Read Lelemi Ala Alɛdi 2 27 Bible Online

Ala Alɛdi 2 27 - Lelemi bible

Ala Alɛdi 2 27

¹Akwa aavlanyɔ-alɔ na Yonatan ɔ́ƒɔ asa na bése-nwu Yudaƒuɔ lɛga. Na úlie Yerusalem ɔdi lɛga akwa leevu-aku. Sadok ubidi ulekubi ɔni baalɔ banii Yerusa ndi uni.

²Yonatan úlie ngba bɔbuni aani ɔti kalɛ, nsu anwu útetéduo kakpakɔ mmɔ kudii ɔnii ɔɔkyula oloƒui kalɛ na ɔti ɔ́bla dii mmɔ. Mmomu bekyuli bammɔ ala bana likyulikpi ala ani na baabla taata teenye Katɔti lɛlɔ kani nátakɔsi.

³Yonatan ɔ́sia ulu biala lɛlɔ na ɔ́sɔku kakpakɔ ɔban kayakun kani nésie kɔtɔ kakɛ mmɔ ɔ́tu na ɔ́bla kabla bamba lidu na kowodu kakɛ kani nde kesii kani baalɔ banii Oƒel Kɔbi mmɔ.

⁴Ɔ́tu lɛma lɛwɔdi ɔ́kya Yudaƒuɔ abi ammɔ lɛlɔ na ɔ́tu kɔgyumanakɔ kpakplaa lidu ɔ́kya aku ammɔ kemmo ƒui.

⁵Na uwi ɔni na ɔɔdi lɛga ni, úkpo na ɔ́di Amonƒuɔ lɛlɔ. Na akwa atɛ kemmo ɔ́si ɔmmɔ kama ni, bátaaƒɔ ukyuli kalɔ bakya kuyi teete-nwu ɔni ndi sika ɔƒualadi antabi aƒo bonwu aavlene unu ku edula aani antabi akyami mpim liti ku leevu ku edula bamba lɛnɔ aani kakpa akyami mpim liti ku leevu.

⁶Yonatan ɔ́siaku Unwoti Katɔti kama siin na úbenwini ɔga ɔyikune geen.

⁷Na ala bamba ani ƒui na Yonatan ɔ́sɔ ɔ́bla ku kekpo kani ƒui na úkpo na nwuna lɛga bɔdi uwi ni, bénweni-nya bákya Israel ku Yudaƒuɔ baga alɛ alɛdi ɔku kemmo.

⁸Yonatan ɔ́di lɛga akwa leevu-aku na úbekpi uwi ɔni na ɔ́ƒɔ akwa aavlene-unwi.

⁹Báva-nwu na Yerusalem na ubidi Ahas nébenwini ɔga.