile uwi ɔdi munu munu asa na báda Unwoti Katɔti bɔkpa báya na nwuna kakpakɔ na bése kalɔ baakpa ala ani na bávɔ béte Asera baƒiɔ beledi bammɔ. Na ɔkɛnku ɔmɛni ɔsu Unwoti Katɔti úti kɔnyi kpakplaa ɔ́kya Yudaƒuɔ ku Yerusalemƒuɔ bammɔ ƒui.

¹⁹Nsu ɔmmɔ ƒui kama ni, Unwoti ɔmu uumene-ma nwuna kenye bediene kalɛ na batálɛ-ma na benwini bebo-nwu kudɔ, nsu béni na bátaƒɔ-ma litemi.

²⁰Amu na Katɔti Kɔyu kútemiku Yehoiada ubidi ɔnanabi Sakaria na ɔ́sɔku ɔ́su ukyuli biala ka kɔyu kɔmmɔ kɔnini, “Bi ɔsu na bíni na bɛɛbla atuɔkplu na mina ɔda bubo lɛlɔ? Lɛtuni kani bɛɛni teewi bina lɛlɔ! Bídie-mi atu, anwuɔsu ami lɛnɔ ndubo-mii atu budie.”

²¹Ɔga Yoas ɔ́ɔyiƒala ka Sakaria ɔmɛni ɔti Yehoiada ni, anwu ku-nwu bádi bɔkpana babuni geen. Anwuɔsu uwi ɔni na bekyuli bammɔ bátása lili likpidi Sakaria lɛlɔ ka badu-nwu ni, anwu lɛnɔ únu ku-ma kalɔ na udie lɛdi ka bebo-nwu atabi badu na kakpakɔ kaduli kemmo mmɔ. Amu na uwi ɔni na Sakaria ɔdaku bɔyula ni, ɔ́su ɔnini, “Muuvele Unwoti nnii ɔnu lɛla lɛni mɔɔlɛ́ mɛni na ɔni bina ƒui kɔtu.”

²³Amu na lɛkwa lɛni nsia ketudi uwi ni, Siriaƒuɔ báta bébekpo Yuda ku Yerusalem na bádu bana batɔnkune bammɔ ƒui. Na béti bana ala ani náƒɔ-ma kuye mmɔ ƒui bátɔlɔku bésienku bana ɔga na Damasko.

²⁴Siriaƒuɔ bekpone bammɔ beeemomo munu munu, nsu Unwoti ɔ́ya na bádi Yudaƒuɔ bekpone pii bammɔ lɛlɔ, ɔsika Yoas ku Yudaƒuɔ bammɔ geen na Unwoti ɔɔwia ɔni kɔtu na kalɛ na bénwini kama bákya-nwu ɔsu.

²⁵Amu na kekpo kammɔ kemmo ni, Yoas ɔ́ƒɔ ɔlɛ geen na uwi ɔni kani na Siriaƒuɔ bammɔ bátɔlɔ ni, nwuna bakutine inyɔ badi bani ndi Sabad ku Yehosabad bábla kasusu ka bedie Sakaria kukpi kasi. Anwuɔsu ka Yoas ɔdaku bɔnwanya na ɔtɛ limeyi linwi ni, bésie na bátádu-nwu. Na báva-nwu na Yerusalem, nsu ɔɔɔdi kɔni kemmo na baavá bana bagadine bammɔ.

²⁷Na baga bammɔ ablala ku bana uwi ala alɛdi ɔku kemmo ni, bénweni ala básiku nwuna bebi lɛlɔ ku ala ani na kenye bediene básu-nwu ku kalɛ na ɔ́klibi kakpakɔ kammɔ etemila bákya bébu. Na Yoas ubidi ɔnanabi ɔni baalɔ Amasia úbenwini ɔga na ɔti kukpi kama.