Read Lelemi Ala Alɛdi 2 25 Bible Online

Ala Alɛdi 2 25 - Lelemi bible

Ala Alɛdi 2 25

¹Amasia ɔ́ƒɔ akwa aavlanyɔ-alɔ asa na bése-nwu lɛga. Na úlie Yerusalem ɔni ndi uni Yehoadin ɔma mmɔ ɔ́di lɛga akwa aavlanyɔ-yaalenwi.

²Ina ka Amasia ɔ́bla lɛbuni na Katɔti anumi ni, útadi nwuna etemila ƒui lɛlɔ ku nwuna kayi ƒui kede kede.

³Na ala ammɔ adi bene ndi ka uwi ɔni kani na nwuna lɛgadi lílie kalɔ na ɔ́kɛ ɔyikun na Yuda lɛlɔ ni, ɔ́ya na béƒie bakutine bani nádu ɔti mmɔ. Na anwu lɛnɔ ɔ́ya na bádu ama lɛnɔ.

⁴Nsu bakutine bammɔ bebi ama ni, útaya na badu-ma, ɔsika nwuna anu asia Katɔti ɔda bubo bɔni nkya Mose ɔku kemmo ka bekyuli bani na báƒiɔ ni, ama alati na ɔdi ka bani kɔtu na ɔɔɔdi ka bani ubi ɔdi kɔtu na ɔti kenye iye bani ubi ɔti ɔdi kɔtu na ubidi kenye.

⁵Amu na Amasia ɔ́kya Yuda ku Benyamin adua bekyuli ɔtu na bálɔ banana bani ƒui náaƒɔ ɔ́si akwa aavlanyɔ ku ka kama ƒui básala. Bekyuli bamɛni ƒui bumomo bɔbla aani nkyuli mpim eti aku na báklibi lɛlɔ béte kekpo. Na badi bekyuli bani ndubɔkana na bada kekpo agyumanala ku atula na bekpo. Anwuɔsu Amasia lɛnɔ ɔ́sala-ma esu esu na bana adua kenye na úti-ma ɔ́kya nwuna bekpone batɔnkune kalɔ.

⁶Amasia úsie útáƒɔ bekpone mpim eti anyɔ bamba ɔ́siku Israel kalɔ lɛlɔ na kayu kenye. Na ɔdubɔƒɔ kayu kani mabla aani sika ɔƒualadi antabi aƒo bonwu aavlene unu na bana lili.

⁷Amu na Katɔti kenye bediene bammɔ akɔ unwi ɔ́su ɔnini, “Mina Ɔga Ɔbune, taya na Israelƒuɔ bekpone bamɛni besie basiaku-ɔ besie kekpokɔ, ɔsika bana lɛgakɔdikɔ kɔni na kɔkya katɔ kakɛ mmɔ ƒui ni, Katɔti úni ka ute bana akɔ ukyuli ɔdi kebunku.

⁸Anwuɔsu si ina bi lɛnanabi na ádi na kekpokɔ muedi ni, ƒula bekisine badubo-ɔ lɛlɔ bɔdi. Katɔti mɔɔyá na ukyuli ɔɔdi lɛlɔ iye badi ukyuli ɔmmɔ lɛlɔ.”

⁹Mmɔ na Amasia údie kenye na úye kenye udiene ɔmmɔ ɔnini, “Na dɛ na ndubo bɔbla asa na masɔ makɛ mina sika ɔƒualadi ɔni ƒui na líti lɛƒɔ kayu na Israelƒuɔ bekpone bammɔ lili?” Amu na Katɔti kenye udiene ɔmmɔ ɔ́su-nwu ɔnini, “Unwoti ɔdubɔkana na ɔsɔku sika ɔmmɔ ute-ɔ utulo ɔni na éti áƒɔ kayu kammɔ muedi.”

¹⁰Ɔmmɔ ɔsu Amasia úbo Israelƒuɔ bekpone bammɔ ɔda ɔnii bátɔlɔ beteesie bana kalɔ lɛlɔ. Nsu uwi ɔni na báyu ulu bésela ni, béti kɔnyi bákya Yuda kadi bekyuli geen.

¹¹Amu na kama ƒui uwi ɔni na Amasia kayi kásɔ kénwini kélie-nwu kalɔ káwɔlɔ ni, ɔ́tɔnku nwuna bekpone na bésie kesii kani baalɔ banii Mma Kɔwɛ kemmo na bátádu Edomƒuɔ bekpone mpim leevu na kekpokɔ mmɔ.

¹²Na úƒie bekpone bamba ngba ngba na bákpanku-ma bákɔliku kɔbi kɔdi lili bétényene lɛtakpɛ gegenge kɔdi lili. Mmɔ na bédi-ma bábaƒiɛmi atabi lɛlɔ na kɔwɛ voo kɔmmɔ kemmo na bábwɛ kpɛtɛ kpɛtɛ.

¹³Na uwi ɔni na ala amɛni ƒui aalɛ́ ni, Israelƒuɔ bekpone bani na Ɔga Amasia údie ulu ka batɔlɔ mmɔ bésie bétékpoku Yuda lɛma lɛni Samaria ku Bet-Horon lɛma ntɛ. Na bádu nkyuli mpim leevu na béƒie-ma ala ƒui báƒɔ bátɔlɔku.

¹⁴Uwi ɔni na Amasia úsie útádi Edomƒuɔ lɛlɔ na kekpokɔ ɔ́wɔlɔ ni, úti bana báƒiɔ ala anwidi ku avɔdi ɔ́tɔlɔku úboku Yerusalem. Mmɔ na úbese-ma na ɔɔkpá-ma na ɔɔkya lili kalɔ teete-ma.

