Read Lelemi Ala Alɛdi 2 26 Bible Online

Ala Alɛdi 2 26 - Lelemi bible

Ala Alɛdi 2 26

¹Ka Ɔga Amasia úkpi ni, Yudaƒuɔ béƒie ubidi ɔni baalɔ banii Usia na basɔ baalɔ-nwu lɛnɔ banii Asaria bése lɛga na ɔti kenyekɔ.

²Anwu násɔku Elat ɔma ɔ́tu úte Yudaƒuɔ na ɔti bukpi kama.

³Akwa leevu-aku na Usia ɔ́ƒɔ asa na bése-nwu lɛga. Na úlie liboku lɛlɔ akwa liti ku inyɔ. Uni na baalɔ banii Yekolia na ɔ́si Yerusalem.

⁴Únu Katɔti litemi na ɔ́di-ni lɛlɔ na ɔɔbla ala ulu lɛlɔ aani kalɛ ɔti ɔ́bla.

⁵Sakaria ndi ukyuli ɔni nátina Usia ala na ɔ́tina-nwu kalɛ na unu Katɔti litemi na ɔdi-ni lɛlɔ lɛnɔ. Anwuɔsu uwi ɔni kemmo na Sakaria úlie ngba ƒui ni, Usia útaadi Katɔti litemi lɛlɔ kaduɛ na Katɔti lɛnɔ ɔ́ya na ala átɛku-nwu.

⁶Na Usia lɛga bɔdi uwi ni, útékpo Ƒilistiƒuɔ na ɔ́bwɛ bana lɛma lɛni ndi Gat ku Yabne ku Asdod lɛma awodu ani na bátu bámana-ni. Na ɔmmɔ kama ɔ́sɔku lɛma bamba ɔ́tu na Asdod amadɔ mmɔ ku ekpo bamba ka Ƒilistiƒuɔ kalɔ lɛlɔ mmɔ.

⁷Katɔti úbunku-nwu na ɔ́di Ƒilistiƒuɔ ku Arabiaƒuɔ bani na bakya Gur-Baal ku Meunite mmɔ bene ƒui.

⁸Na Amonƒuɔ muedi bátaaƒɔ lɛlɔ ɔdine kuyi teete Usia aani nwuna kalɔ bakyane kalɛ. Nwuna lɛnyi ku ɔyikun ɔni na ubo úsie ɔgyu geen ɔni na Egyipteƒuɔ bani na bakya ɔgyu kakaaka muedi bénu-nwu kɔku.

⁹Usia ɔ́tu ɔma kɔgyumanakɔ kpakplaa únyene Yerusalem na Okodo ɔban kenye ku Kɔwɛ ɔban kenye ku kesii kani na bátu kowodu kɔmmɔ béduoku aani kekpokpo.

¹⁰Na ɔ́tu kɔgyumanakɔ bamba únyene kalɔ kakwiidi kammɔ kemmo. Na ubo bebuo na bemomo-nwu geen na bakya abi ammɔ kaƒɔna ku kalɔ ƒiaa kani nwi mmɔ kemmo lɛnɔ. Ɔmmɔ ɔsu ɔ́ya na bátu abiɔ lɛnɔ na emomo kalɛ na utaaƒɔ ntu teete-ma uwi biala kemmo. Na ka ɔɔyɔ́ kemo busie ɔsu ni, ubo edula ku adingyii lidu mmo geen na abi lɛlɔ kesii kani na kalɔ kammɔ kadia geen ƒui na ɔ́ƒɔ bekyuli ɔ́kya mmɔ na baanu mmo bɔmmɔ lɛlɔ na ɔɔƒɔ-ma kayu.

¹¹Usia bekpone benye kagyumana bete kekpo uwi biala. Na Yeiel ku Maaseia ndi bakutine benengu bani mɔɔnu bekpone bammɔ bumomo bɔka lɛlɔ ala uwi biala. Na nkyuli inyɔ bamɛni lɛnɔ bakya Usia benengu akɔ unwi ɔni na baalɔ banii Hanania kalɔ.

¹²Na atɔƒi benengu bani ndi bekpone bamɛni batɔnkune bumomo bɔdi nkyuli 2,600.