¹⁵Na ɔbladu ɔmɛni ɔ́ya na Katɔti ɔ́kɛ kɔnyi geen. Anwuɔsu ɔ́tala kenye udiene ɔdi ɔ́kya-nwu ɔnii utéye-nwu ɔnini, “Bi ɔsu na ɔdi ka eti kadi bamba baƒiɔ bani na bátakana na bekpo bete ama alati kadi bekyuli muedi ebese ataakpa?”

¹⁶Nsu kenye udiene ɔmmɔ útawɔlɔ tɔ lɛla lɛni na uuye asa na Ɔga Amasia ɔ́tu-nwu kenye ɔnini, “Aaadi mina kasusu bakyane akɔ ɔdi! Anwuɔsu si aaagyi na ásɔ ébimi kenye ásu lɛla lɛdi ɔƒɛni ni, ndubɔya na badu-ɔ.” Mmɔ kani na kenye udiene ɔmmɔ ɔ́da butemi ɔ́ya. Nsu ɔ́su ɔ́sia ɔnini, “Katɔti úse ka ɔyila-a udu geen! Ɔsika kudeedi ni, ábla likpidi na ásɔ éni mina bɔlɛ.”

¹⁷Yudaƒuɔ Ɔga Amasia ku nwuna bakutine benengu bábla kelisa na ɔ́kya Israelƒuɔ Ɔga Yehoas ɔni ndi Yehu ubidi ɔnanabi ɔtu ɔnini, “Klibi lɛlɔ na ebo na ami ku-ɔ bɔsa anumi ku anumi na kekpokɔ!”

¹⁸Mmɔ na Yehoas lɛnɔ ɔ́sɔku ɔtu ɔ́kya-nwu úmene ɔnini, “Dii ni, liyu alakpi adi na Lebanon ákya kugyii bonwu kpakplaa kɔdi na Lebanon mmɔ kani ɔtu ɔnii, ‘Mɔɔwia ka eti ƒ'ubidi ulekubi ete-mi na lite mina ɔnanabi na uti.’ Nsu alakpi akɔ ebuo bonwu ɔdi úbo na úbanya liyu alakpi ammɔ úsusu ɔ́mana kalɔ kpɛtɛ kpɛtɛ.

¹⁹Amasia, aanu lɛlɔ ka ebo ɔyikun geen ka ékpo ádi Edomƒuɔ lɛlɔ ɔsu. Sɔ lie ƒula ɔma na ataakɛ ƒula kubiti. Bi ɔsu na aawia lɛlɔ lɛsɛ na adubo bɔya na awɔ ku ƒula Yuda lɛgakadikɔ ƒui bɛyii ku udu?”

²⁰Nsu Katɔti ɔ́bla-nwu atu kpakplaa na Yehoas kenye kammɔ kátabla Ɔga Amasia kasusu kadi munu munu, ɔsika Katɔti úuse úse kalɛ na ɔdubuti ɔni-nwu kɔtu na Edomƒuɔ baƒiɔ bani na útéti úbese ɔɔkpá mɛni ɔsu.

²¹Ɔmmɔ ɔsu Yehoas ɔ́tɔnku nwuna bekpone na anwu ku Amasia bekpone bása na Bet-Semes na Yuda kalɔ kemmo.

²²Na bésusu Yudaƒuɔ bekpone bammɔ kaduɛ na bábɔku-ma na békeli bénwini bésie ɔma ƒui kede kede

²³na Yehoas úƒie Amasia. Amu na uwi ɔni Yehoas úsie utábwɛ Yerusalem ni, ɔ́kpanku Amasia ɔni na úƒie na kekpokɔ ɔda. Na Yehoas ɔ́bwɛ awodu bonwu ani na bátu bámana ɔma unengudi ɔmmɔ ɔ́si kesii kani baalɔ Eƒraim ɔban kenye útédu kesii bamba kani baalɔ banii Okodo ɔban kenye. Na mmɔ bune ɔdubɔdi lɛgba eti leevu-anyɔ.

²⁴Na kesii kani geen na Obed-Edom kaba kemmo bebi beenye taagyumana mmɔ geen na ɔ́ya na béti sika ugyiedi ku ɔƒualadi ku ala bamba ani na áƒɔ kuye geen mmɔ na ese Katɔti kakpakɔ mmɔ bátalɔku ƒui kede kede. Na egulabi ani na ese Ɔga egulabi kesekɔ mmɔ ku ala bamba na úƒie bekyuli bamba lɛnɔ na ɔ́tɔlɔku-ma ƒui úsienku Samaria kalɔ lɛlɔ.

²⁵Ka Yehoas úkpi kama ni, Amasia ɔ́sɔ úlie akwa leevu-alɔ.

²⁶Na ala bamba ani ƒui na Amasia ɔ́sɔ ɔ́bla na nwuna lɛga bɔdi uwi ni, bénweni ana ƒui bákya Yudaƒuɔ baga ala alɛdi ɔku kemmo.

²⁷Amu na uwi ɔni kani na Amasia úse kalɔ ɔɔta teenye Katɔti litemi lɛlɔ ni, bekyuli badi na Yerusalem mmɔ bása lili na Amasia lɛlɔ. Nsu Amasia úbati na ɔ́wia kuƒi na úkeli úsie ɔma ɔni baalɔ Lakis kemmo, nsu kasala bamba báwia-nwu kama ulu na bátánu-nwu béƒie na bádu-nwu na mmɔ.

²⁸Bágyu-nwu ukpine básia ɔpɔnkɔ lɛlɔ bésienku Yerusalem bátáva kesii kani na nwuna nana ati bene batɛ.