¹³Na bekpone bani na bátina-ma kekpo bukpo kɔkwɛ geen ama alati bebo 307,500.

¹⁴Usia úte bekpone bamɛni kayi agyumanala ku atula ku kekpo kɔbwa ku agyumanala bamba kɔtaminta ku kavwinvwi atabi.

¹⁵Na nwuna bakywɛɛne babuni bani na ubo ku kabla lidu bamba bablane bani na bebo kasusu geen béti abuala bábla ekpola ani alati mɔɔkana na eebó atula ku atabi taasiaku bekisine. Na Usia úti abuala amɛni ɔ́lɛ Yerusalem na kesii kani bene na ɔ́tu ɔma kɔgyumanakɔ kpakplaa kɔmmɔ únyene mmɔ. Katɔti ɔ́ya na Usia ɔyikun ku lɛnyi lɛ́ku lísie ɔgyu geen na kɔlɔ ƒui bekyuli akɔ.

¹⁶Amu na ɔyikun ɔni na úbakɛ mɛni ku kalɛ na nwuna lɛnyi lísie ɔgyu ɔsu ni, Usia úse kalɔ ɔɔkɔliku lɛlɔ katɔ na ɔmmɔ náya-nwu na úbo kalɔ. Limeyi linwi ni, Usia útenu Unwoti nwuna Katɔti litemi na ɔ́ta útéduo kakpakɔ na úsie útéti oloƒui ɔdi ɔɔkyula aani akpala ute-nwu.

¹⁷Mmɔ na Asaria ɔni ndi ɔkpane ku bakpane liti ku avlaatɛ bamba bése kayi básia-nwu kama bétéduo-nwu kudɔ na kakpakɔ mmɔ.

¹⁸Béye-nwu etemila geen na básu-nwu banini, “Ɔɔɔdi ulu ka ɔbla lɛla lɛni udu na aabla mɛni, ɔsika Aaron bebi bani na bése likpo aani bakpane kani na ɔlɛka babla bɔkyula ɔdi ɔmɛni udu. Anwuɔsu ɔlɛka avi alɛ mɛni! Ábla likpidi áƒiɔ Unwoti ɔni na nwuna kusɛ kusɛ ɔsɔ ɔɔɔdubo-ɔ bɔsiaku.”

¹⁹Na uwi ɔmmɔ ni, Usia ɔda oloƒui libui lɛmmɔ unye ka use kalɔ ku oloƒui ɔmmɔ bɔkyula asa na Ɔkpane Asaria ɔɔdɔnku-nwu na ɔ́kɛ kɔnyi geen. Na uwi ɔni na kɔnyi kɔmmɔ kɔɔkɔ́-nwu lɛni ni, ɔlɛ buɛ ɔdi ɔ́lɛ-nwu atɛntɛ.

²⁰Na Asaria ku bakpane bakladi bánu ɔmɛni báti kɔnakunwi na básu banii ɔvi ɔlɛ kakpakɔ mmɔ. Usia ɔlati ɔ́nu ɔ́ti ka Unwoti náni-nwu kɔtu, anwuɔsu ɔ́babla ka ɔvi ɔlɛ mmɔ.

²¹Na ɔlɛ buɛ ɔmɛni úbaƒɔ Usia lɛlɔ ƒui nwuna ngba emeyi akladi ƒui kemmo. Anwuɔsu básɔ bétete-nwu kuƒi ka uduo kakpakɔ mmɔ iye ɔga kesii mmɔ muedi mmomu úlie kesii bamba. Ɔmmɔ ɔsu na ubidi Yonatan na béti bése-nwu kenye aani ɔga kalɛ.

²²Na ala bamba ani ƒui na Usia ɔ́sɔ ɔ́bla na nwuna lɛga bɔdi uwi ni, bénweni-nya bákya Kenye Udiene Yesaia ɔni ndi Amos ubidi ala alɛdi ɔku kemmo.

²³Na ɔlɛ buɛ ɔni na Usia úƒi ɔsu ni, bátakana na bava-nwu na baga katɛnkɔ mmomu bátáva-nwu na bekyuli kavakɔ kalɔ bamba kani na baga bammɔ kani béye bése. Na ɔmmɔ kama ni, bése ubidi Yonatan lɛga.